4 Mosie chun a hmaa ang bok chu lungphĕk pahni a ser a, LALPAN thu a pek angin, lungphĕk pahni chu a kuta chawiin zing inhma takin Sinai tlangah a kai a. 5 LALPA chu sûmah a hung trum a, Mosie bula chun a ngîr a, LALPA a nizie a hril a. 6 A hma tienga Mosie a fe pèl lai chun, “Kei hi LALPA, mi lainattu le lunginsiettu, lung inuoi, hmangaina le ringumnaa sip LALPA Pathien, 7 sang tam tak chunga hmangaina inlangtirtu le an rîtlona hai, helna hai le suolna hai khom ngaidam hlaktu, amiruokchu thiem loa ruothai chu insuo ngai lo le an pahai suolna leia an nauhai le an nauhai nauhai, suon thum suon lina chen khom hrem hlaktu chu ka nih” tiin a puong a.

8 Mosie chun inrang taka bokkhupin a chawibiek a. 9 “Aw LALPA, tuhin i mit ka tlung takzet a ni chun LALPA chun mi fepui hrâm raw se. Hnam lulul tak chu an ni ngei el, sienkhom kan rǐtlona le suolnahai chu ngaidam la, i ro hluotuah mi pom lul rawh” a ta.

10 LALPA chun, “Ngai ta, nang leh thu ka thlung ding a nih. Khawvel po poa tu hnam chunga khom ka la thaw ngai lo thilmakhai chu i mipuihai hmua ngei ka thaw ding a nih. I kawl vela umhai po poin i ta dinga thil râpum tak ka thaw ding chu la hmung an tih. 11 Voisuna thu ka pĕk che hi zawm rawh. Amor hai, Kanan hai, Hit hai, Periz hai, Hiv hai le Jebu hai chu i hmaa inthokin hnot suok ka tih. 12 I fèna ding rama chêng hnamhai leh thuthlung siem lo dingin fimkhur rawh, chuong naw chun nangni lai châng inchang an tih. 13 An maichamhai sukchim vong unla, an lungphunhai vaw koi vong unla, an pathiennu Asera lim po po phûr thlu vong ro. 14 Pathien dang hrim hrim be naw ro, in LALPA a hming Thîka hi Pathien thîkthusie a ni si a.

15 “A ram mihai leh thuthlung siem lo dingin fimkhur ro; an pathienhai kuomah inzora^a an inhlàn pha chun nangni khom fiel ve’ng an ti chêu a, an inthawina sa fa ve hlauh rawi in tih. 16 In naupahaiin an naunuhai an nei chun, an pathienhai kuoma an inzor^b pha in naupahai khom an thil chǐng chu thaw ve dingin thruoi lût ve pal rawi an tih.

17 “Milim sung pathien hrim hrim i ta dingin insiem naw rawh.

18 “Chol thrang lo Bei Kŭt in hmang ding a nih. Thu ka pĕk ta chêu ang khan, ni sari sŭng chu chol thrang loa siem bei chauh in fak ding a nih. Hi kût hi Abib thlaa a hun ruota ngei in hmang ding a nih, chu chu Aiguptaa inthoka in hung suok hun kha a nih.

19 “Sul kêu hmasa tak nau taphot chu ka tâ a nih, in ran vai, beram ruol le bawng ruol laia a chal pieng hmasa takhai khom. 20 Sabengtung pieng hmasa tak chu beramtein intlan unla, in intlan naw chun a nghawng suktliek ro. In naupa pieng hmasa tak chu in intlan bok ding a nih. Tu khom ka hmaah kut ruokin an hung inlang ding a ni nawh.

21 “Ni ruk sung sin thaw unla, a ni sarinaa ruok chu chawl ro. Lo kei hun le bu sîk huna khom chawl hlak ro. 22 Bu in tharsuok hmasa takin Chawlkar Kût hmang unla, in buhai in hlu lût vong pha leh Pawl Kût hmang bok ro.

23 “I mihai laia pasal po po chu kum khatah voi thum Chunghnungtak LALPA, Israel Pathien hmaah an hung inlang ding a nih. 24 In hmaa hnamhai chu hnot suok ka ta, in ram zauh lien pei ka ta, LALPA in Pathien hmaa inlang dinga kum khatah voi thum in hang fe chăngin tu khomin in ram hi hung inhnar naw ni hai.

25 “Ka kuoma thisen in hung inhlàn pha leh, chol thranga siem thil ieng khom inhlàn sa naw unla, Fekân Kŭt hlanbiekna sa khom a zinga chen in sie ding a ni nawh.

26 “In lo tharsuok laia a thra tak ngot chu LALPA in Pathien inah in hung chawi ding a nih. Kelte sâ chu a pui nenetuiin in suong ding a ni nawh,” a ta.

27 LALPA bok chun Mosie kuomah, “Hieng thuhai hi ziek thla vong rawh, hieng thuhai dungzui hin a nih nang le Israel kuomah thu ka thlung chu nih” a ta. 28 Mosie chu LALPA kuomah bu fa lo le tui dawn loin ni sawmli le zan sawmli a um a, lungphĕka chun thuthlungna thu, Thupek Sawm chu a lo ziekpĕk a.

29 Tlânga inthoka Thuthlung lungphĕk pahni chawia Mosie a hung kìr chun, LALPA le an inbiek leia hmêl êng a put chu a hriet dêr nawh. 30 Aron le Israelhaiin Mosie an hmu chun a hmêl chu a êng leiin an hnai ngam naw a. 31 Sienkhom, Mosie chun anni chu a ko a, Aron le khawtlang hotuhai chun an hung hnai a, a lo inbiekpui a. 32 Chu zoa chun Israel mipuihai chun an hung pan hnai a, LALPAN Sinai tlanga thu a pĕkhai po po chu a lo pêk sawng a.

33 Anni a biek zoin Mosie chun a hmai chu hmaidierin a’n khum a. 34 Amiruokchu, LALPA be dinga Puon ina a lŭt sûng po a hmaidier chu a hlîp hlak. A hung suok pha leh LALPA thupekhai chu Israelhai kuomah a hung hril a, 35 mipuiin a hmêl êng an hmu hlak a. Chu zoah LALPA inbepui dinga a lŭt nawk hma po chu hmaidier a khum nawk hlak.