EFESI
Thuhma
Efesi mihai kuoma Tirko Paula lekhathon hi Baibul pumpuia bu 49-na, bung 6 le châng 155 a sei a na, Rom khuoa lung in a’n tang lai, A.D 60-62 vela a ziek ni dinga ngai a nih. Efesi hi Rom lalram opna hnuoia um Asia Minor thlang tienga longchawlna le sumdawngna hmun poimaw a ni bakah sorkar hmunpui a nih. Hi hmuna hin Paulan kohran a phun a, chu taka a hnunga Bishop chu Timothe a nih.
“A hun taka Kristaa hlen dinga Pathien thil rel lawk chu vana thil um le hnuoia thil um iengkim chu lu pakhat, Krista hnuoia hŭi khawm vong a nih” (1:10) ti hi Paula lekhaa a thupui tak chu a nih.
Pathien thiltum chu mihriemhai hi pumkhata an um a nih. Chu chu a hlawtling theina dingin, Isu Kristaa inpumkhat theina a hung um tah ang hin anni khom chuong ang chun um ve dingin a’n fui a. A lekha bul tieng inpumkhatna thu a hrilfie a. A Naupa Isu Krista hmangin a mi ni dinghai chu Pathienin a thlang a, an suolhai a ngaidam a, an suolna lakah sandamna a siempek a, zakhamna thlarau a pêk chun Pathien thutiem chu a sukhlawtling ngei ding a nizie a sukchieng a. Chuleiin, ringtuhai chu Krista le pumkhat an ni ta ang bokin ringtu dang leh pumkhata khawsa tlang dingin a’n fui a nih.
Ringtuhai hi pumkhat an nizie sukchiengna dingin tekhinthu pathum a hril a: (1) Kohran chu taksa ang a na, a lu chu Krista a nih. (2) In ang a ni bok a, Krista chu a’n nghatna lungphum a nih. (3) Nuhmei ang a na, Krista chu a pasal a nih. Kristaa Pathien lunginsietna ropuizie a hang puong suokna trongkam hin a hawl insâng hle a, iengkim hi Krista hmangaina, inpêkna, ngaidamna, zangaina le thienghlimna êngah an fawkkhawmtir vong a nih.
A sung thu tlangpui
Thuhma (1:1-2)
Krista le kohran (1:3-3:21)
Kristaa nun thar (4:1-6:20)
Tlangkawmna (5:21-24)