4
1 Ka hril chu hang sunzom pei lang. Rohluotu naupang chu ro po po khâwmtu ding ni sien khom naupang a la ni sŭng chu bawi ang ela chei a ni hlak a,2 a pa hun tiem a tlung hma chu enkoltu hnuoiah a um hlak.3 Eini khom chuong ang chu ei ni ve. Naupang ei ni lai khan khawvel le thilsiemhai umphung inchuktirna pipu thurachia hnuoiah ei intăng a.4 Sienkhom, a hun bituk a hung kim meu chun Pathienin a Naupa a hung tir a, nuhmei sula inthokin Dan hnuoiah a hung pieng a,5 nau nîna kima a mi hlàngkai theina dingin Dan hnuoia umhai chu a mi’n tlan suok a.6 Chuongchun, nau in ni tah leiin Pathienin a Naupa Thlarau chu ei lungrilah a hung inchĕngtir a, chu Thlarau chun “Abba, Pa” tiin a ko hlak a nih.7 Chuongchun, Pathien zârin bawi ni ta loin nau in ni tah a, nau in ni leiin rohluotu in nih.
Galati mihai Paulan a’n fŭi
8 Kha hma khan Pathien in la hriet ngai naw a, chuleiin an pienphung hrima khom pathien ni dêr lohai bawiah in intâng hlak kha. 9 Tuhin chu Pathien in hung hriet tah a, an naw leh Pathien hriet in hung ni tah a, ieng leia zirtirna châu le hmangna bo tienga kir nawk in tum hrim hrim am a na? Chuong thilhai bawia intâng nawk chu in nuom a ni? 10 Ni poimaw bik, thla poimaw bik, hun poimaw bik le kum poimaw bik neiin in inser nawk ta hi! 11 In chungah thâ sĕng thlawn ka’n lău a nih.
12 Unauhai, keima anga um dingin ka ngĕn chêu a, kei khom nangni angin ka um a, ka poi ieng khom in tawk nawh. 13 In kuoma Chanchin Thra ka hung hril hmasa tak khan ka damnaw lei a nih ti in hriet a. 14 Khâng khop khan ka taksa buoipui ngaiin um sien khom, mi hmusit le mi chêksol loin, Pathien vantirko le Isu Krista hung ang elin in mi lo lawm a. 15 Thei ni sien chu in mithai khel suoka mi pêk hiel khom in inhuom ti ka hriet. Khâng lăwma mi lăwm chêu kha, tu hin iem inchang an ta le? 16 In kuoma thu dik ka hril leiin hmêlmaah in mi en am an ta?
17 Mi dodâltuhai hin a thra tieng zawnga hung ngaisak chêu an ni naw a, anni tieng thrahnem in ngai an nuom leia lăk hran chêu an tum a nih. 18 A san thra uma thrahnemngai hi a thra ĕm êm a, chu chu in kuoma ka um lai chauh khom ni loa in thaw rop ka ditpui chêu. 19 Ka nau dittakhai, Krista angna in nei hmâ khat chu nau hase invoiin ka’n voi nawk chêu a ni hi. 20 Nangni lai uma ka râwl kí hang thlâk danglam met ka nuom ngei, ka lu in sukhâi hle si a.
Hagar le Sari
21 Dan hnuoia um nuomhai, danin iem a hril ti in hriet naw maw? 22 ‘Abraham chun naupa pahni a nei a, pakhat chu bawinu nau a na, pakhat chu thaipui nau a nih’ ti a’n ziek kha. 23 Bawinu nau chu mihriem pieng dan pangngaia hung pieng a na; thaipui nau ruok chu thutiem leia hung pieng a nih. 24 Hieng hi tekhinna anga ei hril a nih; chuong nu pahnihai chu thuthlung pahni inentirna an ni a, pakhat chu Sinai tlanga inthoka suok Hagar a na, a nauhai chu bawi an nih. 25 Hagar chu Arabia rama Sinai tlangb inentirna a na, tu lai Jerusalem leh ang khat an nih, a sûnga chênghai leh bawi an ni tawl si a. 26 Chung tieng Jerusalem ruok chu bawi a ni ve naw a, chu chu eini thlatu nu hi a nih:
27 Nang ching, nau nei lo, hlim la,
Nang nauhase tuor ngai lo nu,
Hlim takin khêk suok rawh;
Pasal nei nêkin nu ching chun,
ti ziek a ni si a.
28 Chuongchun, unauhai, Isak ang boka thutiem nauhai in nih. 29 Mihriem pieng dan pangngai anga piengin Thlarau thilthawtheinaa pieng chu a sukdùdà ang bok khan, tu khom hin a la ni ta pei a nih. 30 Lekha Thuah ieng tin am a’n ziek kha? “Bawinu chu a naupa leh hnot suok rawh, bawinu naupa chun thâipui naupa ro chu a hluopui ding a ni nawh” Gen 21:10-12c ti a ni kha. 31 Chuongchun, unauhai, bawinu nau ei ni naw a, thâipui nauhai ei ni lem.