Ringna le Dan
3
1 Aw, Galati ram mi, mi invêthai, tuin am a dăwi vĕt chêu a na? Mita in hmu ve ang khopa chiengin Isu Krista an hemde thu chu in kuomah tar lang a ni kha! 2 Nangnia inthokin thil pakhat char hriet ka nuom: Thlarau in dong kha Dan in zawm lei am Chanchin Thra in hrieta in ring tâk lei? 3 Hieng lawm hin in lo invêt el a ni maw? Thlaraua tran ta siin tisa thilah in tawp el di’m a ni? 4 In thil tuor zozai kha iengmalo angin in tuor thlâwn el ding a ni? 5 Pathienin Thlarau a pĕk chêu le nangni laia thil mak a thawhai kha Dan in zăwm leia a thaw a ni, an naw leh in thu hriet chu in ring tăk lei?6 Abraham chun Pathien a ring a, thiemchanga pom a ni tah ti ang kha a ni lem. 7 Abraham nau indik takhai chu ringtuhai hi an nih ti hre ro. 8 Lekha Thu chun Jentelhai khom ringna leiin Pathienin thiem a la’n changtir ding a hmu lawk a, chuongchun Abraham kuomah, “Nangmaa chun hnam tin malsawmin um an tih” tiin Chanchin Thra chu a lo hril daih tah a nih. 9 Chuongchun, ringtu Abrahamin a ring anga ring ve taphotin malsawmna chu an dong tah a nih.
10 Dan zawm ringota innghathai chu trongsephur hnuoia um vong an nih; “Dan lekhabua chuong po po zawma an thaw vong naw chun trongsephur an nih” ti ziek a ni si a. 11 “Ringna leia thiem chang chu hring a tih” ti a ni si leiin, Dan zawm leiin tu khom Pathien hmaah thiem chang zo an um nawh ti a chieng. 12 Dan chun, “Thupêk zawm kimtu chu hring a tih” a ti chauh a, ringna a hril sà ve nawh. 13 ‘Thinga hemde chu trongsephur a nih” tia ziek a ni ang khan Krista chun ei ta dingin trongsie chu phurin Dan trongsiea inthok chun a mi san suok tah a. 14 Chuongchun, Pathienin Abraham mal a sawmna chu Jentelhai kuomah Kristaa chun a hung tlung tah a, Thlarau pĕk a tiem chu eini hin ringna leiin ei lo dong tah a nih.
Dan le thutiem
15 Unauhai, ni tina mihriem khawsak dan entirnaa hmangin hang hril inla. Mihriemin thuthlung ei namnghet tah chu thlàk amanih belsa thei a ni nawh. 16 Abraham le a chi thla kuoma chauh a nih Pathienin thu a tiem kha. Pathien Lekha thuin “chi thlahai” ti loin “i chi thla” a ti lem a ni kha, chu a chi thla chu Krista hi a nih. 17 Ka hril tum chu hi hi a nih: Kum zali le sawmthum hnunga Dan a hung um khan Pathien thuthlung chu a thriek chuong nawh, a thutiem khom a sukdanglam chuong bok nawh. 18 Dan leia rohluotu nǐna chang thei a ni chun Pathien thutiema inthlung ni thei naw nih; Pathienin rohluotu nǐna chu Abraham kuomah thu tiemin a pêk a ni kha.
19 Chuong a ni si chun Dan a pĕkna san chu iem ni tang a ta? Bawsietna hi ieng ang char am a nih ti suklangna dinga Abraham kuoma Chi Thlaa a tiem kha a hung inlang hma poa dinga vantirkohai hmanga palaib kuoma a pĕk a nih. 20 Sienkhom, palai chu mi pakhat nêka tam inkârah a ni hlak a, Pathien hlak chu pakhat chauh a ni si a.c
21 An leh, Dan chun Pathien thutiem a kal am a ni? Kal lo e! Mi sukhring thei Dan chu pĕk ni sien, thiemchangna chu Dan zawm lei ni ngei a tih. 22 Nisienlakhom, Isu Krista ringtu ni leia thutiem chu a ringtu taphot kuoma pĕk a ni theina dingin, khawvel pumpui hi suol thuhnuoia intâng tah a ni thu Pathien Lekha thuin a hril a nih.
23 Ringna thu a hung tlung hmâ khan chu Dan hnuoiah ei intăng a; ringna thu puong suoka a um hma chun a mi khuokhir tlat hlak. 24 Ringna leia thiemchang ei ni theina dinga Krista tienga mi kei thruoitu chu Dan a nih. 25 Tu ruok hin chu ringna thu a hung tlung tăk leiin Dan thu hnuoia kûn ei ni ta nawh.
Pathien nauhai
26 Krista Isu in ringna leiin in rêngin Pathien nauhai in ni tah. 27 Kristaa baptisma chang taphot chu Krista chun in inthuom tah a nih. 28 Juda le Jentel, bawi le bawi lo, pasal le nuhmei a um chuong ta naw a, Isu Kristaa chun in rêngin pumkhat in nih. 29 Krista mi in ni tah chun Abraham thlahai, thutiem anga rohluotu dinghai chu in nih.