Jesai zungzam
11
1 Jesai zungzăma inthokin,A der hung indawn suok a ta,
Chu zunga inthoka Kâu chun,
Rà la hung insuong a tih.
2 LALPA thlarauin umpui a tih:
Varna le hriet thiemna thlarau,
Remruot thiemna le hratna thlarau,
Hrietna le LALPA trina thlarau chun.
3 LALPA trì-a a thu zawm chu,
A lung lawmna ni’ng a ta;
Mita a hmu angin rêl naw ni a,
Naa a hriet angin rêl bok naw nih.
4 Tlasamhai chu indik takin,
An chungthu rêlpêk a ta,
Hnuoia retheihai chungthu khom,
Hlei nei loin rêl a tih.
A thû, hmoltum chu hmangin,
Hnuoi hi a vuok ding a na;
A baua inthoka thuok chun,
Mi suolhai mût hlum a tih.
5 Felna chu kâwngchŭn a ta,
Ringumna kâwngzem a tih.
6 Satené le beramte hai chu,
Huong khatah chêng tlăng an ta,
Keite le kèl bok tlâng an ta,
Bawngte le sakeibakneite khom,
Tla khawm diel diel tang an ta,
Naupangten thruoi dul dul a tih.
7 Bawngpui le savom tla khawmin,
An tehai khom bok tlâng an ta,
Sakeibaknei chun bawng angin,
Bupawl fa ve tang a tih.
8 Chongkor buzawl bula chun,
Nautehai inhnel tang an ta,
Rûlngân bû khom naupangtehan,
Nuom nuomin pur tang an tih.
9 Ka tlâng thienghlimah tu khom,
Insukna ta naw ni hai a,
Insuksiet um ta bok naw nih.
Tuipui chu tuia a sip angin,
LALPA an hrietna chun hnuoi hi,
A sip ta ding a ni si a.
10 Chu ni chun Jesai Zungzăm chu hnam tin pholêngah ngir a ta, a velah hnam tin hung fuon khawm an ta, a chawlna hmun chu ropui a tih. 11 Chu ni chun Asuria rama dam, Aigupta chuonhnuoi le chuonchunga dam, Ethiopia rama dam, Elam rama dam, Babulon rama dam, Hamath rama dam le tuifinriet thlierkar hrang hranga Israel mi thi bâng, hlaa la umhai chu thruoi kir dingin a voi hninaah LALPAN a kut phar nawk a tih.
12 Hnam tin puonzar khai a ta,
Israel tlân darhai khawm a ta,
Hnuoi kil tina inthokin,
Juda tlân darhai khawm a tih.
13 Efraim thikthu rè tang a ta,
Juda dotuhai bo tang an ta,
Efraim-in Juda thîk ta naw ni a,
Juda’n Efraim theida ta naw nih.
14 An thlanga um Filistinhai chu,
Fe thlain zu do hron an ta,
Sak tieng hang rok tlâng an ta,
Edom le Moab chungah kut thlakin,
Sie khaw-ah Amonhai siem an tih.
15 Aigupta kaia litengsawlhai chu,
LALPAN inkangtir vong a ta,
A kutin thli lum huom huom chu,
Eufretis vadungah tir a ta,
Vadungte pasariin luong dar a ta,
Mihan ke hu loin pal kài an tih.
16 Israelhan Aigupta an suoksana,
Lam hraw ding an nei ang khan,
Hlaa um a mihai kǐrna dingin,
Asuria rama inthokin,
Lamlien la um rung a tih.