4 Thilpêk chi tum tum a um a, sienkhom Thlarau chu pakhat a nih. 5 Rongbawlna chi tum tum a um a, sienkhom Lalpa chu pakhat a nih. 6 Thil thaw thei dan chi tum tum a um a, mi tin kuoma thawtheina petu Pathien ruok chu pakhat a nih. 7 Ei rênga thrat tlăngna dingin mi tinin Thlarau thuomna ei dong a. 8 Threnkhat kuomah Thlarau zăra var taka thu hril theina a pêk a; chu Thlarau bok chun mi dang kuomah thu hre taka hril theina a pêk a; 9 a thren kuomah chu Thlarau bok chun ringna a pêk a; chu Thlarau thuhmun vêk chun mi dang kuomah sukdam theina a pêk a; 10 a thren kuomah thilmak thawtheina a pêk a; mi dang kuomah thu hril theina a pêk a; mi dang kuomah thlarau indik le indik naw hriet theina a pêk a; a thren kuomah trong hriet lo chi tum tum a pêk a; mi dang kuomah trong hriet lohai hrilfie theina a pêk bok. 11 Hieng po po hi Thlarau pakhat sinthaw vong a na, a dit ang takin mi tin kuomah thilpêk chi tum tum a pêk a nih.

12 Taksa hi pumkhat ni sienkhom bung tum tuma inthoka siem a na; bung hrang hrang inpengtuoin taksa pumkhat a siem ang hin Kristaa chun pumkhat ei nih. 13 Juda mi ei ni amanih, Grik mi ei ni amanih, bawi ei ni amanih ei ni naw amanih, ei rêngin pumkhata um dinga Thlarau pakhata baptis ei na, ei dawn dingin Thlarau pakhat pêkin ei um bok a nih.

14 Taksa hi bung khat chauh ni loin bung tam taka siem a ni lem a. 15 Ke hin “Kut ka ni naw leiin taksaah ka thrang nawh” ti ta sien, chu a ti lei chun taksaa thrang lo a ni chuong nawh. 16 Nakawr hin, “Kei chu mit ka ni naw leiin taksaah ka thrang nawh” ti sien, a ti lei chun taksaa thrang lo a ni chuong nawh. 17 Taksa pumpui hi mit ni ta vong sien, ieng tin am ri hre thei ei ta? Nakawr ni ta vong sien, ieng tin am rim ei hriet thei ding? 18 Pathienin taksaa bung tum tum hi trûl a tǐna taphotah a sie a nih. 19 An rêngin bung khat chauh ni ta sien, taksa a um thei ding am a ni? 20 Bung tum tum um sien khom taksa chu pumkhat a nih.

21 Chuleiin, mit hin kut kuomah, “Ka mamaw naw che” a ti thei nawh; lu khomin ke kuomah “Ka mamaw naw che” a ti thei bok nawh. 22 Chuong nêk hmanin, taksa bunga hrât naw lema inlanghai khom hi makmawin an poimaw a nih. 23 Ei taksa bunga hmusitum deua ei ngaihai chu ei chei nasa lem hlak a, ei bunga inzapuium deua inlanghai khom inzàum lemin ei cheibawl hlak. 24 Ei bung mawi lemhai chu chei khom a ngai nawh. Pathienin taksa hi a rem khawm a, hmusitum deuhai chu a chawimawi lem a, 25 chuongchun, taksaa hin inlâk hranna um loa bung tum tumhai hi lungruol taka an inngaisak tlâng theina dingin a chuktuo a nih. 26 Bung pakhatin a tuor chun bung dang po poin an tuor vong a, bung pakhat chawimawia a um chun bung dang po poin an lawm ve vong a nih.

27 Tuhin nangni hi Krista taksa chu in ni a, a bunghai in ni vong bok. 28 Pathienin a kohranah hieng mihai hi a sie a, pakhatnaah tirkohai, pahninaah zawlneihai, pathumnaah zirtirtuhai, a dotah thil mak thaw theihai, a nawkah sukdam theina neihai, mi thrangpui theituhai, rorêl thiemhai le trong hriet lo chi tum tum neihai. 29 An rêngin tirko an ni vong am a ni? An rêngin zawlnei an ni vong am a ni? An rêngin zirtirtu an ni vong am a ni? An rêngin thil mak an thaw thei vong am a ni? 30 Sukdam theina thilpêk an dong vong naw a, trong hriet loin an trong vong naw a, hrilfie theina an dong vong bok nawh.

31 Thlarau thilpĕk poimaw lemhai chu dong châk hle ro. Tu hin lampui thra tak chu hang kawkhmung ka ti chêu.