Mi dang suklawm
15
1 Eini a hrât lemhai hin mani lawmna zong loin a hrât naw lemhai hrat nawna chu dawthei lem ei tiu. 2 Mani tuolbawmhai thratna ding zonga suklawmin, dom sang tum seng ei tiu. 3 Krista khomin mani lawmna a zong si nawh. “Nangma dêusawtuhai chĕksolna chu ka chungah a tla tah” ti ziek ang khan a tuor ta lem a ni kha. 4 Kha hmaa inthoka Pathien Lekha Thua zieka lo um ta hrim hrim hai kha eini ta dinga inchûktir nei vong a ni a, tuorselna le phŭrna mi pe a, beiseina ei nei theina dinga ziek a nih. 5 Selna le phŭrna petu cheu Pathien chun, Krista Isu in zuinaah, thlarau hmun khat inputtir sien la chêu, 6 chuongchun, lungril hmun khat puta zai khata luongin, ei Lalpa Isu Krista Pa le Pathien chu inpâk tlăng thei in tih.Jentelhai ta dinga Chanchin Thra
7 Pathien ropuina dinga Krista’n a lawm chêu ang bok khan inlawm tuo ro. 8 Ka hril chêu hi, Pathien ringumzie sukchiengna dingin, thlatuhai kuoma a thutiemhai chu hlenin, Krista chu sertan Judahai rongbawltuah a hung um a nih. 9 Chu chu Jentelhai khomin a lunginsietna leia Pathien an chawimawi theina ding a nih,
“Hi lei hin Jentelhai lai
Inpâk ka ti che a;
I hming inpâkin hla sak ka tih” Sam 18:49
ti-a ziek ang khan.
10 Chun, hieng ang hin a lo ti bok:
“Aw Jentelhai,
Ama mihai le chun lawm ro.”
11 Hieng ang khom hin a lo ti a:
“Jentel po po hai,
Lalpa chu inpâk ro;
Ama mihai po po khomin,
Inpâk raw hai se.” Sam 117:1
12 Isai khomin hieng hin a lo hril a:
“Jesai zungzăm inchor suok a ta,
Jentelhai chungah inlal a ta,
Jentelhai chun amaah,
Beiseina la’n nghat an tih.” Isa 11:10
13 Thlarau Thienghlim thilthawtheina zăra beiseinaa in sip liem theina dingin, beiseina hnăr Pathien chun in ringna leiin lawmna le thlamuongna tinrêngin vûr raw se chêu.
Paula tirko nina
14 Ka unauhai, nangni rawi hi thratnaa sip, kong tinrênga varna hau le inzirtir tuo thei ding in nih ti ka ring tlat a. 15 Amiruokchu, thil threnkhat inhriet nontir ding cheuin hi lekha hi ka hung ziek a, Pathienin lunginsietna a mi pĕk zarin thil threnkhat lem chu ka ziek huoi hle a nih. 16 Jentelhai chu Thlarau Thienghlim sukthienghlima um a, Pathien lawm tlăka an inhlàn theina dingin, anni laia Chanchin Thra hril hi Krista Isuaa ka thiempu sin a nih. 17 Chuleiin, Krista Isua chun hienga Pathien rong ka bawl hi ka suong hlè a nih. 18 Pathien thu Jentelhai inawitir dinga Thlarau thrangpuina zara thu le thilthawhai, inchikna le thilmak thaw theinahai hmanga Kristan keimaa thil a thawhai chauh naw chu ieng khom hril ka tum nawh. 19 Jerusalema inthoka Illurikon le a sè vêl chen hmun tinah Krista Chanchin Thra ka hril vong tah. 20 Mi dang lungphŭm rem ta sa chunga ka rem nawna dingin, Krista hming an la lam ngai nawna hmun taphota Chanchin Thra puong dar hi ka thil tum a ni si a.
21 “A chanchin hrilna ngai lo mihai chun,
Ama chu la hmu’ng an ta;
La hre ngai nawtuhai chun,
La hung hrieng an tih” Isa 52:15
ti ziek ang khan.
22 Chu lei chun a nih, in kuoma ka hung ding ka thrul rop hlak chu.
Paulan Rom sir a tum
23 Tu ruok hin chu hieng lai biela hin ka ta dingin rongbawlna hmun a um ta naw băkah nangni hung kan chêu ka’n hăwkna hi kum tam a ni tah a; 24 Spain ram ka sir malamin hung sir chêu ka beisei a, nangni leh hun iemani chen hang inpawl hlim zet hnungah ka’n zin peinaa khom in mi thrangpui ka beisei bok a. 25 Tu ruok hin chu mi thienghlimhai rong bawl dingin Jerusalemah ka la fê phot ding a nih. 26 Makedonia le Akaia rama mihaiin phal takin Jerusalema mi thienghlimhai laia retheihai ta dingin thawlawm an thaw a. 27 Phal taka thaw an nia chu anni lakah bat an nei ve hrim a nih, Jentelhaiin an thlarau tieng thil an intrawmpui chun, khawvel tieng thila anni an somdawl ve thung chu an thaw âwm hrim a nih. 28 Chu chu thaw a, anni kuomah thawlawm ka’n hlàn fel zet hnungin Spain ram ka pan malamin hung sir ka ti chêu. 29 In kuoma ka hung pha chun Krista malsawmna tlămpui sip leh ka hung ding a nih ti ka hriet. 30 Unauhai, ei Lalpa Isu Krista le Thlarau Thienghlima in mi hmangaina chun Pathien kuomah mi trongtraipek ngat ngat dingin ka ngĕn chêu a nih. 31 Judai rama ring nawtuhai laka ka him theina ding dam, ka rongbawlna hi Jerusalema mi thienghlimhai ta dinga thil lawmum tak a ni theina ding dam, 32 Pathien remtia lungril hlim taka ka hung theina ding dam le ei insukhar tuo theina ding damin mi trongtraipek ro. 33 Remna Pathien chu in rênga kuomah um raw se. Amen.