LALPAN Israel a hmangaizie
54
1 “Aw nang ching, nau nei ngai lo,Hlim takin hla sak rawh;
Nang, nau hase tuor ngai lo nu,
Hlim takin zai hla rem rawh.
Pasal nei nu nêk daiin,
Rausan nu chun nau a hau lem”
Tiin LALPA chun a hril.
2 I puon in hmun chu zauh la,
I puon in chu zâr lien la,
A keina hruihai suksei la,
A thlungphunhai hem det rawh.
3 I chang tieng le voi tiengah,
Hung indar zau pei i ta;
I thlahaiin hnam danghai,
La hung hnot suok pei an ta,
An rausan hnung khuoa hai,
Umhmun la khuor nawk an tih.
4 “Tri naw, muolpho naw ti nih,
Hmingsiet inlâu hrim hrim naw,
Hmaimăwkin um naw ti nih.
I tleirawl lai muolphona kha,
Theinghilin um ta’ng a ta,
I hmeithai hmaimăwkna khom,
Hre zing ta naw bok i tih.
5 I pasal chu nangma Siemtu,
A hming chu Iengkim LALPA,
I Tlantu chu Israel Mi Thienghlim,
Khawvel po po Pathien a nih.
6 Tleirawlte laia pasal nei,
Sienkhom hnawl le màka um,
Lungril beidong taka khawsa,
A pasalin a ko nawk ang elin,
Pathienin ko nawk a ti che.
7 “Sawtnawte ka mâksan che a,
Lunginsietna inthuk takin,
Ka ko nawk ding chè a nih.
8 Ka lungsen phulin sawtnawte,
I lakah hmêl ka thup a,
Sienkhom kumkhaw ngilneinain,
Ka lunginsiet ding chè a nih”
Tiin LALPA, i Tlantu’n a hril.
9 “Tuiin hnuoi chim pil ta lo dinga
Nova kuoma ka’n khàm ang khan,
I lakah ka lung sen ta naw ni a,
Zilhau ta bok naw ning cheng,
Tiin thu ka’n khàm a nih.
10 Tlanghai inhnîng dur durin,
Muolhai son hmang ni sien khom,
Ka ngilneina chu i lakah,
La hmang ta ngai nawng ka ta,
Ka remna thuthlunghai kha,
Sonin um ngai dèr naw nih”
Hmangaitu LALPAN a tih.
Jerusalem thar
11 “Aw, nang khawpui rimsi,
Tui fawn vor anga vor lèng,
Muongna hmu ngai lo, khawpui,
Indin thar nawk ka ti che.
Lung thra chiin rem ka ti che a,
I thrutah safir lung phûm ka tih.
12 I vĕngbŭkah rubi lung,
Kotkharah lunghlu tle chi,
Bangah lungmantam hmang ka tih.
13 In nauhai LALPAN zirtir a ta,
Nasa takin thlamuong an tih.
14 Felnain suknghet ka ti che a,
Nêksawrtu leh inhlat in ta,
Tri ding hrim nei naw ti nih.
Tritum la hmangpek ka ti che a,
I kawl hnaiah hung naw nih.
15 Bei ding chea hung inthok chu,
Ka thua hung ni naw ni a,
A beitu che taphothai chu,
I hmaah tlăwm vong an tih.
16 Ngai ta, thîrsŭ chu ka siem a na,
Pŭmah meihol zâp lingin,
Indona hriemhrei a ser a.
Hriemhrei suksetu ding khom,
Keima siem tawl tho an nih.
17 Nangma beina dinga siem,
Hriemhrei chu trangkai naw nih;
Nangma khingtu lei tinrêng khom,
Thiem naw inchangtir ka tih.
LALPA siehlawhai rochana,
Chu chu keiin ka ruot a na,
Thiem inchangtirtu ka nih,
Tiin LALPA chun a hril.