Sinai tlang an suoksan
33
1 LALPA chun Mosie kuomah, “Nang le Aigupta rama inthoka i hung thruoi suokhai khan hi hmun hi suoksanin, Abraham le Isak le Jakob kuoma ‘In thlahai ta dingin ka la pêk ding a nih’ tia inkhâm meua ka lo tiem ram tieng chu pan tung ro. 2 In hmaah ka vantirko tir ka ta, Kanan mihai, Amor mihai, Hit mihai, Periz mihai, Hiv mihai le Jebu mihai chu lo hnot suok a tih. 3 Khuoizu le nenetui luongna ram chu pan tung unla, sienkhom hnam lulul tak in ni leiin nangni lai fe ve naw ning, lampuiah sukbohmang tawl rawi ka ti chêu” a ta.4 Chu thu chu mipuiin an hrietin an bei a dong hle a, an trap a, tu khomin incheina thil an inbel nawh. 5 LALPA chun Mosie kuomah, “Hieng thu hi Israelhai kuomah hril rawh: ‘Hnam lulul tak in nih. Chom khat khom ka’n tlonpui chêu chun ka sukbohmang pal el thei chêu a nih. Tu hin in incheina thil po po hlîp thla vong unla, ieng am ka law ding chĕu la sukfel ka tih’ tiin” a ta. 6 Chuongchun, Horeb tlanga chun Israelhai chun an incheina thil po po chu an hlîp vong a.
Intuokna Puon in
7 Mosie chun puon in chu a som pei a, riebûka inthoka hla feah a zàr a, chu chu ‘Intuokna Puon in’ tiin a’n bûk a. Tu khom LALPA zong taphothai chun riebûk puo tienga intuokna puon in chu an pan a. 8 Puon ina lût dinga Mosie a suok an hmu pha leh mi po poin mani puon in kot senga inthokin a lût chenin an thlîr thrup a. 9 Puon ina Mosie a lût charin sûm ngǐr chu a hung trum a, puon in kotkhara chun a ngîr a, LALPAN Mosie chu a hung biek a. 10 Mipuiin puon in kota sûm ngǐr an hmu pha chun an puon in seng kota chun ngirin an chawibiek a. 11 Ruolcham biek ang elin LALPA chun Mosie chu inhmatonin a biek a. Chu zoah Mosie chu a puon inah a hung kǐr nawk a, ama thrangpuitu tlangval Josua, Nuna naupa ruok chun puon in chu a maksan ve ngai nawh.
Mosie le LALPA ropuina
12 Mosie chun LALPA kuomah, “Ngai ta, nangin ka kuomah ‘Hienghai hi thruoi suok rawh’ i ti a, sienkhom tu am ka fepui ding ti i mi hril bok si nawh. Nang chun, ‘Hminga ko nal khopa ka hriet chè a na, ka mit khom i tlung ti ka hriet bok’ i ti a. 13 Chuonga i mit ka lo tlung takzet a ni chun, nangma hre a, i mit ka tlung zing theina dingin i konglamhai mi’n chuktir rawh. Hi hnam hi i mihai ngĕi an nih ti hre zing rawh,” a ta.
14 LALPA chun, “Ka umpuina chun som zing a ti chêu a, hadamna pe’ng ka ti chêu” a ta. 15 Mosie chun a kuomah, “I umpuinain a mi som zing ding a ni naw chun hi taka inthok hin m’n fe suoktir lul naw rawh. 16 Nangin i mi fèpui si naw chun kei le ka mihai chungah i lawm ti tuin am hre thei an ta? I mi fèpui chun hnuoi hmun tina chênghaiin i mihai hi kan danglam bikzie hrieng an tih” a ta. 17 LALPA chun Mosie kuomah, “Ka mit i tlung lei le hminga ka ko hiel i ni leiin i thil mi hni chu thawng ka tih” a ta.
18 Mosie chun, “I ropuina chu mi hang inentir raw leh” a ta. 19 LALPA chun, “Ka thratna po po chu i hmaah inlangtir ka ta, i hmaa ngei kei LALPA chun ka hming puong dar ka tih. Ka lunginsiet taphot chu lunginsiet ka ta, zà ka ngaina taphot chungah zà ngâi ka tih. 20 Ka hmêl ruok chu hmu thei naw ti nih, ka hmêl hmua dam zing thei an um awm si nawh” a ta.
21 LALPA bok chun, “En ta, ka bula hin i ngǐr theina ding lungpui a um a, chu taka chun lo ngǐr rawh. 22 Ka ropuinain a hung fe pĕl lai che chun lungpui kara hin um la, ka fe khĕl hmâ khat chè chu ka kutin hup ka ti che a, 23 chun, ka kut chu la suok ka ta, ka hnung tieng hmung i ta, ka hmêl ruok chu i hmu ding a ni nawh” a ta.