Davida hnèna hla
Lalpa siehlaw Davidan
a hmêlmahai le Saula kuta inthoka
LALPAN a san suok nia hi
hla hi a’n sam a nih.
18
1 Aw LALPA, ka hmangai che,Nang chu ka hràtna i nih.
2 LALPA chu ka suonglungpui,
Ka kulpui le sanhimtu,
Ka Pathien, ka lungpui bĕl,
Ka phaw le ka kulpui nghet,
Mi humtu ki hrêua a nih;
3 Inpâk tlàk LALPA ka ko,
Hmêlma lakah a mi hum.
4 Thìna hruiin a mi awk,
Sietna tuiin a mi chìm,
5 Seol hruolin a mi vèt,
Ka hmasuon chu thìna châng.
6 Lungzingin, LALPA ka ko,
Pathien thrangpui ka ngên a,
A Tempul a’nthok a hriet,
Ka rawl ri’n a nâ a tlung.
7 Hnuoi inhnîngin a’n thin a,
Tlâng thruthai chen a’n hnîng a,
A lung a sen lei a nih.
8 A hnârah meikhu a suok,
A bauah kàng hmang thei mei,
Meichok a’n hlap suok puot puot.
9 Vàn kei kûrin a hung trum,
Sûm dum chungah a ngîr a.
10 Cherub chunga chun chuongin,
Thli chu thla zara hmangin,
Hrât takin a hung vuong a.
11 Tuomtuah thim a hmang a,
Sûm tui pai a’n zar khum a.
12 A hmaa var ropui chun,
Sûmhai chu a khaw tlang a,
Riel le mei a sûr chur chur.
13 LALPAN vàn riel a’n rûmtir,
Chunghnungtak rawl a thangkhawk.
14 Thalin hmelma a kâp dar,
Trêk a’n tlaktir dum dum a,
Hmêlma an tlansie dur dur.
15 Aw LALPA, hnâr hnît meua,
I hang hrawk tawl takzet chun,
Va truonghai inlang râwtin,
An hung kang zo ta vong a,
Hnuoi thruthai khom a’n lang tah.
16 Chung a’nthok mi zuk banin,
A kutin a mi chel a,
Li a’nthok a mi làk suok;
17 Hmêlma hràt le doral hrâng,
Ka cho ruol lo kut a’nthok,
A mi san suok tah a nih.
18 Siet tuok lai mi bei sien khom,
Mi santu LALPA a nih.
19 Hmun thawvengahb a mi’n nghat,
Ka chungah a lăwm leiin,
A mi san suok tah a nih.
20 Ka’n dikna phûin lawmman,
LALPAN a mi siempek a,
Ka kut a fai ang phûin,
Ama chun a mi rul hlak.
21 LALPA ditzawng ka vong a,
Pathien invâk hmangsanin,
A kal zawng ka thaw ngai nawh.
22 Ka hmaah a dàn ka sie,
A thu ka bawsiet ngai nawh.
23 A hmaa dem kai lo din,
Suol lakah ka’n thier fihlim.
24 Ka’n dikna ang phû peiin,
A mit hmuah poi ieng khom,
Ka tawk ve ngai naw leiin,
LALPAN lawmman a mi pèk.
25 Ringum lakah i ringum,
Mi fel lakah i fel fai,
26 Thienghlim lakah i thienghlim,
Mi kawi lakah i khir a,
27 Inngaitlawmhai i san a,
Meng sânghai i suktlawm hlak.
28 Aw LALPA, ka khawnvar hi,
I mi sit chokpek hlak a;
Ka Pathien chun ka’n thimna,
I mi sukvarpek hlak si.
29 I thrang chun râl nêr ka ta,
Ka Pathien zârin an kul,
Lawn kaiin lapêk ka tih.
30 Pathien lampui a thra kim,
LALPA thutiem a’n khêl nawh,
A bêltu di’n phâw a nih.
31 LALPA naw Pathien tu am,
Ei Pathien naw tu hrim am,
Lungpui bêl tlâk an um a?
32 Hrâtna thaa mi’n thuom a,
Ka lampui suktluongtu chu,
Pathien hi a ni si a.
33 Sazuk zaper anga hrât,
Zaper tha hrât mi pein,
Hmun sang lêrah him takin,
A mi’n tlattir hlak si a.
34 Ka kut râl do a’n thiemtir,
Dâr thalngul ka kuoi kŭr thei.
35 Sandamna phawc mi pein,
I kut changa mi chelin,
I’n phà hnuoina lei chauin,
Ropui ka hlaw phà hlak si.
36 Ka kal pên i suksei a,
Ka sir a’n tlêu bok si nawh.
37 Ka hmêlmahai ka hnot khêl,
Ka’n ram hma chun ka kîr nawh.
38 Ka vuok thlŭk tawl, an op song,
Ka bulah an inthal phung.
39 Râldo hrat di’n i mi’n thuom,
Ka râlhai ka ke bulah,
I’n bokkhuptir tawl si a.
40 Ka râlhai i mi’n hnottir,
Hmêlmahai ka tukdol tah.
41 Santu koin an khêk chùl,
Tu khom hlak an um si nawh;
LALPA an ko, a don nawh.
42 Thli lên dar pilvut angin,
Anni chu ka rawt nawi a,
Kotthlêra chirhak angin,
Ka peihawn tawl tah a nih.
43 Mihai lakah mi humin,
Hnamhai lu-ah i mi siem,
Ka hriet ngai lo hnam chen khom,
Ka khuo le tui an ni tah.
44 Ka thu hrea zâwm nghâlin,
Bokkhupin ram dang mihai,
Ka hmaah an hung kŭn a,
45 An lungril a zâm vong a,
Kul a’nthok inthin pumin,
An hung suok ta thrăm thrâm a.
46 LALPA chu a hring zing ie!
Ka Lungpui chu inpâk ro!
Ka Sandamtu Pathien chun,
Chawimawina chu chang raw se.
47 Phuba lapektu Pathien,
Ka hnuoia hnamhai sietu,
48 Hmêlma laka mi humtû,
Ka hmêlmahai chunga chun,
Nangman i mi hlangkai a,
Mi nunrawnghai laka chun
Nangin i mi san suok tah.
49 Chuleiin, hnam tin lai hin,
LALPA i hming chawimawiin,
I’n pâkna hla sak ka tih.
50 A lal chu hnèna ropui,
Ama chun a’n changtir a,
A hmangaina chuoi lo chu,
A hriek nàl Davida le
A suon le parhai chungah,
Kumkhuon inlangtir a tih.