Jerusalem sietna
25
1 Zedekia inlala inthoka kum kuona, thla sawm le ni sawma chun Babulon lal Nebukadnezzar chun a sipai po po thruoiin Jerusalem a hang bei a, umhmun an khuor a, kulin an huol vel vong a. 2 Chuongchun, lal Zedekia inlala inthoka kum sawm le kum khatna chenin khuo chu an inhuol a. 3 Thla lina, ni kuo ni chun khuo chu an tràm ta êm êm a, fak ding hrim hrim a um ta naw a. 4 Chuongchun, khawpui inhuonna bang chu an ver pop a, Babulon sipaihaiin khuo chu inhuol vong hai sien khom, zana chun sipai po po chu lal huon bul, kul bang pahni inkara chun an inrel suok vong a, Araba tieng panin an fe a. 5 Amiruokchu, Babulon sipaihai chun an hnot zui a, lal chu Jeriko phaiah an hnot phak a, a sipaihai chu an tlan dar ta vong a. 6 Chuongchun, lal chu an man a Babulon lal kuomah Ribla khuoah an thruoi a, a chungchang an rêl a. 7 Zedekia nauhai chu a mithmu ngeiah an that a, Zedekia mit chu a pahniin an khel dok a, dâr kol an inbuntir a, Babulon tieng an fepui ta a. Tempul an suksiet
8 Babulon lal Nebukadnezzar inlala inthoka kum kuona, thla ngana ni sari ni chun lal vengtu kawmandar Nebuzaradan chu Jerusalemah a lut a. 9 LALPA tempul le lal in le Jerusalema in po po chu a raw a, in poimaw po po chu raw fai lo a nei nawh. 10 Babulon sipai po po chun lal vengtu kawmandar inrawina hnuoiah Jerusalem inhuonna kul bang chu an sukchim vong a. 11 Khawpui sunga mi la umhai chu Nebuzaradan chun salah a thruoi vong a. 12 A rama mi rethei mong khawnhai ruok chu vengtu pawl kawmandar chun grêp huon enkoltu ding le loa sinthawa sor dingin a maksan a.
13 LALPA tempula dâr ban hai le dar tuizeng le a thruthai chu Babulon mihai chun an sukkoi vong a, dar chu Babulon tieng an hawn a. 14 Bêl hai, vutluo hai, khawnvar phita chep ruolna hai, haihaw hai le dar bûr le bèl po po, rongbawlna dinga an hmanghai chu, an lak a. 15 Mei lakna hai, maihûn hai le tangkaruo le rangkachaka siem hrim hrim chu lal vengtu kawmandar chun a lak vong bok a.
16 Solomonin LALPA tempula hmang dinga a’n siemtir dar ban pahni le dar tuizeng le a thruthai chu hang buk ruol khom a ni nawh. 17 Ban pahni chu intiet char a na, meter rieta insang ve ve a na, a sîpa chun dara sung a kheibawk a um ve ve a, chu dar sung kheibawk insangzie chu meter 1.3 a na, a sung kheibawk vela chun mawi taka triel theibufai lim a chuong a.
Juda rama mihai salah an thruoi
18 Vengtu pawl kawmandar chun thiempu lal Seraia le a dottu Zefania le kotkhar vengtu pathumhai chu a man a. 19 Khawpuia la um zinghai lai chun indo mihai hotuhai, lal khawnbawl pangahai, lal ina lekha ziektuhai, sipai dinga mi latuhai laia hotu le a rawihai sawmruk hai chu khaw sunga chun an man bok a. 20 Vengtu pawl hotu Nebuzaradan chun a thruoi tawl a, Babulon lal kuomah Ribla khuoa chun a fepui a. 21 Hamath ram, Riblaa chun lal chun a’n sukhlumtir tawl ta a. Chuongchun, Judahai chu an rama inthoka hla takah sala thruoiin an lo um tah a nih.
Judai ram optu Gedalia
(Jer 40:7-9; 41:1-3)
22 Nebukadnezzar chun Judai rama an maksanhai optu dingin Safan naupa Ahikam naupa Gedalia chu a ruot a. 23 Chuongchun, sipai pawl hotu po po le an rawihaiin Babulon lalin optuah Gedalia a sie ti an hriet chun Mizpa khuoah Gedalia kuomah an hung a, chuonghai chu Nethania naupa Ismael hai, Karea naupa Johanan hai, Netofat mi Tanhumet naupa Seraia hai, Makat naupa Jazania hai le an mi le sahai an nih. 24 Gedalia chun chuong mihai le an rawihai kuoma chun thu inkham meuin, “Babulon sorkar mi lienhai hi tri naw ro. Hi rama hin chêng unla, Babulon lal hnuoiah um unla, in ta dingin thra’ng a tih” tiin a lo thlamuong tawl a.
25 Amiruokchu, thla sarinaa chun lal thlaa mi, Elisama naupa Nethania naupa Ismael chu mi sawm thruoiin a fe a, Gedalia le Mizpa khuoa Juda mi le Babulon mi umhai chu an that ta vong a. 26 Chu phing leh Babulon mihai chu an tri leiin mi po po a chîn a lien, sipai hotuhai le chun Aigupta ramah an tlàn ta a.
Jehoiakin an insuo
27 Juda lal Jehoiakin chu sala a’n tàng kum sawmthum le kum sarina, thla sawm le thla hnina, ni sawmhni le ni sari niin Babulon lal Evil Merodak chu Babulon lalah a hung um a, Jehoiakin chu tang ina inthokin a thruoi suok a. 28 Ngilnei takin a biek a, Babulona a kuoma um lalhai nèka inzaumin a sie a. 29 Chuongchun, Jehoiakin chun a’n tàngna silfenhai chu a’n thla a, a dam sung po chun lal dawkanah thlaithleng a kîl ve rop hlak. 30 Jehoiakin dam sung po chun a’n enkolna tawk somdawlna ni tinin lal chun a pek bok.