Beram inhmang tekhinthu
15
1 Trum khat chu a thu ngaithla dingin sienkhontuhai le mi suol tam takin Isu an hung pan a. 2 Farisaihai le Dan zirtirtuhai ruok chun, “Hi pa hin mi suol a pâwl a, bu dam a fakpui tawla” tiin a chungah an chier a.3 Ama chun an kuomah hi tekhin thu hi a hril a: 4 “Nangni lai tuin amanih beram za neiin anni laia pakhat bo ta sien, sawmkuo pakuohai chu phŭlah maksanin a’n hmang chu a hmu hma khat tuin am zong nawng a ta? 5 A hmu nawk chuan lawm takin a liengkoah put a ta, 6 a in a tlung chun a ruolhai le a tuolbawmhai ko khawm a ta, ‘Ka beram inhmang kha ka hmu nawk tah a, thaw ro, lawm ei tiu’ ting a tih. 7 Ka hril cheu hi, chuong ang chie chun sim ding chuong nei ta lo mi fel sawmkuo pakuohai chunga an lawmna nĕka nasain mi suol pakhat sim chungah vanah lawmna nasa lem a tih.
Duli inhmang tekhinthu
8 “Chun, nuhmei tu khomin duli sawm neiin pakhat inhmang ta sien, khawnvar insita a in phîtin, a hmu nawk hmâ khata zong lo tu’m an um ding? 9 A hmu nawk pha chun a ruolhai leh a tuolbawmhai ko khawm a ta, ‘Ka duli inhmang kha ka hmu nawk tah a, thaw ro, lawm ei tiu’ ting a tih. 10 Ka hril cheu hi, chuong ang bokin mi suol pakhat sim chungah Pathien vantirkohai nasa takin an lawm a nih” a ta.
Naupa tlăn hmang tekhinthu
11 Isun a hril pei a. “Mi pakhat hin naupa pahni a nei a. 12 A naupang lem chun a pa kuomah, ‘Pa, ka ro chan ding mi pe rawh’ a ta, chuongchun ro chu an kuomah a sem tah a. 13 Chu hnung sawt naw teah a naupang lem chun a chanpuol po chu a lâk a, ram hla takah a fe a, chu taka chun inhoi chĕnin a sukriral ta vong a. 14 A nei po po a khawral vong hnungin chu rama chun trămpui a tla a, fak ding a nei ta naw a. 15 Chuongchun, chu rama mi pakhat chu a bĕl a, ama chun vok bu pea sor dingin a lo tieng a tir a. 16 Vok bua an pĕk fanghra chun insukkhop ve tak a nuom a, tu khomin fak ding an pêk si nawh.
17 “Sienkhom a hung inhriet suok phing leh, ‘Ka pa ina inhlawfahai lai khom khan fak sĕng lo nei an tam vei leh, kei hlak chu hi taka hin phingtrâmin ka thi el ding a ni si a. 18 Tho ka ta, ka pa kuomah feng ka ta, ‘Pa, vana mi chunga le nangma chungah thil suol ka lo thaw a nih. 19 I naupaa inbûk tlăk khom ka ni ta naw a, i ina inhlawfa pakhat angin mi sor ve el rawh’ ting ka tih, a ta.
20 “Chuongchun a tho a, a pa kuom tieng a pan tah a. Hla taka a la um laiin a pa chun a lo hmu a, a lunginsiet êm êm a, a tlân a, a kuo a, a fawp ngăwi ngâwi a. 21 A naupa chun, ‘Pa, vana mi chunga le i chungah thil suol ka lo thaw a nih, i naupaa inbûk tlăk khom ka ni ta nawh’ a ta.
22 “A pa ruok chun a siehlawhai kuomah, ‘Zakuo thra tak kha hung la vat unla, inhâktir unla, kutsebi inbuntir unla, pheikhok khom inbuntir bok ro; 23 bawng tuoi thâu tak kha hung kei unla, that ro. A lawmna dingin ruoi thre’ng ei tiu. 24 Ka naupa hi a thi a, a hung hring nawk tah a; a’n hmang a, ei hmu nawk tah a ni hi” a ta. Chuongchun an lawm tran tah a.
25 “Chuong lai chun a naupa upa lem chu loah a um a. A hung inlawi chun, in a tlung tawmin rimawi le lăm ri a hriet a. 26 A siehlaw pakhat chu a koa, “Chu ri chu ieng ri am an ta leh?” tiin a’n don a. 27 Ama chun, ‘I sang a hung kǐr a, dam taka a hmu nawk leiin i pain bawng tuoi thau a that a nih’ a ta. 28 Chuongchun, a lung a sen ta hle a, inah chun a lût nuom ta naw a. 29 A pa chu a hung suok a, a va thlêm a. A naupa chun, ‘Ngai rawh, hieng chen hi suok sorin i mi sor a, i thupêk voi khat khom ka sêl ngai nawh. Sienkhom, ka ruolhai le kan insukhlimna ding kĕlté takngiel khom i mi pĕk ngai nawh. 30 Tuhin i naupa, nawchizorhai laia i sum thĕ ral vongtu hi a hung kǐr a, bawng tuoi thau tak el i lo thatpek nawk nghal si hi’ a ta. 31 “A pa chun, ‘Ka naupa, nang chu ka kuoma um zing i na, ka nei po po hi i ta annawm. 32 Hi i sangpa ruok hi chu a thi tah kha a hung hring nawk a, an hmang ta kha ei hmu nawk tah a ni hi; hlim taka lawm ding ei ni hrim a nih’ a ta” tiin.