3 Farisai threnkhat a kuomah an hung a, ama fiena dingin, “Ieng lei khomin miin a nuhmei a mak a thieng am?” tiin an indon a. 4 Ama chun, “A tira inthokin Siemtu chun ‘pasal le nuhmeiin a siem a, 5 chuleiin pasalin a nu le pa inthla’ng a ta, a nuhmei leh inkop an ta, pumkhat hung ni tang an tih’ ti kha in tiem ngai naw maw? 6 Chuongchun pahni an ni ta naw a, pumkhat an ni ta lem. Chuleiin, Pathienin a zom ta chu mihriemin^a thrè naw raw se” a ta.

7 Anni chun a kuomah, “An leh, ieng dinga inmâkna lekha peka mak theina thu Mosien a pek am a na?” an ta. 8 Isun, “In lungril ngar lei chauin nuhmei mâk Mosien a phalpek chêu a ni kha; nisienlakhom a tira inthokin chuong ang chu a ni nawh. 9 Kei chun ka hril chêu hi, tu khom uire lei ni loa nuhmei maa mi dang nei taphot chu a uirĕ a nih” tiin a don a.

10 Zirtirhai chun, “Chuong ang chu nuhmei pasal inkar thu a ni si chun, innei hi a thra naw ie” an ta. 11 Ama ruok chun, “Chu thu chu mi po poin an pom thei nawh, a pĕkhai chauh naw chun. 12 Mi tilre hrima pieng an um a; a thren ruok chu mihriemin tilrea an siem an um a; threnkhat nawk ruok chu van ram leia tilrea insiem an um bok. Tu khom a zawm thei chun zawm raw se” a ta.

13 Chuong lai chun a kut innghata trongtraipek dingin naupangtehai chu Isu kuomah an hung thruoi a. Zirtirhai chun a hung thruoituhai chu an lo hal a. 14 Isu ruok chun, “Naupangtehai kha ka kuomah inhungtir unla, khap naw ro; van ram chu hieng ang mihai ta hi a ni si a” a ta. 15 An chunga kut a’n nghat hnungin chu hmuna inthok chun a fe ta pei a.

16 Mi pakhat hi Isu kuomah a hung a, “Zirtirtu, chatuon hringna ka nei theina dingin thil thra ieng am thawng ka ta?” tiin a’n don a. 17 Isu chun, “Ieng dinga thil thra chu i mi’n don? Thra chu pakhat chauh a um.^b Hringnaah lut i nuom chun thupekhai zawm rawh” a ta. 18 Ama chun, “A ieng tak am?” a ta. Isun, “‘Tuol that naw; uire naw; inru naw; khêlin mi hêk naw; 19 i nu le pa chawimawi rawh tihai le nangma i’n hmangai angin i vênghai hmangai rawh tihai hi” a ta. 20 Tlangval chun, “Chuong po po chu ka zawm hlak. Iem ka la bâk?” a ta. 21 Isun, “Thrat famkim i nuom chun, fe la, i nei po po zor la, pasiehai pe rawh; chuongchun vanah ro nei i tih; chun, hung la, mi zui rawh” a ta. 22 Chu thu chu a hrietin tlangval chun beidong takin a fesan a, sum a hau hle si leiin.

23 Isun a zirtirhai kuomah, “Thu dik ka hril cheu hi, mi hausa ta dingin Pathien rama lut chu harsa tak a nih. 24 Ka hril non cheu hi, Pathien rama mi hausa an lŭt nêkin thrim naa sanghawngsei lut thleng a ol lem” a ta. 25 Zirtirhaiin chu chu an hriet chun mak an ti hle a, “Chuong a ni chun tu’m sandam ni thei tang an ta?” an ta. 26 Isun anni chu en zingin, “Chu chu mihriem ta dingin thaw thei ruol a ni naw a, Pathien ta ding ruok chun iengkim thaw thei a nih” a ta.

27 Peter chun, “Ngai ta, keini hlakin iengkim maksanin kan zui ta si che a, kan dong ve ding chu iem ning a ta?” tiin a’n don a. 28 Isun a kuomah, “Thu dik ka hril cheu hi, iengkim siem tharna hunah, Mihriem Naupa hi a ropuina lalthrungphaa a’n thrung pha leh, nangni mi zuituhai khom hi Israel hnam sawm le pahni chungah ro rêlin lalthrungpha sawm le pahni-ah la thrung veng in tih. 29 Tu khom ka hming leia in le lo dam, unauhai, farnuhai, nu le pahai,^c le nauhai dam maksantu chun a lêt tam tak hmung an ta; chatuon hringna chang bok an tih. 30 Nisienlakhom, mi tam tak a hmasa taka umhai chu a nuhnung tak la ning an ta, a nuhnung takhai khom a hmasa tak la ning an tih” a ta.