Isu hmèl danglamna
17
1 Ni ruk hnunga chun Peter le Jakob le a unaupa Johan hai chu Isun a thruoi hrang a, anni rawi chauh chu tlâng insangah a fepui a. 2 An hmaa chun a hmêl inlang dan chu a hung danglam a, nisa angin a hung ĕng a, a silfenhai chu a hung vàr ta phŭt el a. 3 Chu zo char chun an hmaah Mosie le Elija an hung inlăr a, Isu leh an inbiek a. 4 Peter chun Isu kuomah, “Lalpa, hi taka ei um hi a thra. I remti chun bawkte pathum khawng ka ta, i ta ding pakhat, Mosie ta ding pakhat, Elija ta ding pakhat” a ta.5 A hril mek lai chun sûm vărin anni chu a hung tuom a, sûma inthok chun rawlin, “Hi hi ka Naupa Dittak, ka lawm bêk bêk chu a nih; ama thu ngai ro” a hung ta. 6 Zirtirhaiin chu chu an hrietin an tri hle a, hnuoi sikin an bokkhup a. 7 Nisienlakhom Isu a hung a, anni chu a hung them a, “Tho ro, tri naw ro” a ta. 8 An hang en chun Isu chauh naw chu tu dang khom an hmu ta nawh.
9 Tlanga inthoka an hung trum lai chun Isun an kuomah, “Mihriem Naupa hi mithi laia inthoka a tho nawk hmâ khat chu in thil hmu kha tu khom hril naw ro” tiin thu a pêk a. 10 Zirtirhai chun a kuomah, “Dan zirtirtuhaiin ieng leia ‘Elija a hung hmasa zet ding a nih’ an ti am ning a ta?” tiin an indon a. 11 Isun an kuomah, “Elija chu a hung ding hrim a nih, iengkim siem thrang a tih. 12 Nisienlakhom, ka hril chêu hi, Elija chu a hung tah a, sienkhom ama chu an lo hriet naw a, a chungah an nuom nuomin an lo thaw kha. Chuong ang bokin Mihriem Naupa khom hin an kut a tuor ve ding a nih” a ta. 13 Chuongchun, zirtirhai chun Baptistu Johan thu an kuomah a hril a nih ti an hriet tah a.
Naupang hringol invoi sukdam
14 Chun, mipui an zuk paw nawk chun mi pakhat hin Isu a hung pan a, a hmaah a dingthrathruon a. 15 “Lalpa, ka naupa saw lunginsiet rawh. Hringol invoi a na, a tuor nasa ta bêk bêk a; voi tam tak meiah a tlu tah a, voi tam tak tuiah a tla ta bok a. 16 I zirtirhai kuomah ka thruoi a, an sukdam thei si naw a” a ta.
17 Isun a don a, “Tu lai ruolthar, ringna tlasam le mi letlinghai, ieng chen am in kuomah um ka ta, ieng chen am ka ngai thei ding cheu a na? Naupang chu ka kuomah hung thruoi ro” a ta. 18 Isun ramhuoi chu a hal a, a sunga inthokin a hung suok a; chu darkara inthok chun naupang chu a dam tah a.
19 Zirtirhai chu Isu kuomah a fâlin an hung a, “Ieng leia keinin kan hnot suok ve thei naw?” tiin an indon a. 20 Isu chun, “Ringna in nei tlawm lei a nih. Thu dik ka hril chêu hi, ringna antram mu tiet in nei chun, hi tlang kuoma hin, ‘Hi taka inthok hin saw takah son inson rawh’ ting in ta, inson el a tih. Thaw thei naw hrim nei naw ti niu. 21 Chun, hieng ang thil hi trongtrai le bu nghei chauh naw chun hnot suok thei a ni nawh”b a ta.
Isun a thi ding thu a hril nawk
22 Galili ram an fang laiin Isun a zirtirhai kuomah, “Mihriem Naupa hi mihriemhai kutah inmantirin um a ta, sukhlum an ta, 23 ni thum niah keithoin a um ding a nih” a ta. Zirtirhai chu an lungngai ta êm êm a.
Tempul sie chawi thu
24 Isu le a zirtirhaiin Kapernaum an hung tlung chun tempul sie, mi pakhat peiah drakma hni khontuhai chu Peter kuomah an hung a, “In zirtirtu hin tempul sie a chawi ve hlak am?” an ta. 25 Ama chun, “Chawi hlak e” a ta. Inah Peter a hung inlawi chun Isun a lo biek hmasa a, “Simon, ieng tin am i ngai? Hnuoia lalhai hin sie chi hrang hranghai hi an nauhaia inthokin am, an naw leh mi dang laka inthok lemin a ni an khon hlak?” tiin a’n don a. 26 Peter chun, “Mi dang lakah” a ti phing leh Isun, “Chuong an leh, nauhai chun sie an awl a ni chu tie. 27 Nisienlakhom, nang dilah va fe la, ngakuoi inchie la, nga i man hmasa tak bau chu kei ka la, drakma li hu tangkac hmung i ta, chu chu hung la la, kei le nanga sie tlakna dingin anni chu pe rawh, chuong naw chun suklungawi naw hlauh rawi ei tih” a ta.