6 “Amiruokchu, hieng ringtuhai laia a chîn tak khom suol dinga zăwr thlutu chu a rîngah bu rawtna lung lien tak inhlitirin tuifinriet li mongah thlak ni sien, a ta dingin thra lem a tih. 7 Suola mihai intlûktirtu thilhai leiin khawvel chung hi a va rik de aw! Tlŭk châng a um ding hrim chu a nih, sienkhom tlûkna inumtirtu chung chu a rik. 8 I kutin amanih, i kein amanih a sukthlŭk che chun tan la, de hawn dai rawh; kut khing hni amanih ke khing hni amanih neia kumkhaw hremhmuna peia um nêk chun kut le ke bŭla hringnaa lŭt chu i ta dingin a thra lem. 9 I mitin a sukthlŭk chê chun khel dok la, de hawn dai rawh; mit khing hni neia hremhmun meia pei i ni nêk chun mit khing dela hringnaa lŭt chu i ta dingin a thra lem.

10 “Hieng mi chînhai laia pakhat khom hi hmusit lo dingin fimkhur ro; vana an vantirkohaiin ka Pa vana mi hmel an hmu zing hlak a nih ti ka hril cheu hi. 11 Bohmanghai sandam dingin Mihriem Naupa hi a hung a ni si a.^a

12 “Ieng tin am in ngai? Miin beram za nei sien, anni laia pakhat chu invâk hmang ta ang sien, sawmkuo le pakuohai chu tlângah maksanin beram inhmang chu a zong naw dim a ni? 13 Thu dik ka hril cheu hi, a hmu nawk hlauh chun sawmkuo le pakuo invâk hmang naw hai chunga nêkin beram pakhat chunga chun lawm lem a tih. 14 Chuong ang bokin, hieng mi chin té tèhai laia pakhat khom an inhmang chu in Pa vana mi ditzawng a ni nawh.

15 “I unauin i chungah thil suol a thaw chun, fe la, nangni pahni hrieta chauh a suolna chu hril rawh. A ngaithlak che chun i unaupa lungril chu i’n hmin tǐna a nih. 16 A ngaithlak naw che ruok chun mi dang pakhat amanih pahni amanih thruoi la, chuongchun, in thu po po chu hrepuitu pahni pathum baua inthoka suknghet ni thei a tih. 17 Chun, anni chu a ngaithlak nuom naw chun kohran kuomah intlun rawh; kohran chen khom a ngaithlak nuom naw rop chun ama chu Jentelhai le siekhontuhai angah sie rawh.

18 “Thu dik ka hril cheu hi, hnuoia ieng khom in phuor taphot chu vana khom phuor ning an ta, hnuoia ieng khom in sŭt taphot chu vana khom sŭt ning an tih. 19 Ka hril cheu hi, hnuoia hin nangni lai mi pahni inlungruola in hni taphot chu in Pa vana miin thawpêk a ti cheu. 20 Ka hminga mi pahni amanih pathum amanih an inkhawmna taphota chun anni lai ka um hlak si a” a ta.

21 Chuong lai chun Isu kuomah Peter a hung a, “Lalpa, ka unauin ka chungah thil suol thaw sien, voi ieng zat am ka ngaidam ding? Voi sari chen am a ni ding?” a ta. 22 Isun a kuomah “Voi sari chen ka ti naw che, voi sari voi sawmsari chenin ka ti lem che a nih.

23 “Chuleiin, van ram chu laltak tu amanih, a siehlawhai sum bat ching fel tum leh chun hrilkhi a nih. 24 An thu a ngaituo tran chun mi pakhat, talen singkhat^b bat chu a kuomah an hung thruoi a. 25 A rulna ding a nei naw leiin a nuhmei, a nauhai le a nei po po zor fai vonga rul dingin a pu chun thu a pêk a. 26 Chuongchun, siehlaw chun hnuoi sikin chibai a buk a, “Mi la ngai hrâm la, a rêngin la rul vong ka ti che” a ta. 27 Chu siehlaw chu a pu chun a lunginsiet a, a bat chu a ngaidam a, a’n thla suok tah a. 28 Nisienlakhom, chu siehlaw chu a fe suok a, a siehlaw chanpui laia pakhat denari zakhat^c bat chu a va hmu a, a man a, a rîngah a rêk a, ‘I bat kha mi pe rawh’ a ta. 29 A siehlaw chanpui chun a hmaah dingthrathruonin, ‘Mi la ngai hrâm la, la rul vong ka ti che’ tiin a ngĕn a. 30 Nisienlakhom, a nuom naw a, a bat chu a tlăk hma khat lung inah a khum el tah a. 31 A siehlaw chanpui danghaiin a thilthaw dan an hmu chun poi an ti hle a, a thilthaw dan po po chu an pu kuomah an va hril a. 32 An pu chun siehlaw chu a ko a, “Nang siehlaw rilo, i ngên rak leiin i bat po po ka ngaidam che a. 33 Ka lunginsiet che ang khan nang khomin i siehlaw chanpuihai i lunginsiet ve ding an naw maw?” a ta. 34 A pu chu a lung a sen hle a, a bat po po a tlak zo hmâ khat chu lung in enkoltuhai kuoma chun soisa dingin a pêk suok tah a. 35 Tu khomin lungril taka in unauhai in ngaidam naw chun ka Pa vana mi khomin chuong ang bokin in chungah thaw veng a tih” a ta.