2 Chun, ni ruk hnungin Isun Peter hai, Jakob hai le Johan hai chauh thruoiin tlâng insangah a fepui a, anni chauha an um lai chun a hmêl a hung danglam ta a. 3 Hnuoia puon sawptu tu khomin an sukvăr thei naw khop hiela vârin a silfen chu a hung văr tle sur el a. 4 An kuoma chun Elija le Mosie an hung inlăr a, Isu leh an inbiek a. 5 Peter chun Isu kuomah, “Rabi, hi taka um hi ei ta dingin a thra. Bawkte pathum khawng ei tiu, i ta dingin pakhat, Mosie ta dingin pakhat, Elija ta dingin pakhat” a ta. 6 An tri êm leiin hril ding mumal khom a hriet nawh. 7 Chun, sûm a hung zǐng a, anni chu a hung tuom a, sûma inthok chun rawl a hung suok a, “Hi hi ka Naupa Dittak chu a nih, ama thu ngai ro” tiin. 8 Chuongchun, an ngha vêl ruoi a, anni lai chun Isu chauh naw chu tu dang khom an hmu ta nawh.

9 Tlânga inthoka an hung thlăk lai chun, mithi laia inthoka Mihriem Naupa a tho nawk hma chun an thil hmuhai chu tu khom hril dêr lo dingin Isun thu a pêk a. 10 Chu thu chu lungrilah an vong zing a, ‘mithi laia tho nawk’ ti umzie chu iem ning a ta ti thu chu an hril tlâng hlak a.

11 Chun, anni chun, “Iengti ziea Dan zirtirtuhaiin ‘Elija a hung hmasa zet ding a nih’ an ti’m a na?” tiin Isu an indon a. 12 Ama chun, “Elija chu iengkim siem thra dingin a hung hmasa ding a ni hrim a nih. Chuong a ni si leh iengti ziea Mihriem Naupa hin thil tam tak tuor a ta, hnawlin a um bok ding a nih ti hi an ziek tlat am a na? 13 Sienkhom ka hril cheu hi, Elija chu a hung tah a, a chanchin an ziek ang ngei khan a chungah an nuom taphot an thaw ta kha” a ta

14 Zirtir danghai kuom an zuk tlung chun an vêlah mipui tam tak an hmu a, Dan zirtirtuhai leh an lo insêl a. 15 Isu hung an hmu chun an barakhai a, a hmuok dingin an tlan ta hum hum a. 16 An kuomah, “Hienghai le hin ieng thu am hrilin in lo insĕl leh?” a ta. 17 Mipui laia pakhat chun a don a, “Zirtirtu, ka naupa, ramhuoiin a man leia trong thei lo chu ka hung thruoi a. 18 A man pha leh a thè thlŭk hlak a, a chil huom dam a tla a, hâ a rawt a, a khong tlat hlak a. I zirtirhai hi hnot suok dingin ka ngĕn a, an thaw thei si naw a” a ta. 19 Ama chun, “Tu lai ruol thar, ringna tlasamhai, ieng chen am in kuomah um ka ta, ieng chen am ka ngai thei ding cheu a na? Naupang chu hung thruoi ro” a ta. 20 Chuongchun, an hung thruoi a. Ramhuoiin Isu a hmu char chun naupang chu a soisak ta nghal a, hnuoiah a thè thlŭk a, chil huom tla neng nungin an per chor chor a. 21 Isu chun a pa kuomah, “Hienga a umna hi ieng chen am an ta a?” tiin an don a. 22 A pa chun, “A naupang laia inthok a ni tah. Sukhlum tumin voi tam tak meia dam, tuia dam a pei ta hlak a. A thei hrâm chun mi lunginsiet la, mi thrangpui lul rawh” tiin a ngĕn a.

23 Isun a kuomah, “I thei chun i ti maw? A ringtu ta ding chun iengkim hi thaw thei vong a nih” a ta. 24 Naupang pa chun, “Ka ring ie. Ka ringhlàna hi mi hnèpêk rawh” tiin a khêk suok ta nghal a. 25 Mipui an hung tlăn khawm hut hut Isun a hmu chun ramhuoi tirdakum chu a hal a, “Nang ramhuoi, trong thei lo le nasêt, thu ka pêk che, a sûnga inthok khan hung suok la, lût nawk ta ngai naw rawh” a ta. 26 Ramhuoi chu a khêk rak a, a soisak hrep hnungin a hung suok a. Naupang chu thi ang dêrin a um a, mi tam tak lem chun “A thi tah a nih” an ti hiel a. 27 Nisienlakhom, Isun a kut a chel a, a kei tho a, a hung ngir suok el tah a. 28 Inah Isu a lut hnung chun a zirtirhaiin, “Iem a ta keinin kan hnot suok ve thei naw?” tiin a fâlin an indon a. 29 Ama chun, “Hieng thil hi chu trongtraina^a chauh naw chun hnot suok thei a ni nawh” a ta.

30 Chu taka inthok chun an fe suok a, Galili ram a fe thleng a, chu chu tu hriet khom Isun a nuom nawh, 31 a zirtirhai chu thil a zirtir lai a ni leiin. Chuongchun an kuomah, “Mihriem Naupa hi mihriemhai kuta inmantir ning a ta, sukhlum an ta, a ni thum niah tho nawk a tih” a ta. 32 Amiruokchu, anni chun a thu hril umzie chu an hriet naw a, ama hlak an indon chieng ngam bok si nawh.

33 Kapernaum an hung tlung a. In an lut chun, “Lampuia in insèlna kha ieng thu am an ta le?” tiin a’n don tawl a. 34 Lampuia chun “Eini lai tu am ropui tak a ta?” ti thua insêl an ni leiin an to ta chip a. 35 Isu chu a’n thrung a, sawmpahnihai chu a ko khawm a, an kuomah, “Tu khom a hmasa tak ni nuom chu a nuhnung takah um a ta, mi po po rongbawltuah a um ding a nih” a ta. 36 Naupangte a hung kei a, anni lai a’n ngirtir a, a kuo a, 37 “Tu khom ka hming leia hieng ang naupangte pakhat khom lawmtu chun kei a mi lawm a na, tu khom kei mi lawmtu chun kei a mi lawm ni loin a mi tirtu a lawm a ni lem” a ta.

38 Johan chun a kuomah, “Zirtirtu, tuin amanih i hmingin ramhuoihai a hnot suok kan hmu a, keini a zuitu che lai a thrang ve naw leiin thaw ta lo dingin kan hril el a nih” a ta. 39 Isu ruok chun, “Khap naw ro, tu khom ka hminga thilmak thaw sia mi hrilse zui nghal el thei an um nawh. 40 Tu khom a mi kaltu ni lo chu eini tienga thrang a nih. 41 Thu dik ka hril cheu hi, Krista mi in ni leia dawn ding tuisik no khat khom ka hminga petu cheu taphot chun a lawmman ding chu chân naw top a tih.

42 “Tu khom a mi ringtu laia a chîn tak khom sukthlutu chu a rîngah bu rawtna lung lien tak inhlitirin tuifinrietah thlâk ni sien a ta dingin thra lem a tih. 43 I kutin suol a’n thawtir che chun tan el rawh, kut khing bûla hringnaa lut chu i ta dingin a thra lem, kut pahni neia Gehena mei rêm thei loa fe nêkin. 44 Chu taka chun pânna inlung a thi thei naw a, mei khom a rêm ngai bok nawh. 45 Chun, i kein suol a’n thawtir che chun tan el rawh, ke khing bûla hringnaa lŭt i ta dingin a thra lem, ke pahni neia Gehena mei rêm thei loa lŭt nêk chun. 46 Chu hmuna chun pânna inlung a thi ta ngai naw a, mei khom a rêm ta ngai bok nawh. 47 I mit khomin suol a’n thawtir che chun khel dok el rawh, mit khing khat neia Pathien rama lut i ta dingin a thra lem, mit khing hni nei a Gehenaa peia um nêk chun. 48 Chu hmuna chun pânna inlung a thi ta ngai naw a, mei khom a rêm ta ngai bok nawh.^b 49 Mi tin chu mei machia sukthienghlim^c an ni ding a ni si a. 50 Machi hi a thra a, sienkhom a alna da ta sien, iengtin am suk-al nawk in ta? Nangniah machi nei un la, inngei diel dielin um ro” a ta.