2 Farisai threnkhat a kuomah an hung a, ama fiena dingin, “Pasalin a nuhmei a mak a thieng am?” tiin an indon a. 3 Ama chun, “Mosien ieng thu am a pek cheu?” a ta. 4 Anni chun, “Mosie chun inmâkna lekha zieka mak a phal” an ta. 5 Isu ruok chun, “In lungril ngar leiin Mosien hi dan hi a ziekpek chêu a nih. 6 Amiruokchu, thilsiem intran tira inthokin Pathienin anni chu pasal le nuhmeiah a siem a. 7 Chu lei tak chun pasalin a nu le pa maksan a ta, a nuhmei leh inkop an ta,^a 8 an pahni chun pum khat^b ni tang an tih. Pahni an ni ta naw a, kop khat an lo ni ta lem a nih. 9 Chuleiin, Pathienin a zom tah chu mihriemin thrè naw raw se” a ta. 10 Inah a zirtirhaiin chu thu bok chu an indon nawk a. 11 Ama chun, “Tu khomin a nuhmei thrèa mi dang a nei chun a nuhmei a uirèsan a nih; 12 nuhmei khomin a pasal thrèa mi dang a nei chun a uirè a nih” a ta.

13 Chun, a them dingin naupangte ruol an hung thruoi a, a zirtirhaiin an lo hal a. 14 Isun chu chu a hmuin a lung a khei a, an kuomah, “Naupanghai kha ka kuomah inhungtir unla, khap naw ro, Pathien ram chu hieng ang mihai ta hi a ni si a. 15 Thu dik ka hril chêu hi, naupang anga Pathien ram lawm naw taphot chu a sûngah lut naw top an tih” a ta. 16 Anni chu a pom a, mal a sawm tawl a.

17 Chu taka inthoka Isu an thok suok lai chun mi pakhat a hung tlăn a, a hmaah a dingthrathruon a, “Zirtirtu Thra, chatuon hringna ka nei theina dingin iem thawng ka ta?” tiin a’n don a. 18 Isun a kuomah, “Ieng dinga Thra i mi ti? Tu khom thra an um nawh, Pathien chau naw chu. 19 Dan thupêkhai chu i hriet annawm: tuol that naw, uire naw, inru naw, khêlin mi hêk naw, hlêpru naw, i nu le pa chawimawi rawh, tihai hi.” a ta. 20 Ama chun, “Zirtirtu, chuong po po chu ka tleirawl tîra inthokin ka zawm hlak” a ta. 21 Isun ama chu chieng takin a en a, a ngaina ta hle a, a kuomah, “Kong khat i la bâk ie. Fe la, i nei po po va zor la, pasiehai pe rawh, chuongchun vanah ro nei i tih. Chu zoah hung la, mi zui rawh” a ta. 22 Chu zet chun a hmel a hung ngŭi a, beidong takin a fe hmang a, mi hausa tak a ni si a. 23 Isu chu a ngha vel a, a zirtirhai kuomah, “Mi hausa ta dingin Pathien rama lût a va’n tak awm de!” a ta.

24 Zirtirhai chun a thu hril chu mak an ti hle a. Isun a hril pei a, “Nauhai, Pathien rama lut chu a harsa rêng annawm! 25 Pathien rama mi hausa an lut nêkin thrim naa sanghawngsei a lut thleng ol lem a tih” a ta. 26 A zirtirhai chun mak an tizuol a, “Chuong a ni chun tu am sandam ni thei an ta?” an ti sap sap a. 27 Isun anni chu a en a, “Chu chu mihriem ta ding chun thaw thei ruol a ni naw hrim a nih, Pathien ta ding ruok chun a ni nawh; Pathien ta dingin iengkim thaw thei a nih” a ta.

28 Peter chun a kuomah, “Ngai ta, keini hlakin iengkim maksanin kan zui ta si che a!” a ta. 29 Isun, “Thu dik tak ka hril cheu hi, tu khom keima lei le Chanchin Thra leia in le lo dam, unauhai dam, farnuhai dam, nu dam, pa dam, nauhai dam maksan chun, 30 tuta dam sung lâ la hin in le lo hai, unauhai, farnuhai, nu le pa hai le nauhai a lêt zain sukdùdàna leh hmu ngei an tih, hun la hung tlung dinga chatuon hringna leh. 31 Nisienlakhom, mi tam tak a hmasa taka umhai chu a nuhnung tak la ning an ta, a nuhnung taka um khom a hmasa tak la ning an tih” a ta.

32 Jerusalem an pan tung mek lai chun Isun hma a thruoi a, a zirtirhai chun mak an ti hle a, a zuituhai chu an zâm hlè bok a. Sawmpahnihai chu Isun a ko bing a, a chunga thil hung tlung ding po po chu a hril tawl a. 33 “Ngai ta u, Jerusalemah ei hang fe nawk ding a nih. Mihriem Naupa hi thiempu lalhai le Dan zirtirtuhai kuta inmantirin a um ding a nih. Anni chun thi dingin a chungthu rêl an ta, Jentelhai kutah pe suok an tih. 34 Ama chu nuizatbûrah hmang an ta, chil sakkhum an ta, vuong an ta, sukhlum an tih; nisienlakhom ni thum niah tho nawk a tih” a ta.

35 Zebedai naupa Jakob le Johan chun ama chu an hung hnai a, “Zirtirtu, kan hni taphot chê chu i mi thawpek kan nuom” an ta. 36 Ama chun, “Iem thawpêk lang cheu in nuom a?” a ta. 37 Anni chun, “I ropuinaa chun i chang tieng pakhat, i voi tieng pakhat mi’n thrungtir rawh” an ta. 38 Isu ruok chun, “In thil hni hi in hriet naw a nih. Ka no dawn ding chu in dawn ve thei dim a ni? Baptisma ka chang ding khom in chang ve thei dim a ni?” a ta. 39 Anni chun, “Thei kan tih” an ta. Isun, “Ka no dawn ding chu dawn in ta, baptisma ka chang ding khom chang veng in tih. 40 Nisienlakhom ka chang tieng amanih voi tieng amania inthrungtir chu ka thu a ni naw a, an buotsaipekhai ta ding chauh a ni lem” a ta.

41 Zirtir dang sawmhaiin chu chu an lo hrietin Jakob le Johan chungah an lungni naw hle a. 42 An rêng chun Isun a ko khawm a, “Jentelhai chunga rorêltua ruothai chu an chungah an insuklal ĕm êm hlak a, an mi lienhai khomin an chungah thu an nei hlè hlak. 43 Nangni lai ruok chu chuong ang chu a ni ve ding a ni nawh. Chu nêk hmanin, tu khom nangni laia a ropui tak ni nuom chu in rongbawltuah a um ding a nih. 44 Nangni laia a hmasa tak ni nuom khom mi po po siehlawah a um bok ding a nih. 45 Mihriem Naupa meu khom a rong bawlpeka um dingin a hung naw a, rongbawl ding le mi tam tak intlannaa a hringna pe dingin a hung lem a nih” a ta.

46 Jeriko an hung tlung a, Isu chu a zirtirhai le mipui tam tak leh Jerikoa inthok chun an suok a, Timai naupa, mitdel Bartimai chu lam sǐrah kutdawin a lo inthrung a. 47 Nazaret Isu a nih ti a hriet chun, “Isu, Davida naupa, mi lunginsiet rawh” tiin a khêk a. 48 Mi tam takin an hal a, to dinga an hril khomin a hma nêka inringin, “Davida Naupa, mi lunginsiet rawh” tiin a khêk zuol sau a. 49 Isu chu a ngîr a, “Hung ko ta u” a ta. Mitdel chu an hung ko a, “Ngai sukngam la, tho rawh, a ko che” an ta. 50 A puon chu a thè thlăk a, a’n chawm tho a, Isu kuom tieng a pan a. 51 “Iem thawpek lang che i nuom a?” tiin Isun a’n don a. Ama chun, “Rabi, hmu thei ka nuom” a ta. 52 Isu chun, “Fe ta rawh, i ringna i dampui a nih” a ta. Khuo a hmu thei ta nghal a, lampuia chun Isu a zui ve ta a.