Isak pieng thu
21
1 A hril tah angin LALPA chun Sari chu a kan a, a tiem tah angin a chungah a thawpek a. 2 Sari chun nau a pâi a, Pathienin a kuoma a hril hun taka chun tar hnungin Abraham chu naupa a neipĕk a. 3 Sari’n a neipĕk a naupa hmingah Abraham chun ‘Isak’ a sak a. 4 A naupa Isak chu ni riet a tling charin, Pathienin thu a pĕk angin, a ser a tanpĕk a. 5 A naupa Isak a pieng chun Abraham chu kum zaa upa a ni tah.6 Sari chun, “Pathienin a mi suknui a, hi thu hre taphot chun mi’n nuipui veng an tih” a ta. 7 A hril pei a, “‘Sari’n a nau nene la pe’ng a tih’ ti tuin am Abraham kuomah an hril telul ding? Sienkhom a tar hnungin nau pasal ka neipĕk ta hi!” a ta.
8 Naute chu a hung inthrang lien a, nene nêk an inbàntir ni chun Abrahamin ruoi ropui tak a thre a. 9 Aigupta mi Hagar naupa, Abraham ta dinga a neipek chun a nuisaw lai chu Sari’n a hmu a, 10 Abraham kuomah, “Hi bawinu le a naupa hi hnot suok rawh; hi bawinu naupa hin ka naupa ro hluopui thei naw nih” a ta.
11 A naupa chungchang thu chun Abraham chu nasa takin a sukbeidong a. 12 Sienkhom, Pathienin, “Naupang chungthu le i bawinu chungthu hin i lung sukrim naw raw se. Sari ti ang ang chu zawm rawh, Isaka inthokin i thlahai chu sui a ni ding a ni si a. 13 Bawinu naupa khom hi hnam ropui takah siem ka tih, i thlaa mi a ni tlat leiin” a ta.
14 A tûk zingkar chun inhma takin Abraham chu a tho a, beipĕr le savun tuiŭm, tui thun sip chu Hagar a pêk a, a liengkoa chun a’n chuonpek a, naupang le chun a tir suok tah a. Chuongchun an fe a, Beersheba thlalĕra chun an invâk an invâk a. 15 Tuiŭma tui an dawn zo chun, naupang chu thing buk pakhat hnuoiah a sie a. 16 Iemani chena hla, thal kàp phăk vela chun a thrung chot a, lungrilin, “Ka naupa thi ding chu ka en ngam lul nawh” a ta, inhniek hlop hlopin a trap a.
17 Pathienin naupang trap ri chu a hriet a. Pathien vantirko chun vana inthokin Hagar chu a zuk biek a, “Hagar, iem i chang an ta le? Tri naw, saw taka naupang zăl trap chu Pathienin a hriet. 18 Tho la, naupang saw kei tho la, i kutin chel rawh, hnam ropui takin ka la siem ding a nih” a ta.
19 Chu phing leh Pathienin a mit a hongpek a, tuikul a hmu a, a va pan a, tuiŭma chun tui chu a thun sip a, naupang chu a’n dawntir a. 20 Pathienin naupang chu a umpui a, a hung seilien pei a, thlalĕrah umhmun a khuor a, thal kăp thiem mi a hung ni ta a. 21 Paran thlalĕra an um lai chun a nuin Aigupta mi nuhmeiah a’n neitir a.
Abraham le Abimelek thuthlung
22 Chuong lai chun Abimelek le a sipai hotu Fikol chun Abraham kuomah, “I thilthaw iengkimah Pathienin a umpui che a. 23 Kei le ka nauhai le ka thlahai chu thukhêla indawrpui dêr lo dingin tu hin Pathien hmaah inkhâm meuin thu mi tiem rawh. I chunga lunginsietna ka’n langtir ang bokin, mikhuol anga i chĕngna ram hi lunginsiet ve dingin thu intiemkam bok rawh” an ta.
24 Abraham chun, “Awleh, ka’n khăm” a ta. 25 Abimelek siehlawhaiin tuikul an pawnglăk leia a lungni nawna thu chu Abrahamin Abimelek kuomah a hril a. 26 Abimelek chun, “Chu chu tû thaw amanih ti ka hriet dĕr nawh. Hi thil hi a hmain i mi hril ngai si naw a, tu hi ka hriet voi khatna a nih” a ta.
27 Abraham chun beram le bawngchal a hung lak a, Abimelek kuomah a pêk a, an pahni chun thu an thlung ta a. 28 Abraham chun a beram ruol laia beramte, a lâ ngot pasari a sie hrang a. 29 Abimelek chun Abraham kuomah, “Beram te, a lâ ngot pasari a hrana i sie hi ieng lei am a na?” a ta. 30 Abraham chun, “Hi tuikul hi keima cho ngei a nih ti i mi hrietpuina dingin hieng beram te, a lâ ngot pasarihai hi ka kuta inthokin i lâk ding a nih” a ta. 31 Chu thil lei chun chu hmun chu Beer-sheba an inbŭk a nih, an pahniin chu hmuna chun inkhâma thu an thlung leiin.