3 Chuongchun, Peter le zirtir dang chu thlan tieng panin an suok a. 4 An pahni chun an tlăn a, zirtir dang chu Peter nĕkin a tlân hrat lem leiin thlăn a tlung hmasa a. 5 Kûnin a zuk bi a, puon zai inhmi chu a hmu a, a sûnga ruok chu a lût nawh. 6 A hnunga hung Simon Peter khom chu a hung tlung ve a, thlàn sûngah a zu lût a, truonga puon zai inhmi chu a hmu a, 7 a lu tuomna, inhrûkna puon khom chu inziel a, puon zai inhmi lai um loa a hrana um chu a hmu bok a. 8 Zirtir dang, thlăn tlung hmasa khom chu a lût ve a, a hmu a, a ring a. 9 Mithi laia inthokin a tho nawk ding a nih ti Pathien Lekha thu kha an la hriet thiem phak hri si nawh. 10 Chuongchun, zirtirhai chu mani in sengah an kir nawk tah a.

11 Mari ruok chu thlàn puo tieng trap pumin a ngîr zing a, mitthli sûr hnuoiah a kûn a, thlăn sûng a zuk bi a. 12 Isu ruong zalna, a lu le ke bul ve vea chun thuom var inbel vantirko pahnih inthrung a hmu a. 13 Anni chun, “Nuhmei, ieng dinga i trap am? an ta. Ama chun, “Ka Lalpa an lak hmang a, an siena chin hrim ka hriet naw lei a nih” a ta. 14 A hril zo chun a hang ngha kǐr a, Isu ngir chu a hmu a, Isu a nih ti ruok chu a hriet nawh. 15 Ama chun, “Nuhmei, iem a ta i trap? Tu’m i zong a?” a ta. Mari chun huon enkoltu amanih a sawn a, a kuomah, “Pu, ama hi i lak hmang a ni chun i siena hmun mi hril ta la; chuongchun ka lâk ding annawm” a ta.

16 Isun, “Mari” a hei ta. Ama tieng chu a hung ngha a, Aramik trongin, “Rabboni” tiin a khêk suok ta phong a (Rabboni chu Zirtirtu tina a nih). 17 Isun, “Mi chel naw rawh, Pa kuom tieng ka la kîr hri naw hi. Amiruokchu, i unauhai kuomah fe la, an kuomah, ‘Ka Pa, in Pa, ka Pathien, in Pathien kuomah ka kîr ta ding a nih’ a tih ti va hril rawh” a ta. 18 Mari Magdalin chu zirtirhai kuomah a fe a, Lalpa a hmu thu le a kuoma a hrilhai chu a hril tawl a.

19 Chu ni, Pathienni zantieng, Judahai an tri leia zirtirhaiin an umna in kotkhar an khâr hnung chun an kuomah Isu a hung a, anni lai a hung ngǐr a, “Thlamuongna in chungah um raw se” ^b a ta. 20 A hril zo chun a kut le a nâk a’n entir a, Lalpa an hmu chun a zirtirhai chu an lawm hle a. 21 An kuomah, “Thlamuongna in chungah um raw se. Pain a mi tir ang bokin kei khomin ka tir chêu hi” a ta. 22 Chu zoah anni chu a’n thuok khum a, “Thlarau Thienghlim nei ro. 23 Tu suol khom in ngaidam chun ngaidam ning a ta, in ngaidam naw chun ngaidam ni naw nih” a ta.

24 Sawmpahnihai laia pakhat Thoma Didum (Phîra an ti chu), Isu a hung laiin anni lai a um ve naw a. 25 Zirtir danghai chun a kuomah, “Lalpa chu kan hmu tah” an ta. Ama chun, “A kut thîrkila an kil dĕna ser hmu a, kutpârin a hliemna ser ngei tawk a, a nâk ka them ngei naw chun ka awi thei nawh” a ta.

26 Ni riet hnunga chun a zirtirhai chu in sŭngah an um khawm nawk a, Thoma khom a thrang ve ta a. Kotkharhai chu khâr vong ni sien khom Isu a hung a, anni lai a hung ngǐr a, “Thlamuongna in chungah um raw se” a ta. 27 Thoma kuoma chun, “I kutpăr khan mi hang them vêl la, ka kuthai hi en rawh, i kutin hang ban la, ka nâk them rawh; ringhla loin awi el rawh” a ta. 28 Thoma chun a kuomah, “Ka Lalpa le ka Pathien” a ta. 29 Isun a kuomah, “Nangin kei i mi hmu leiin i ring a; hmu bok si loa ringhai chu an hamthra” a ta.

30 Zirtirhai hmuah inchikna thilmak dang tamtak Isun a thaw a, chuonghai chu hi lekhabua hin ziek sa a ni nawh. 31 Hieng zieka umhai hi, Isu chu Krista, Pathien Naupa a nih ti in ringna ding le in ring leia ama hminga hringna in neina dinga ziek a nih.