11
1 Keiin Krista ka enton ang hin nangni khomin mi enton ve ro.
Chawibiek inkhawma um dan ding
2 Iengkimah in mi hriet zing hlak lei le thucha ka’n hlàn sawng chêu ang taka in vong tlat leiin ka’n pàk chêu. 3 Hi hi in hriet ka nuom: Pasal taphot lu chu Krista a na, nuhmei lu chu pasal a na, Krista lu chu Pathien a nih. 4 Pasal tu khom lukhum khuma trongtrai amanih le thuhril amanih chun a lu a sukmuolpho a nih. 5 Chun, nuhmei tu khom lukhum khum loa trongtrai amanih le thuhril taphot chun a lu a sukmuolpho a nih, chuong ang chu mêt kol leh angkhat zing a nih. 6 Nuhmeiin lukhum a khum si naw chun a lu mêt kol law law raw se. Amiruokchu, nuhmei ta dingin lu vaw amanih le met kol amanih chu thil inzakum a ni si leiin lukhum khum raw se. 7 Pasal chu Pathien angpui le a ropuina a ni leiin lukhum a khum ding a ni nawh; nuhmei ruok chu pasal ropuina a nih. 8 Pasal chu nuhmeia inthoka siem a ni naw a, nuhmei ruok chu pasala inthoka siem a nih. 9 Pasal hi nuhmei ta dinga siem a ni naw a, nuhmei ruok chu pasal ta dinga siem a nih. 10 Hi lei le vantirkohai leiin nuhmei chun thuneitu hnuoia um a nizie inchikna a lu-ah a khum ding a nih.
11 Nisienlakhom, Lalpaa ruok chu nuhmei hi pasal thrang loin a um thei naw a, pasal khom nuhmei thrang loin a um thei bok nawh. 12 Nuhmei hi pasala inthoka siem a ni ang bokin pasal hi nuhmeia inthoka pieng a ni si a; nisienlakhom iengkim hi Pathiena inthoka suok vong a nih. 13 Hang ngaituo hman ta u, nuhmeiin lukhum khum loa Pathien kuoma a trongtrai chu a awm hrim am? 14 Pasalin sam sei a put chun a ta dingin thil inzakum a nih ti in piengpui lungril puoksuok khomin in hriet el naw? 15 Nuhmeiin sam sei a put ruok chun a mawipui hle, sam sei chu ama inkhumna dinga pĕk a ni si a. 16 Ieng khom ni sien, hi hi tu khomin in sêlkal chun chuong thila chun keinin chìng dan kan nei naw a, Pathien kohranhai khomin ei nei bok nawh.
Sakramen kǐl dan indik lo
17 Hieng thua inchuktirna in zawm dan konga ruok chu ka’n pâk thei naw chêu; in inkhawm hi thratpui nêkin in sietpui lem a nih. 18 A hmasa takin, kohran inkhawmah nangni lai inthrĕna a um hlak ti ka lo hriet a, iemani chenah ka ring deu hrim a nih. 19 Nangni lai ngaidan inang lo a suok ding a ni hrim a, chu chun nangni laia mi takhai chu suklang chieng a tih. 20 In inkhawm dan hi Lalpa zanbu kîl dinga inkhawm khom in ni chie nawh. 21 Fak a hun pha tu khom nghak loin mani bu chawi seng in fâk a, a thren phingtrâma an la um laiin a thren chu in lo inrui hman dĕr ta hlak. 22 Hi hi ieng thil am an ta leh! Chuong anga fâk le dawnna ding chu mani in in nei seng an naw am a ni? An naw leh, Pathien kohran hmusitin, a nei nawhai chu sukzak in tum am a ni? Ieng am hril tang ka ta? Ka’n păk ding chĕu am a ni? Hi thua hin chu ka’n păk thei lul naw chêu.
Sakramen kǐl dan ding
23 Ka thu hril sawng cheu hi Lalpaa inthoka ka dong a nih. Khânga inmantira a um zàn khan Lalpa Isun bei chu lâk a, lawmthu a hril zoin a khoi a, 24 “Hi hi ka taksa, in ta ding chu a nih, in mi hriet zingna sikin hieng ang hin thaw hlak ro” a ti kha. 25 Chuong ang bokin, bu an fàk khopin no chu a lâk a, “Hi no hi ka thisena thuthlung thar chu a nih, in dawn po leh in mi hriet zingna sikin thaw hlak ro,” a ti kha. 26 Chu bei chu fa a, no chu in dawn zătin Lalpa hung nawk hmâ khat a thǐna chu in puong a nih.
27 Chuleiin, tu khomin mawi naw taka Lalpa bei hi fa a, no hi a dawn chun Lalpa taksa le thisen lakah maw a phur a nih. 28 Mi tinin mani inbi chieng seng unla, chu hnungah bei chu fain no chu dawn chau ro. 29 A fatu le dawntu chun Lalpa taksa a nih ti a pom si naw chun mani chungah rorêlna intlun dingin a fâkin a dawn a nih. 30 Hi lei hin nangni laia tam tak chu hrât loin in hrivoi a sie a, a thren chu an thi ta bok. 31 Mani inbi chieng hmasa ni inla chu, ro rĕlpêkin ei um naw ding bah. 32 Ro rĕlpêka ei um khomin khawvel mihai anga thiem naw changa ei um ve nawna dingin Lalpan a mi thunun hlak a nih.