Isu thonawkna thu
16
1 Sabat ni a hung invoi chun Mari Magdalin, Jakob nu Mari le Salomi hai chun Isu ruonga nâl ding hriek rimtui an inchawk a. 2 Pathienni tûk inhma tak, ni suok hlimin thlănah an va fe a. 3 “Thlănkhăr tuin am mi’n hlum sonpek a ta?” an ta. 4 An hang en ruok chun thlănkhăr lung lien tak el chu inhlum son sain an hmu a. 5 Thlăna chun an lŭt a, tlangval pakhat puon var sil, chang tienga inthrung an hmu a, an tri hle a. 6 Ama chun, “Tri naw ro, Nazaret Isu, an hemde tah kha in zong a ni awm a, a tho nawk tah a, hi taka hin a um ta nawh; en ta u, a zalna chu hi hi a nih. 7 Nisienlakhom fe unla, a zirtirhai le Peter kuomah, ‘A hril chêu ang ngei khan Galili-ah a lo fe hmasa ding a na, chu taka chun hmung in tih’ tiin va hril ro” a ta. 8 Anni chu tri le maktia inthin hâwpin, thlăna inthok chun an tlàn suok a, an tri luotin tu kuoma khom ieng khom an hril nawh.***
Mari Magdalin kuomah a’n lâra
9 [Pathienni tûka a thonawk chun a sûnga inthoka khawhri pasari a hnot suokpek Mari Magdalin kuomah a’n lâr hmasa tak a. 10 Ama chu Isu ruolhai kuomah a fe a, mithi pûr doa an trap lai chu a va hril a. 11 A hring nawk thu le hmu khom a hmu ngei thu a hril chu hre hai sien khom an awi chuong nawh.
Zirtir pahni kuomah an lâr
12 Chu hnung chun anni laia mi pahnih, thingtlang khuo tieng pana an fe laiin hmêl danglam putin an kuomah a’n làr a. 13 Anni khom chun an ruol danghai chu an hung hril ngei a, sienkhom an lo awi chuong bik nawh.
Zirtir sawmpakhat kuomah a’n làr
14 Chu hnung chun zirtir sawmpakhathaiin bu an fak lai an kuomah a hung inlàr a, an ringna tlawm lei le a tho nawk hmutuhai thu an awi nuom tlat nawna thuah a kawk tawl a. 15 An kuomah, “Khawvel po poah fe unla, thilsiem po po kuomah Chanchin Thra hril ro. 16 Tu khom ring a, baptisma chang chu sandam ning an ta, tu khom a ring naw chun thiem naw chang an tih. 17 Hieng inchikna thilmakhai hin ringtuhai chu zui pei a tih: Ka hmingin ramhuoihai hnot suok an ta; trong tharin trong an ta; 18 kutin rûl man an ta; thina tûr dawn hai sien khom ieng khom ti naw ni hai; damnawhai chungah kut innghat an ta, hung dam pei an tih” a ta.
Isu van lawn