5 Jehoiakim chu kum sawhni le kum nga a niin a’n lal tran a, Jerusalemah kum sawm pakhat lalin a um a, LALPA Pathien mithmuah thil thra lo a thaw hlak a. 6 Babulon lal Nebukadnezzar chu ama bei dingin a hung inthok a, Babulona thruoi dingin kol a’n buntir a. 7 Nebukadnezzar chun LALPA tempula bûr le bèlhai khom Babulon tieng a chawi a, Babulon khuoa a pathien tempula chun a sie a. 8 Jehoiakim chanchin dang le thil tirdakum a thawhai le a khawsak danhai chu Israel lal le Juda lalhai chanchin inziekna buah a chuong. A naupa Jehoiakin chun a lalna chu a hung hluo a.

9 Jehoiakin a hung inlal chun kum sawm le kum riet mi a na, Jerusalemah thla thum le ni sawm a’n lal a, LALPA mithmuin thil thra lo a thaw hlak a. 10 Kum a hung invoi chun Nebukadnezzarin mi a hung tir a, LALPA Tempula bûr le bèl thra tak tak leh Babulon tieng a’n thruoitir a, a unaupa Zedekia chu Judai ram le Jerusalema lalah a sie a.

11 Zedekia chu kum sawmhni le kum khat a niin a hung inlal a, Jerusalemah kum sawm pakhat a’n lal a. 12 LALPA a Pathien mithmuah thil thra lo a thaw hlak a, LALPAN a thu hriltua a hmang zawlnei Jeremia laka chun a’n phàhnuoi nuom nawh. 13 Chun, Pathien hmingin Lal Nebukadnezzar chungah ringum zing dingin intiemkam sienkhom a laka chun a hel a, lulul a’n suo a, LALPA Israelhai Pathien tieng ngha nuom loin a lungril a sukkhau a. 14 Chu bakah, thiempuhai lukhaituhai po po le mipuihai chun Pathien hre lo mihai thaw dan ang bokin thil tirdakum tinrêng thawin, Jerusalema Tempul, LALPA ta dinga inhlàn thienghlim chu an sukporche a. 15 LALPA, an pi le puhai Pathien chun mipuihai le a chengna Tempul chu a lainat si leiin an kuomah zawlnei a tir a tir a. 16 Sienkhom, Pathien mi tirhai chu an lo nuizat a, an thuhai chu an lo ngainêp a, a mihai chunga LALPA lungsenna hung inthok chu suklungawi nawk ngaina hrim inkaw lo khopin zawlneihai chu an lo suknomna a.

17 Chuleiin, LALPAN Babulon lal chu an chungah a hung intruongtir a, Tempul sunga chun an tlangvalhai chu an that a, mipuihai chungah zangaina nei dêr loin an che a, nunghak le tlangval le upa le tar tu khom hlà nei loin kawlhnâmin an that a, Nebukadnezzar kutah Pathienin a pek tawl vong si a. 18 Pathien Tempula bûr le bèl po po, a lien a chin, LALPA rosum an sie khawm po po hai, lal le mi lienhai sum sie khawm po po hai khom chu Babulon tieng a tol vong a. 19 Chu zoah a sipaihai chun Pathien Tempul chu an raw a, Jerusalem kul banghai chu an sukchim a, lal inhai po po an raw vong a, thil hlu ieng khom suksiet loa maksan an nei nawh. 20 That loa an hlà, tlawmte la dam um sunhai chu Babulon tieng Nebukadnezzar chun a thruoi a, chu taka chun ama le a pahai siehlawah, Persiahai hung lien chenin, an um a. 21 LALPAN zawlnei Jeremia hmanga a lo hril chu hung tlung kimin, zawlnei lo hril ang ngeiin, a tawpah a ram chu rausanin a um a, kum sawmsari sung chu sabat chawl a hmang tah a nih.

22 Persia lal Kura inlal tran kumin zawlnei Jeremia baua LALPAN thu an hriltir chu a hung tlung kim theina dingin LALPAN lal Kura lungril a chok tho a, a ram po poa tlâng insampui dingin ziekin hi thu hi a puong a: 23 “Persia lal Kura chun hieng hin a tih: ‘Hnuoia lalram po po hi LALPA, van Pathien chun a mi pĕk ta a. Judai ram Jerusalema chun a Tempul bawl dingin ama chun a mi ruot a. Hi sin hi hlen dingin nangni laia LALPA mihai taphot chu Israel ramah kir nawk thei in tih. LALPA in Pathien chun umpui cheu raw se’” tiin.