EZRA
Lal Kura’n Judahai kìr a phalpèk
1
1 Persia lal Kura inlal kumina LALPAN a thu zawlnei Jeremia hmanga a lo hril tah chu a hung intlung kimtir a. A ram sung po poa puong dar dingin hieng ang hin thupêk ziek ngeia insuo dingin LALPAN Persia lal Kura lungrilah sin a thaw a: 2 “Hi hi Persia lal Kura thusuok a nih: Hnuoia ram po po hi LALPA, van Pathien chun a mi pèk ta a, Judai ram Jerusalemah a Tempul bawl dingin a mi ruot a. 3 Israelhai Pathien, LALPA Tempul, Jerusalema um chu bawl dingin nangni laia ama mi tu khom, Judai ram Jerusalem tieng kir thei in tih. Pathien chu in kuomah um raw se. 4 Chun, mi tu khom, khaw lai hmuna mi khom, an umnaa la chambang taphot chun Jerusalema Pathien Tempul bawlna dingin mani lung puok anga an pek tiem loin tangkaruo hai, rangkachak hai, hmangruo hai le ran hai pein hung thrangpui raw hai se” tiin.5 Chuongchun, Juda hnam le Benjamin hnama lukhaituhai, thiempuhai le Levihai le tu khom LALPAN an lungrila sin a thaw taphothai chu Jerusalema LALPA Tempul hang bawl dingin an inthok suok a. 6 Mani lung puoka an thaw bakah an kawl le kienga mihai chun tangkaruo le rangkachaka siem bûr le bêl dam, an inzin sunga an fàk le dawn ding dam, ran dam le thilpêk hlu tak tak dam pein an hung thrangpui a. 7 Chu bakah, lal Kura chun kha hmaa Nebukadnezzarin Jerusalema LALPA Tempula inthoka bûr le bêl a lăk le hawn, a pathien ina a siehai chu a’n lak suoktir a. 8 Lal Kura chun a sum enkoltu Mithredat chu tiem vong ding le Judai ram tienga kîr pawlhai thruoitu Sesbazar kuta inhlàn dingin thu a pêk a. 9 Chuonghai chu rangkachak maihùn sawmthum, tangkaruo maihùn sangkhat, tangkaruo berbub sawmhni pakuo, 10 rangkachak thlèngkûm sawmthum, tangkaruo thlengkùm zali sawmkhat le bûr le bèl chi hrang hrang sangkhat a nih. 11 Babulona inthoka saltanghai Jerusalema an hung kir nawk truma Sesbazar kuta rangkachak le tangkaruoa siem bûr le bèl an hawn tung po po chu sangnga le zali a nih.