Unau soisĕl naw rawh
14
1 Ringnaa mi hrât naw chu a ngaidan sêl kher loin lawm lût el ro. 2 Mi pakhatin iengkim fak thiengin a ring a, mi hrât naw ruok chun thlai chauh a fâk a. 3 Iengkim fatu chun a fa ve nawtu chu hmusit naw sien, a fa nawtu khomin a fatû chu soisêl bok naw raw se, Pathienin ama chu a pom ve tho si leiin. 4 Mi dang siehlaw lo soisĕltu chu tu am i ni leh? A ngîr amanih a tlŭk amanih chu a pu thu annawm. Ngîr a tih, Lalpa chun a’n ngìrtir thei si a.5 Mi pakhatin ni khat hi ni dang nĕkin a ngaihlu bìk a, mi dangin ni po po inang vongin a ngai thung a. Mi tinin mani ngaidan chiengkuong tak nei ding a nih. 6 Ni pakhat inser bîktu chun Lalpa chawimawina dingin a’n ser a nih; iengkim fatu chun Pathien kuoma lawmthu hrila fâ a ni leiin Pathien a chawimawi a nih. Fak tienga insûm mi khomin Pathien kuomah lawmthu a hril tho leiin Lalpa chawimawina dinga a thaw a nih. 7 Tu khom mani ta dinga hring ei ni naw a, tu khom mani ta dinga thi ei ni bok nawh. 8 Ei hring leh Lalpa ta dinga hring ei na, ei thi khomin Lalpa ta dinga thi ei nih. Chuleiin, ei hring khomin, ei thi khomin, Lalpa ta ei nih.
9 Hi lei tak hin, a dam lai le a thi tahai Lalpa a ni theina dingin Krista chu a thi a, a hring nawk tah a nih. 10 Chuong a ni si chun, ieng dinga nangin i unau i soisĕl am a na? Ieng leia i unau chu i hmusit? Pathien rorêlna lalthrungpha hmaah ei la ngîr vong ding a ni si a.
11 “‘Hring zing chu ka ni leiin,
Mi tin ka hmaah kûn an ta,
Lei tinrêng Pathien hmaah inpuong an tih’
ti ziek ang khan.
12 Chuongchun, ei rêngin Pathien hmaah mani chungthu seng ei la hril ding a nih.
Unau sukthlu naw rawh
13 Chuleiin, insoisĕl tuo hi bànsan ei ta, mani unau tlŭkna le lampui dăltua thrang tum ta naw seng bok ei tiu. 14 Lalpa Isua chun thil hrim hrim hi ama ngota inthieng lo ieng khom a um nawh ti ka hriet chieng. Sienkhom, thieng loa ngaitu ta ding chun thil thieng lo a ni el a nih. 15 I thil fâk leia i unau lungril a na chun hmangaina lampui i hraw ta nawh tǐna a nih. I thil fâkin i unau sietna intlun naw raw se, a ta dingin Krista a thi si a. 16 Thra in tizawng chu suol anga an hril hnăwm phal naw ro. 17 Pathien ram chu fak le dawn thil a ni si nawh; Thlarau Thienghlim zara thiemchangna dam, inremna dam le lawmna dâm a ni lem. 18 Chuong anga Krista rongbawltu taphot chu Pathien lawmzawng mi a ni a, mihriem inpâk khom a hlaw hlak.
19 Chuongchun, inremna le insuksawt tuona thilhai chu theitawpin hnot ei tiu. 20 I thil fâkin Pathien sinthaw sukse naw raw se. Thil iengkim făk a thieng a, sienkhom mi dang tlŭk theina făk ruok chu a thra nawh. 21 Sa fâk hai, uoiin dawn hai, i unau tlûk theina thil hrim hrim chu chǐng lo a thra. 22 Hieng thila i ring dan chu Pathien le in inkâr thuah sie rawh. Mani ring dan ang zawnga thawa lungrila inthiem nawna nei lo mi chu a hamthra. 23 Sienkhom, ringhla puma fatu chun thiem naw a chang zing tah a nih, a ring dan naw anga a thaw leiin. Iengkim hi ringnaa inthoka suok a ni naw chun suol a nih.