Mi mal chibai bûkna
16
1 Ei farnu Foibi, Kenkiriei kohrana rongbawltu hi inhmĕlhriettir chêu ka nuom a. 2 Ama hi mi thienghlimhai thaw hlak ang hrima Lalpa hminga lo lawm ding le thrangpui a ngaina taphota thrangpui dingin ka ngĕn chêu a nih. Ama hi mi tam tak thrangpui hlaktu a ni a, kei ngei khom a mi thrangpui a nih.3 Prisila le Akuila, Krista Isua ka rongbawlpuihai kha chibai ka bûk. 4 Ka ta dingin thi an inhuom a; kei chauh ni loin Jentel kohranhai po po khom anni chungah an lawm a nih. 5 An ina kohran inkhawmhai kha chibai ka bûk. Ka dit tak Epaineta, Asia biela ringtu hmasa tak kha chibai ka bûk.
6 Mari, in ta dinga inrim taka thok hlak kha, chibai ka bûk.
7 Andronika le Junia, ka chipui le lung ina kan tăngpuihai kha, chibai ka bûk. Anni kha tirkohai laia hmingthang tak an ni a, kei nĕk khoma Krista ring hmasatu an nih.
8 Ampliata, Lalpaa ka dit tak kha chibai ka bûk.
9 Kristaa ka rongbawlpui Urbana le ka ruol dittak Staki hai kha chibai ka bûk.
10 Kristaa mi tak, Apelia kha chibai ka bûk. Aristobul sŭnghai kha chibai ka bûk bok.
11 Ka chipui Herodian kha chibai ka bûk. Narkisa sŭnghai laia mi Lalpaa umhai kha chibai ka bûk.
12 Trifeni le Trifosi, Lalpa sin inrim taka thawtu nupuihai kha chibai ka bûk. Dittak Persi, Lalpa ta dinga inrim taka thoktu kha chibai ka bûk.
13 Lalpa rongbawlna sina mi langsar Rufa le a nu, ka nu ve tho hai kha, chibai ka bûk.
14 Asunkrita hai, Flegona hai, Hermia hai, Patroba hai, Herma hai le an kuoma um unauhai le khan chibai ka bûk.
15 Filologo le Juli leh, Nire le a farnu Olimpi le an kuoma mi thienghlim um po po hai chibai ka bûk.
16 Fawp thienghlimin in chibai tuo unla, Krista kohranhai hin chibai kan bûk bok chêu a nih.
17 Unauhai, zirtirna thu in dong tahai kal zawnga nangni laia innghirnghona le intheidăna siemtuhai laka chun invêng fimkhur ding le anni chu nghatsan dingin ka ngĕn chêu a nih. 18 Chuong mihai chun ei Lalpa Krista rong bawl nêkin mani phǐngpui chauh an ngaituo hlak. An dang innălna le mi inpâk der an thiemna chun mi mawlhai an hlĕm hlak. 19 Chanchin Thraa in nghetzie mi tin hriet a ni a, chuleiin kei khom in chungah ka lawm a nih. Thil thra tieng var a, suol tienga in măwl ka dit a nih. 20 Remna Pathien chun Setan chu in ke hnuoiah insir detir vak a ti chêu. 21 Ka rongbawlpui Timothe le ka chipui Lukia hai, Jason hai, Sosipater hai hin chibai an bŭk chêu.
22 Kei Tertia, hi lekha ziektu hin Lalpa hmingin chibai ka bûk chĕu.
23 Ka tlungna pa, kohran inkhawmna lo dongtu Gaia hin chibai a bûk chĕu. Khaw sunga sum enkoltu Erasta le ei unaupa Kuarta khomin chibai an bŭk chêu.
24 Ei Lalpa Isu Krista lunginsietna chu in kuomah um raw se.
Trongtraia khărna
25 Tuhin, tiena inthoka thuril inthup puonga um, Isu Krista thu, ka Chanchin Thra hrila suknghet theitu chêu Pathien chu chawimawi ei tiu. 26 Chu thu inthup hlak chu, ziek ngeia zawlneihai lo hril lawk angin, puong suokin a hung um tah a, tu khomin ringa an awi theina dingin, chatuon Pathien thupêk angin hnam tin lai inhriettir a ni tah. 27 Ama chauh Pathien var um sun kuoma chun Isu Krista zarin chatuonin ropuina um raw se. Amen.