24
1 Jehoiakim inlal lai chun Babulon lal Nebukadnezzarin a hung rûn a, Jehoiakim chu a hnuoiah sie chawiin lalin a’n umtir a, sienkhom kum thum hnungah Nebukadnezzar laka chun a hel a. 2 LALPA chun ama do dingin Babulon hai, Aram hai, Moab hai le Amon hai chu a tir suok a. LALPA thu, a siehlaw zawlneihai a lo inpuongtir tah anga Judai ram chu sukse dingin a tir tawl a nih. 3,4 Manase thil suol thaw po po lei le poi tawk lo thisena Jerusalem chu a suksip leiin LALPAN a ngaidam nuom naw a, a hmu phak loa anni chu son hmang dingin hieng thil hi Juda chungah LALPA thupekin a hung intlungtir a nih.
5 Jehoiakim inlal laia thil tlung dang le a thilthawhai chu Juda lalhai inlal laia an chanchin inziekna lekhabuah a chuong. 6 Jehoiakim chu a thlatuhai kuomah a chawl a, a naupa Jehoiakin chun a lalna chu a hung hluo ta a.
7 Babulon lalin Eufretis vadunga inthoka Aigupta ruom chen chu a ramah a siem vong leiin Aigupta lal chu a rama inthokin mi rûn dingin a’n thok suok nawk ta ngai nawh.
Juda lal Jehoiakin
8 Jehoiakin a hung inlal chun kum sawm le kum riet mi a na, Jerusalemah thla thum a’n lal a, a nu hming chu Nehusta a na, Jerusalem mi, Elnathan naunu a nih. 9 A pa thaw dan ang bokin, Jehoiakin chun LALPA mithmuah thil suol a thaw hlak a.
10 Chuong lai chun Nebukadnezzar mihai chu Jerusalemah an hang fe a, khuo chu an inhuol a. 11 An inhuol lai chun Nebukadnezzar chu Jerusalema chun a hang fe a. 12 Juda lal Jehoiakin chu a nu hai, a mi hai, a thoktu hai, a khawnbawl hai le rongbawltu hai leh a kuoma chun an hung inpèk a. Babulon lal inlala inthoka kum rietnaa chun Jehoiakin chu a man a. 13 LALPAN a lo hril tah angin, Jerusalema LALPA tempula ro po po le lal ina ro po po chu a lak a, LALPA tempula Israel lal Solomonin rangkachak bûr le bêl a siem po po chu a lak vong a. 14 Jerusalema mi po po, mi lien po po, mi hrat le huoisen po po le kut themthiem le thil siem thiem po po chu mi singkhat zet salin a thruoi a. A rama mi rethei mong khawnhai chauh an maksan a nih.
15 Nebukadnezzar chun Jehoiakin chu Babulon tieng a thruoi a, a nu hai, a nuhmei hai, a thoktuhai le mi challang po po chu a thruoi sa bok a. 16 Mi hrat le indo thiem mi sangsari le kut themthiem le thil siem thiem mi sangkhat chu Babulonah a thruoi a. 17 Jehoiakin pate Matania chu a aiin lalah a sie a, a hming chu Zedekia tiin a thlâkpèk a.
Judal lal Zedekia
18 Zedekia a’n lal chun kum sawmhni le kum khat mi a na, Jerusalemah kum sawm le kum khat a’n lal a, a nu hming chu Hamutal a na, Libna khaw mi Jeremia naunu a nih. 19 Jehoiakim thaw dan po po chîng vein, LALPA mithmuah thil suol a thaw hlak a. 20 LALPA lungsenna leiin Jerusalem le Juda chungah hieng po po hi a hung tlung a, a tawpah a hmu phak loah a hnawl hmang tawl ta a. Chuongchun, Zedekia chu Babulon lal chunga chun a hel ta a.