Josian Fekân Kùt a hmang
35
1 Josia chun Jerusalemah LALPA ta dingin Fekân Kùt a buotsai a, Fekân Kùt beramte chu thla hmasa tak ni sawm le ni linaa chun a that a. 2 Thiempuhai sinthaw ding a ruotpek a, LALPA tempula rongbawl sin thaw dingin a’n fui a. 3 Israel mihai zirtirtu, Pathien ta dinga ser hrang Levihai kuoma chun, “Israel lal Davida naupa Solomon Tempul bawla chun Bawm Thienghlim chu sie a ni tàk leiin hmun tina liengkoa zawn kuol a ngai ta naw a, chuleiin in hun chu LALPA in Pathien le a mi Israelhai rongbawlna dingin hmang lem ta ro. 4 In zui dinga Israel lal Davida le a naupa Solomon haiin an lo ziek angin, in sungkuo inthre dan ang peia Tempula mawphurna an pek cheu chu thaw dingin inbuotsai ro. 5 Hmun Thienghlima in umna ding senga chun ngir unla, in lo ngaisak dinga ruot sungkuohaiin Tempula thilhlân an hung inhlàn chu lo thrangpui ro. 6 Fekân Kùt beramte chu that unla, insukthienghlim unla, mi a hunghai chu thrangpui dingin inbuotsai unla, Mosie hmanga LALPAN thu a pekhai po po chu zawm ro” a ta.7 Kûta hung mipuihai inhlàn dingin Josia chun ama ran ruol laia mi beramte le kelte singthum le bawngchal sangthum a pek suok a, chuonghai chu lal taa mi vong a nih. 8 Lal thoktu lienhai khomin phal takin mipuihai le thiempuhai le Levihai ta dingin an thaw a. Pathien Tempula hotu Hilkia hai, Zekaria hai le Jehiel hai khomin Fekân Kùt beramtea inhlàn dingin thiempuhai chu beramte sanghni le zaruk le bawngchal zathum an pèk a. 9 Levihai hotu Konania le a unauhai Semaia le Nethanel hai le mi dang Hasabia hai, Jeiel le Jozabad hai khomin Fekân Kùta Levihai inhlàn dingin beramte le kelte sangnga le bawngchal zanga an pêk bok a.
10 Chuongchun, rongbawlna chu an buotsai a, lal thupêk angin thiempuhai chu an hmun sengah an ngîr a, Levihai khom chu an pawl dàn ang peiin. 11 Chun, fekân kùtna ding ran chu an that a, thiempuhaiin a thisen chu an the a, Levihai chun a vun an inhlip a. 12 Mosie lekhabua a chuong angin, an sungkuo inthrè dan ang peiin, LALPA kuoma inhlàn ding pumraw thilhlânhai chu an sie hrang a, chuong ang bok chun bawngchalhai khom chu an thaw a. 13 A dàn ang takin fekân kût beramtehai chu an em hmin a; an inhlàn thienghlimhai chu bêl hrang hrangah an suong a, mi po po fak dingin inhmaw takin an thur suok a, an sem a.
14 Chu zoah Levihai chun anni le thiempuhai fak ding an buotsai a. Aron thla thiempuhai chu pumraw thilhlân le thauhai rawin zan inthim chena an buoi leiin Levihai chun anni le Aron thla thiempuhai fak ding chu an buotsai a nih. 15 Chun, Davida le Asaf le Heman le lal zawlnei Jeduthun hai thupek angin hla saktu Asaf nauhai chu anni hmunah an ngìr a, kotkhar vêngtuhai chu kotkhar tinah an um a, an unau Levihaiin fak ding an hung buotsaipek hlak leiin an sin an fesan ngai nawh.
16 Chu ni chun fekân kùta rongbawlna ser le sang chu an zo vong a, Lal Josia thupèk angin pumraw thilhlân po po chu LALPA maichama chun an inhlàn a. 17 Jerusalema um Israel mi po poin Fekân Kùt le Chol thrang lo bei kùt chu ni sa ri sung an hmang a. 18 Zawlnei Samuel hun laia inthokin chuong anga nasa chun Fekân Kùt an la hmang ngai nawh. Thiempuhai, Levihai, Jerusalema um po po le Judai ram le Israel rama mi po po thrang tlâng vonga Josia-in fekân kût a hmangpui ang hin Israel lal tu khomin an la hmangpui ngai nawh. 19 Fekân Kùt hi Josia inlala inthoka kum sawm le parietnaah an hmang a nih.
Josia a thi
20 Josia-in tempul a siem thrat zo hnung chun Aigupta lal Neko chu Karkemis bei dingin Eufretis vadung tieng panin a’n thok tung a, Josia chun lo bei dingin a sipaihai leh a’n thok suok a. 21 Lal Neko chun, “Nang Juda lal, kei le nang ieng leiin am ei inbei ding a na? Ka do lai hnam chau a nih ka bei nuom. Pathienin inhmaw taka fe dingin a mi ti a nih. Ka kuoma um Pathien kal zawngin che lul naw rawh, chuong naw chun sukbohmang a ti che” tia hril dingin palai a tir a.
22 Nisienlakhom, Pathienin a biek ngei Neko thu hril chu Josia chun ngaithlaa inhnûk kir nêkin a lal thuom chu inthlakin a’n siem danglam a, Megido ruomah lo bei dingin a fe a. 23 Thal kap mihaiin Josia chu an inhliem a. A mihai kuoma chun, “Hi taka inthok hin mi fe hmangpui ro, hliem na tak ka tuok a nih” a ta. 24 A siehlawhai chun a tawlailira inthokin an zawn suok a, tawlailir dangah an sie a, Jerusalem tieng an phur tung a, a thi a, a pi le puhai thlanah an phûm a, Juda mi po po le Jerusalema mi po po chun an sùn a. 25 Zawlnei Jeremia chun Josia sùnna hla a phuok a, chu lusun hla chu tu chen khom hin an la sak hlak. Lusùnna hla sak hi Israel ramah an hung chìng a, chuong hlahai chu Lusùnna hla buah a chuong. 26 Josia inlal sunga thil tlung dang le LALPA dan po po zawm dinga a’n pèk zozie le a thilthaw thrathai chu, 27 a bula inthoka a tawp chenin, Israel lalhai le Juda lalhai chanchin inzieknaah a chuong.