4 Chun, lal chun thiempu laltak Halkia le a dottu thiempuhai le kotkhar vengtuhai chu LALPA tempul sunga Baal hai, Asera hai, vana thil umhai po po ta dinga siem bûr le bèlhai chu la suok vong dingin thu a pêk a, Jerusalem khaw kawl, Kidron phùla chun an raw hmang a, a vâphai chu Bethelah an fepui a. 5 Juda lalhaiin Judai ram khaw hrang hrang le Jerusalem le a se vel hmunsânga milim betuhai ta dinga rimtui inhlàntu dinga thiempu an ruothai po po le Baal hmaa dam, ni le thla le arasi le vana thil umhai po po kuoma dam rimtui inhlàntu thiempuhai po po chu a sukbo vong a. 6 LALPA tempula Asera lim thing chu Kidron vadungah a lak thlak a, an raw a, an rawt dip vong a, a diphai chu mi naran thlan chunga hai an phul a. 7 Tempula nuhmeiin Asera ta dinga puon an khawngna, pasal inzor ruol umna inhai chu a thriekpek bok a.

8 Judai ram khaw tina thiempuhai po po chu a lâk dok vong a, Geba le Beersheba inkara rimtui an inhlànna hmunsânga bawlhmun po po chu a suksiet vong a. Khawpui lutna kotsuo voi tienga khawpui optu Josua Kotkhar bula um, an hmunsanghai po po chu a sukchim vong bok a. 9 Hmunsânga thiempuhai hin Jerusalema LALPA maichàmah rong bawl ve naw hai sienkhom, thiempuhai lai chol thrang lo bei an fak ve hlak a nih.

10 Molek kuoma meia inthawinaa an naupa le naunu hai an inhlàn ta nawna dingin Ben Hinom ruoma an inthawina hmun Tofet chu a suksiet a. 11 LALPA tempul lutnaa tempul huong sunga lal in vengtu Nathanmelek pindan bula Juda lalhaiin nisa ta dinga sakor an pekhai chu a son hmang a, an tawlailirhai chu a raw bok a. 12 Ahaz in sawng chunga Juda lalhai maichàm siemhai le Manase-in LALPA tempul inhuonna sung kot zawl hmun hnia maichàm a siemhai chu lal chun a sukchim a, a vuok nawi vong a, a nawihai chu Kidron vadungah a pei a. 13 Jerusalem sak tienga Sietna Muol sim tienga Sidonhai pathiennu tirdakum Astoret ta ding dam, Moab-hai pathien tirdakum Kemos ta ding dam, Amon-hai pathien tirdakum Molek ta ding dama Israel lal Solomon-in hmunsang a siemhai po po chu a sukchim a. 14 Josia chun an lungphunhai chu a vuok koi vong a, Asera lim thinghai chu a phûr thluk a, chuong bawlhmunhai po poa chun mihriem ru a sie a.

15 Israelhai thil suol inthawtirtu Nebat naupa Jeroboamin Bethela maichàm le hmunsâng a siemhai chen chun a sukchim a, a raw a, a rawt nawi vong a, Asera lim thinghai khom chu a raw a. 16 Chun, Josia chu a hang ngha vel a, tlânga thlanhai chu a hmu a, thlana ruhai chu a va’n laktir a, chuong ang thu chu Pathien miin a lo hril lawk ang ngeiin, maichàma chun ruhai chu a raw a, a suksiet a.

17 Lal chun, “Saw saw tu lungphun am a na?” tin a’n don a. A khaw mihai chun, “Pathien mi, Judai rama inthoka hung, Bethela maicham chunga i thaw tah hi a hung tlung ding thu lo hril lawktu a nih” an ta. 18 Lal chun, “Sawng son um raw se. Tu khomin a ruhai la son naw raw se” a ta. Chuongchun, a ruhai chu Samaria-a inthoka zawlnei hung ruhai le chun ieng khom an thaw ve nawh.

19 Bethela a thaw ang chiein Israel lalhaiin LALPA suklungsena an bawl Samaria ram khuo po poa hmunsanghai le an bawlhmun po po chu Josia chun a thriek vong a. 20 Chun, hmunsânga thiempuhai po po chu maichàm chungah a that a, mihriem ruhai chu a raw a, Jerusalem tieng a kir nawk ta a.

21 Chun, lal chun mi po po kuomah, “Hi thuthlung bua chuong ang hin LALPA in Pathien ta dingin Fekân Kùt hmang ro” tiin thu a pêk a. 22 Israelhai chunga rorêltuhaiin ro an rèla inthok le Israel lalhai le Juda lalhai inlal sungin chuong ang chun Fekân Kùt an la hmang ngai nawh. 23 Lal Josia inlala inthoka kum sawm le kum rietnaa chun Fekân Kùt chu Jerusalemah LALPA ta dingin an nei nawk chauh a nih.

24 LALPA tempula thiempu Halkia hmu suok lekhabua dan thuin a phùt ang takin Josia chun rau ko thiem le dawi thiemhai le in tina an pathien limhai, milimhai le thil tirdakum po po chu Judai ram le Jerusalema inthokin a sukbo vong a. 25 Mosie dan anga lungril po po le thlarau po po le hratna po poa LALPA rong Josia anga bawltu hi lal a hma khomin a hnung khomin an um ngai nawh. 26 Chuong sa khom chun Manase-in LALPA a lo suklungsenna po po leiin Juda chunga a lungsenna chu a la rè chuong nawh. 27 Chuongchun, LALPAN, “Israel ka son bo ang bokin Juda khom hi ka hmu phak loah la son bo veng ka tih, hi khuo, ka thlang Jerusalem ngei el, ‘Chutaka chun ka hming chu um a tih’ ka ti le tempul ngei khom hi hnawl ka tih” a la ti zing a nih.

28 Josia inlal sunga thil tlung danghai le a thilthaw po po chu Juda lalhai inlal lai chanchin inziekna lekhabuah a chuong.

29 Josia inlal lai hin Aigupta lal Faraw Neko chu Asuria lal thrangpui dingin Eufretis vadung chen a hang fe a. Lal Josia chu lo bei dingin a’n thok suok a, Neko leh an inbei a, Josia chu Megiddo-ah a lo that a. 30 Josia siehlawhai chun a ruong chu Megido-a inthokin Jerusalem tieng tawlailirin an phur tung a, ama thlâna chun an phŭm a. A ram mipuihai chun Josia naupa Jehoahaz chu an thruoi a, hriek an nàl a, a pa lalna chu a hung hluo ta a.

31 Lal a hung ni chun Jehohaz chu kum sawmhni le kum thum mi a na, Jerusalemah thla thum a’n lal a, a nu hming chu Hamutal, Libnaa inthoka hung, Jeremia naunu a nih. 32 A puhai ang bokin LALPA mithmuah thil suol a thaw a. 33 Jerusalema inthoka a’n lal thei nawna dingin Faraw Neko chun Hamath ram Ribla-ah khaidietin a thlung a, a ram chu tangkaruo kilogram sangthum le zali le rangkachak kilogram sawmthum le pali a’n chawitir a. 34 Faraw Neko chun Josia naupa Eliakim chu a pa Josia aiin a’n laltir a, a hming chu Jehoiakim tiin a thlakpek a. Jehoahaz ruok chu Aigupta ramah a thruoi a, chu taka chun a thi ta a.

35 Jehoiakim chun Faraw Neko tuk zat tangkaruo le rangkachak a pêk a, chu chu a pèk theina dingin a ram mihaia inthok chun an neinung dan zirin sie an chawitir a, tangkaruo le rangkachak an chawi zàt ding a bituk a.

36 Jehoiakim an lal chun kum sawmhni le kum nga mi a na, Jerusalemah kum sawm le kum khat a’n lal a, a nu hming chu Zebida a na, Ruma khaw mi Pedaia naunu a nih. 37 Chun, a pi le puhai thaw dan angin, LALPA mithmuah thil suol a thaw hlak a.