Jerusalem siet thu
52
1 Zedekia a hung inlal chun kum sawmhni le kum khat mi a na, Jerusalemah kum sawm le kum khat a’n lal a. A nu hming chu Hamutal a na, Libna khaw mi Jeremia naunu a nih. 2 Ama chun Jehoiakim thaw ang bokin thil suol a thaw a. 3 LALPA lung a sen êm leiin hieng thilhai hi Jerusalem leh Judai ramah a hung tlung a, a tawpah a mithmua inthokin a pei suok a. Zedekia chu Babulon lal chunga chun a hung hel tah a nih.4 Zedekia inlal kum kuona thla sawmna le ni sawmaa chun Babulon lal Nebukadnezzar le a sipai ruol po po chu Jerusalem do dingin an hung inthok a, khawpui chu an inhuol a, a vêlin thranghmun an khuor a. 5 Lal Zedekia inlal kum sawmpakhatna chenin khawpui chu inhuolin an chàrchil a.
6 A kum sawmpakhatna thla lina ni kuonab chun khawpui chu an hung tràm ta hle a, mipuiin fak ding ieng khom an nei ta nawh. 7 Chuongchun, khawpui kul bang chu an sut hong a, sipaihai po po chu an tlan suok a. Babulon mihai chun khuo chu inhuol vel vong hai sienkhom, lal huon bang pahni inkara lampuia chun zànah an inrel suok a, Araba lampuia chun an fe a. 8 Amiruokchu, Babulon sipaihai chun Zedekia chu an hnot zui a, Jeriko phaizawlah an zu nang a. A sipaihai chu an tlàn dar vong a, 9 ama chu an man a, Hamath rama Ribla khuoa chun Babulon lal kuomah an thruoi a, ama chun a chungthu chu a rèl a. 10 Babulon lal chun Zedekia naupahai chu a mithmu ngeiah a that a, Riblaa chun Juda mi lienhai po po khom a that bok a. 11 Chu zoah Zedekia mit chu a khel dokpek a, dâr kol a’n buntir a, Babulon tieng a thruoi a, chu taka chun a thi chenin lung inah a’n tàngtir a.
Jerusalem suksiet ni
12 Babulon lal Nebukadnezzar inlala inthoka kum sawm le kum kuona, thla ngana ni sawmc chun lal vengtu pawl kawmandar, Babulon lal hmaa ngir hlak, Nebuzaradan chu Jerusalemah a lut a. 13 LALPA tempul le lal in le Jerusalema in po po chu a raw a; Jerusalema in poimaw taphot chu hlà a nei nawh. 14 Babulon lal vêngtu pawl sipai kawmandar hnuoia sipaihai chun Jerusalem kul bang chu an sukchim vong a. 15 Vêngtu pawl kawmandar Nebuzaradan chun mipuihai laia mi rethei tak tak, khawpuia an maksanhai, a hmaa Babulon lal kuoma lo inpe tahai le themthiem la um sunhai chu salah a thruoi vong a. 16 Sienkhom, a rama mi rethei mongtol threnkhat ruok chu grep huon enkoltu ding le loa sinthaw dingin Nebuzaradan chun a maksan a.
17 LALPA tempula dâr banhai le dâr tuizèng inthrutnahai chu a vuok chim a, a dârhai chu Babulon tieng a hawn vong a.
18 Tempula an hmang bûr le bèl hai, vutluo hai, khawnvar phita chep ruolna hai, maihùn hai, thleng le dar hmangruo po po, tempula rongbawlnaa an hmang hlak hai chu a lak vong a. 19 Chun, màihùn hai, mei lakna berbu hai, thil thèna maihunte hai, bel hai, khawnvar siena hai, dawn ding inhlan chânga hmang hlak thleng le thlengkûm, rangkachak le tangruoa siem po po chu kawmandar chun a lak vong a.
20 Dâr ban pahnihai le dâr tuizeng le a thrut, son thei le dâra siem bawngchal lim sawmpahni, Solomonin LALPA tempula dinga a’n siemtir rikzie chu buk zo ruol a ni nawh. 21 Ban pakhat insangzie chu meter riet, a lienzie meter nga le centimeter li vel tuok a na, a sà zawng chu centimeter riet a na, a lai chu a kawrong a. 22 A ban hmawra dâr lu bawk chu meter khat le centimeter thuma insang a na, a lu bawk vel tuoka chun dara mawi taka siem theibufai lim a’n tlar suok a, dâr ban pakhat dang, chuong ang boka theibufai lim chuongna chu, inang chara siema nih. 23 Chun, a panga chun theibufai lim sawmkuo paruk a um a, a vêla cheimawina theibufai lim um zat chu zakhat a nih.
Juda mi sala an thruoi zàt
24 Kawmandar Nebuzaharan chun thiempu lal Seraia le a dota mi thiempu Zefania le kotkhar vêngtu pathumhai chu a man a. 25 Khawpuia la um sipai hotu hai, lal khawnbawl mi pasari, a rama sipai latu lu tak le a mihai sawmruk, khawpuia la umhai chu a thruoi tawl bok a. 26 Kawmandar Nebuzaran chun anni chu Riblaa um Babulon lal kuoma chun a thruoi a. 27 Hamath ram Riblaa chun Babulon lal chun anni chu a’n thattir a. Chuongchun, Juda hnam chu an rama inthokin sala thruoiin an um tah a nih.
28 Nebukadnezzarin sala a thruoihai chu: a kum sarinaahd Juda mi sangthum le sawmhni le pathum an na; 29 Nebukadnezzar kum sawm le kum riet a’n lal kumah,e Jerusalem mi zariet le sawmthum le pahnih an na; 30 kum sawmhni le kum thum a’n lal kumf a lal vêngtu pawl kawmandar Nebuzaradan-in a hung thruoi po chu Juda mi zasari le sawmli le panga an na, an rêngin sangli le zaruk an nih.
Jehoiachin an insuo
31 Sala Juda lal Jehoiachin kum sawmthum le kum sari a’n tàng kum, Babulon lal Evil-Merodakg inlala inthoka kum khatnaa chun Juda lal Jehoiachin chu saltangnaa inthokin Babulon lal chun a’n suo a. 32 Jehoiachin chu hoihawm takin a biek a, a kuoma um ve lal danghai nêka insang lemah a sie a. 33 Chuongchun a saltangna zakuo chu hlipin, a dam sung hun po po chu lal dawkanah fain a dawn ve ta a. 34 A thi chena ama inphuhrukna dingin Babulon lal chun Jehoiachin chu sum le pai a pêk thlar bok a nih.