Milim laka fimkhur ding
10
1 Unauhai, ei thlatuhai chunga thil tlunghai, sûmin a thruoi dan le an rênga tuipui an kăn danhai kha, in hriet naw ka nuom nawh. 2 Mosie hnuoiah an rêngin sûma le tuipuia baptis an ni kha. 3 An rêngin thlarau tieng bu thuhmun an fàk a, 4 thlarau tieng tui thuhmun, anni somtu thlarau lungpuia inthoka tui chu an dawn seng kha; chu lungpui chu Krista hi a nih. 5 Chuong sa khom chun anni laia mi tam tak chungah Pathien a lungni ta naw a, thlalĕrah an ruong a’n dar phung el kha.6 Thil suol thaw an chăk anga ei chăk ve nawna dingin khang thilhai kha eini mi kawkhmuna dinga tlung a lo nih. 7 Anni laia threnkhatin milim an biek ang khan be ve naw ro; Pathien Thu khomin, “Fa le dawn dingin mipui an inthrung a, hlimhlop chĕn dingin an tho nawk” a lo ti kha. 8 Inngaina suola anni laia threnkhat an tlŭk ang khan tlu ve naw ro, ni khat sŭngin mi singhni le sangthum zetin an thi pha hiel a ni kha. 9 Anni laia threnkhatin Lalpa an fie ang khan fie ve naw ro, rûlin a chuk hlum treuh a ni kha. 10 Anni laia threnkhat an chier ang khan chier ve naw ro, sukramtu vantirkoin a subohmang tawl a ni kha.
11 Hieng ang thil an lo tuokhai hi mi dang kawkhmuna ding a na; hun tawpa chêng einihai inveng theina dinga ziek a ni bok. 12 Chuongchun, ngir ngheta in inngai a ni khomin fimkhur ro, in tlŭk nawna dingin. 13 Fienaa in tuok hlak hi mi tuor băk a ni chuong nawh. Pathien chu a ringum a, in tuor thei bàka nasa fiena in tuok phal naw nih, in do zo theina dingin fiena in tuor pha tlàn suokna lampui siempêk lem a ti chêu.
14 Chuleiin, ka dittakhai, milim biek hi nghatsan ro. 15 Ningkhong hre phak chinhai hrilin ka hril chêu hi, ka hrilhai chĕu hi chîk takin ngaituo ro. 16 Malsawmna no la a, malsawmna ei hril hlak hi Krista thisen ei intrawmpuina a ni nawm a ni? Bei ei khoi hlak hi Krista taksa ei intrawmpuina a ni nawm a ni? 17 Bei chu tlang khat a ni angin eini hi tam tak ni inla khom taksa pumkhat ei nih, bei tlang khata mi ei chang seng si a.
18 Israelhai kha ngaituo ta u: hlanbiekna sa fatuhai chun maicham rongbawlna leh inzomna an nei naw am a ni? 19 Hi thua hin iem hril ka tum a na? Milim kuoma thil an inhlàn chun hlutna a nei ti le milim khom chun tlâktlăina a nei ka tìna a ni? 20 Ni teu lo e, ringnawtuhai inthawina chu Pathien kuomah ni loin ramhuoi kuomah a ni lem ti thu ka hril a nih. Nangni ruok chun ramhuoi leh inzawlna in nei thra ka ti nawh. 21 Lalpa no le ramhuoi no dawn kop thei naw ti niu; Lalpa zanbu le ramhuoi zanbu kîl kop thei bok naw ti niu. 22 Lalpa thǐkthu choktho ei tum am a ni? Ama nêkin ei hrat lem am a ni?
Iengkim Pathien ropuina dinga thaw
23 “Iengkim thaw a thieng” an ti hlak a, sienkhom iengkim thaw hi a thra kher nawh. “Iengkim thaw a thieng” an ta, sienkhom iengkim thawin mi a siem thra kher nawh. 24 Tu khomin mani thratna ding nêkin mi dang thratna ding zong lem raw se.
25 Sa dawra an zor a ni phot chun indon buoi loin fa el ro, 26 hnuoi le a sûnga um po po hi Lalpa ta a ni si a. 27 Ringnawtuin bu fa dinga an fiel chêua in fe nuom si chun an pĕk taphot chêu chu indon buoi sésè loin fa el ro. 28 Amiruokchu, tuin amani, “Hi chu inthawina thil a nih” tia an hril chêu ruok chun a hriltu chĕu lei le sie le thra hrietna leiin fa naw ro. 29 Chu chun in sie le thra hrietna thu ka hril naw a, a hriltu cheu sie le thra hrietna thu ka hril lem a nih. An leh, ka zalenna chu mi dang ngaidanin a khuokhir dim a ni? 30 Lawm taka ka făk a, Pathien kuomah lawmthu ka hrilna thuah ieng leiin am hrilsiet ka hlaw ding?
31 Chuongchun, in făk khomin in dawn khomin, iengkim in thaw taphot chu Pathien ropuina ding chauin thaw vong ro. 32 Judahai, Grikhai, Pathien kohranhai tu el khom tlŭk phăna dingin um naw ro. 33 Kei khomin mani hlawkna nĕkin mi tam tak thratna ding ka zong lem a, sandam an ni theina dingin kong tinrêngah mi tin suklawm ka tum hlak hi.