3 “Chuleiin, fimkhur ro, i unauin i chungah thil suol a thaw chun zil la, a sim chun ngaidam rawh. 4 Ni khat sungin i chungah voi sari thil a suksuol a, ‘Ka sim’ tia nangma tieng voi sari a hung ngha chun i ngaidam ding a nih” a ta.

5 Tirkohai chun Lalpa kuomah, “Kan ringna mi sukpungpek rawh” an ta. 6 Lalpa chun, “Antram mu tiet ringna in nei chun, hi theihmi kuoma hin, ‘Inphawi la, tuifinrietah inphun rawh’ ting in ta, in thu awi el a tih.

7 “Nangni lai hin tu am siehlaw nei a, a lo kei amanih a beram veng hung inlawi chu, ‘Hung la, bu hung fa nghal rawh’ ti ding? 8 Chuong nêk chun, ‘Ka fak ding buotsai la, inthuom la, ka fak le dawn sung po ka rawng bawl la, chu zoah nangin fa ve rawh’ in ti lem naw ding maw? 9 In thu anga a thaw leiin in siehlaw kuoma chun lawm thu in hril hlak am a ni? 10 Chuong ang bokin nangni khom thaw dinga thu an pĕk po po chêu in thaw zo vong hnungin, ‘Kan thaw dinga bituk chauh kan thaw leiin siehlaw tlâktlăi lo tak kan nih’ ti ro” a ta.

11 Jerusalem pana a fe trumin Galili le Samari ram inrǐna tieng lam chu Isun a hraw a. 12 Khaw pakhat a lut tawmin phâr sawm a’n tuokpui a. 13 Anni chu hla deu hlekah an ngîr a, “Hotu Isu, mi lunginsiet rawh!” tiin inring takin an khêk a. 14 Anni a hmu chun, “Fe unla, thiempu kawlah va’n entir ro” a ta, chuonga an fe lai chun an hung inthieng tah a. 15 Anni laia pakhat chun a dam ti a hriet phing leh rawl inring taka Pathien inpâk pumin a kîr nawk a. 16 Isu ke bulah bokkhupin lawmthu a hril a, ama chu Samari mi a nih. 17 Isu chun a lo biek a, “Mi sawm kha in hung inthieng ta vong an naw maw? 18 Pakuohai kha khaw la’m an um ta a? Hi awze mi^a chauh naw hi Pathien inpàk dinga hung kìr an um naw a ni maw?” a ta. 19 Chuongchun a kuomah, “Tho la, fe ta rawh, i ringnain a sukdam chê a nih” a ta.

20 Farisaihaiin Pathien ram hung tlung hun ding an indon leiin Isun an kuomah, “Pathien ram chu an langa hmu theiin hung tlung naw nih. 21 En ta, hi taka hi, saw taka saw ti bok naw ni hai. Ngai ta u, Pathien ram chu nangnia um a nih”^b a ta.

22 A zirtirhai kuomah, “Mihriem Naupa dam lai hun dam hi ni khat bêk in hmu nuom nawk hun la tlung a ta, sienkhom hmu ta si naw ti niu. 23 In kuomah, ‘En ta u, saw taka saw’ amanih, ‘En ta u, hi taka hi’ amanih la ting an ta; fe suok naw unla, anni chu zui bok naw ro. 24 Kawl inlepin kawl kil a el var ton zok zok ang hin Mihriem Naupa hung nawkna nia chun um a tih. 25 Nisienlakhom, chu hmâ chun thil tam tak tuor hmasa phot a ta, tu lai ruoltharhai hin hnawl an tih.

26 “Nova hun laia thil um dan ang khan, Mihriem Naupa hung nawk ni khomin um a tih. 27 Longa Nova a lut ni chen khan mihaiin fain an dawn a, nuhmei pasal an innei a. Chu zoah tui a hung lĕt a, an rêngin sukbohmang an ni ta kha.

28 “Chuong ang bokin Lota dam lai khom khan thil a tlung kha; fa-in an dawn a, inchawin an zor a, thil an phun a, in an bawl a; 29 nisienlakhom Sodom khawa inthoka Lota a suok ni chun vana inthokin mei le kât a sûr a, an rêngin a sukhlum vong a ni kha. 30 Mihriem Naupa hung inlang nawk ni chun chuong ang bok chu la ning a tih. 31 Chu huna chun in chunga um chu in sŭnga sum inchu dingin trum naw raw se. Loa um chu inah hung bok naw raw se. 32 Lota nuhmei kha hre zing ro. 33 Tu khom mani hringna hum tum taphot chun chân a ta, tu khom mani hringna chân taphot chun hum a tih.

34 “Ka hril cheu hi, chu zân chun khum khata zâl mi pahni chu pakhat lăk ning a ta, a dang maksanin um a tih 35 Suma nuhmei pahni bu suk lai chu pakhat lăkin um a ta, pakhat chu maksan ning a tih. 36 Pasal pahni lo fe chu pakhat lăkin um a ta, a dang chu maksan ning a tih” a ta

37 A zirtirhai chun, “Lalpa, khaw la’m ie?” an ta. Ama chun, “Saruong umna taphotah mulukolhai khom an fuon khawm hlak” a ta.