2 Ngai ta u, kei Paula ngei hin ka hril chêu hi, ser in intantir chun Krista chu in hlawkpui dĕr nawh tǐna a nih. 3 Sertan taphot kuomah hi hi ka hril nuom: an tan a ni chun Danin a phŭt taphot khom thaw ve láw làw raw hai se. 4 Dan zawm leia thiemchang tumtuhai, Krista kuoma inthokin in intan fithla tah a, lunginsietna chu in tlŭksan tah a nih. 5 Keini ruok chun Thlarau zăra ringna leia thiemchangna chu beiseiin kan nghăk si a. 6 Isu Kristaah ei um phot chun sertan amanih tan lo amanih a dang chuong nawh; hmangainaa inlang suok ringna hi a nih a poimaw tak.

7 Hma in sawn thrat vei leh a tuin am thutak tlŭksan dingin a lo zăwr hmang chêu a na? 8 Hi zâwr hmangna hi a kotu chêua inthok a ni nawh. 9 Chol tlawmtein bei hlŭm tlang lien tak khom a fang suok thei ti a ni kha. 10 Lalpa pakhata um tlàng ei ni leiin lungril dang in put hi kei chun ka la ring thei nawh. A chokbuoitu chêu chun, tu khom ni sien, hrem la tuor a tih. 11 Unauhai, kei hin sertan a trûl thu zirtir chêu dam chu ni lang, ieng leiin am mi sukdùdà zing hlak an ta? Chuong chu zirtir ni lang, kraws thu kan hril khom hi dodâl dĕr naw ni hai. 12 A chokbuoituhai chêu chun tan fithla law lawin mi tilrèah insiem hai sien ka va ti de!

13 Unauhai, nangni chu zalĕn dinga ko in ni a, in zalĕnna chu tisa chăkna suol thawna remchângah hmang naw unla, inhmangai tuoin rong inbawl tuo lem ro. 14 ‘Nangma i’n hmangai angin i vênghai khom hmangai rawh” ti thu kam khat hi in zawm chun Dan po po in zawm vong ning a nih. 15 Ran ang ela insechil le inhliem ton lo dingin fimkhur ro, chuong naw chun insukram tuo hlauh rawi in tih.

16 Chuleiin, ka hril chêu hi, thlarauah um unla, tisa chăkna suol chu suklawm da’l in tih. 17 Tisa nuomzawng chun thlarau tieng thil a kal tlat a, Thlarau hlakin tisa tieng thil a kal tlat bok a, an inkal ton tlat leiin in thaw nuom khom in thaw thei naw hlak a nih. 18 Thlarau thruoia in um ruok chun Dan hnuoia um in ni nawh. 19 Tisa mihai thaw hlak chu chieng takin inngaina suol hai, inthieng nawna hai, pawr taka chêtna hai, 20 milim biekna hai, dawithiemna hai, innghirnghona hai, inthîkna hai, lungturûk insuona hai, mani hmasielna hai, inngei nawna hai, pawl hranga inkei bingna hai, 21 inhnarna hai, zu rui chǐng hai, risiea inrui pawr chîng hai le chuong ang thil thaw hlak hai chu an nih. Chuong mihai chun Pathien ram hluo top naw ni hai ti ka hril ta chêu ang khan ka hril non nawk chêu a nih.

22 Thlarau ra ruok chu hmangaina dam, lawmna dam, inremna dam, dawtheina dam, ngilneina dam, thratna dam, ringumna dam, 23 zaidamna dam le insŭm theina hai dam hi a nih. Chuong ang kal zawng chu Dan a um nawh. 24 Isu Kristaa umhai chun tisa chăkna le nuomna hai an hemdè tah a nih. 25 Thlaraua hring ei ni ta chun Thlarau thruoi ang peiin um ei tiu. 26 Inngaihlu loin, incho tuo loin, inthîk tuo bok nawng ei tiu.