Isu le Nikodem inbiekna
3
1 Mi pakhat a hming Nikodem, Farisai pawla mi, Judahai Rorêlna Inpuia membar a um a. 2 Zànah Isu a hung pan a, a kuomah, “Zirtirtu, Pathiena inthoka hung Zirtirtu i nih ti kan hriet. Pathien umpuihai naw chun inchikna thilmak i thawhai ang hi tu khomin thaw thei naw ni hai” a ta.3 Isun, “Thudik tak ka hril chê hi, tu khom a piengthara naw chun Pathien ram hmu thei naw nih” a ta.
4 Nikodem chun, “Mi a upat hnungin ieng tin am pieng nawk thei a ta? Pieng nawk dingin a nu sŭlah voi hni a lût thei awm top si naw a!” a ta.
5 Isun, “Thudik tak ka hril che hi, tu khom tui le Thlaraua pieng a ni naw chun Pathien ramb lût thei naw nih. 6 Taksa chun taksa a hring a, Thlarau chun thlarau a hring. 7 I piengthar ding a nih ka ti hi makti naw rawh. 8 Thli chu a nuomna tieng tieng a hrâng a, a ri i hriet a, sienkhom khaw laia inthoka hung am ti le khaw lai am a fe ding ti ruok chu i hril thei nawh. Tu khom Thlaraua pieng taphot chu chuong ang chu an nih” a ta.
9 Nikodem chun, “Chu chu iengtin am ni thei a ta?” a ta. 10 Isun, “Israelhai zirtirtu i ni a, chuong chu i hriet nawa maw? 11 Thudik tak ka hril che hi, keinin kan hriet chu kan hril a, kan hmu chu kan inhriettir hlak a, sienkhom kan thu inhriettir chu in awi nuom si nawh. 12 Khawvel thil ka hril chêu hman in awi naw chun van thil hril lang chêu ieng tin am awi in ta? 13 Tu khom vànah an lawn ngai nawh, Mihriem Naupa, vàna inthoka hung chauh naw hi chu.
14 “Mosien thlalera rûl a khăi kăng ang bok khan Mihriem Naupa khom hi khăi kăngin a um ding a nih, 15 ama ring taphotin chatuon hringna an neina dingin. 16 “Pathienin khawvel a hmangai ĕm leiin a Naupa khat nei sun chu a pêk a, ama ring taphot chu bohmang loa chatuon hringna an nei lemna dingin. 17 Khawvel thiem naw inchangtir dingin Pathienin a Naupa khawvelah a hung tir naw a, ama hmanga khawvel sandam dingin a hung tir lem a nih.
18 Tu khom ama ringtu chun thiem naw a chang ngai naw a, a ring nawtu ruok chun thiem naw a chang tah zing a nih, Pathien Naupa nei sun hming chu a ring naw leiin. 19 Hi hi thiem naw changna chu a nih: var chu khawvelah a hung a, sienkhom mihaiin thil suol an thaw leiin var nêkin thim an thlang lem si. 20 Thil suol thaw taphotin var an theida a, an thilthaw inlang an inlau leiin varah an hung nawh. 21 Tu khom thil indik thawhai ruok chun an thilthaw chu Pathien leia an thaw a nih ti chieng taka inlangtir dingin varah an hung hlak” a ta.
Isu le Baptistu Johan
22 Chu hnung chun Isu chu a zirtirhai leh Judai ram tlangramah a fe a, chu taka chun a zirtirhai chu iemani chen a umpui a, baptisma a’n changtir a.
23 Johan khomin Salim khaw kawl Ainona chun tui a tam leiin a baptis a, mi tam tak baptisma chang dingin an hung a. 24 Chuong lai chun Johan chu lung inah an la khum si nawh.
25 Chun, Johan zirtirhai laia pakhat le Juda mi pakhat chu tuia Judahai inthien dan chungthuah an insĕl a. 26 Johan kuomah an fe a, “Zirtirtu, Jordan răla i kuoma um, a chanchin i hril khan tuhin a baptis ve a, mipuiin an pan huoi huoi a nih” tiin an va hril a. 27 Johan chun a don a, “Vana inthoka pĕk a ni naw chun tu khomin ieng khom an dong thei nawh. 28 ‘Keima hi Krista chu ka ni nawh, a hmaa hung dinga tir chauh ka nih’ ka ti kha nangni ngei ka thuhretu in ni kha. 29 Mo pasal chu moneitu a ni a, moneitu thrien, a thu lo ngaiven zingtu chun moneitu rawl a hrietin a hlim hlê hlak. Chuong ang chun kei khom ka lawm a kim tah. 30 Ama chu ropui tuol tuol ding a na, kei ruok chu chîn tiel tiel ding ka nih.
Vana inthoka hung trum
31 “Chung tienga inthoka hung trum chu mi po po nêka chunghnungtak a nih; hnuoia inthoka hung chu hnuoi mi a na, hnuoi thil a hril hlak. Vana inthoka hung chu iengkim chunga mi a nih. 32 A hmu le a hriethai a hril a, sienkhom a thu inhriettir chu tu khomin an pom si nawh. 33 A thu inhriettir pomtu chun Pathien chu a’n dik ngei ti suoi a namnghet a nih. 34 Pathien tir chun Pathien thu a hril hlak, Pathienin Thlarau chu tiem chin um loa a pĕk a ni si a.c 35 Pa chun Naupa a hmangai a, a kutah iengkim a sie tah. 36 Naupa ringtu taphot chun chatuon hringna a nei a; Naupa ring nawtu ruok chun hringna a nei naw a, Pathien lungsenna chu a chungah a fu zing a nih” a ta.