Deut 16

Fekân Kŭt

1 “Abib thla chu thla serah hmang unla, hi thla hin zanah Aiguptaa inthokin a thruoi suok chêu leiin LALPA in Pathien Fekăn Kŭt chu hmang hlak ro. 2 LALPAN a hming innghatna hmun a la ruot dinga chun LALPA in Pathien Fekăn Kŭta hlănbieknaah in beram ruol le bawng ruol laia mihai chu inhlăn ro. 3 Chol thrang bei leh in fàk ding a ni nawh. Aigupta rama inthoka inhmaw taka in suok ni kha in dám sŭnga in hriet zing theina dingin ni sari sung chu chol thrang lo bei, tuorna bei in făk ding a nih. 4 Ni sari sŭng chu in ram sŭngah tu khomin chol an kol ding a ni nawh. A ni hmasa tak zan tienga ran in inhlăn sa chu a zing tieng chen in hlă ding a ni bok nawh.

5 Fekân Kŭta hlănbiekna chu LALPA in Pathienin a hming innghatna hmun a la ruot dinga chauh chun in inhlàn ding a nih. 6 Chu hmun chu aman la thlang a ta, taka chun Aigupta in suoksan ni champha zan tieng nisa tlâkin Fekân Kŭt hlănbiekna chu in thaw ding a nih. 7 LALPAN hmun a ruota chun raw hmin unla, fa un la, zîngkâr in puon inah inlâwi nawk ro. 8 Ni ruk sung chu chol thrang lo bei in făk ding a nih. A ni sarina chu LALPA in Pathien ta dinga inkhawmpui thienghlim ni’ng a ta, sin in thaw ding a ni nawh.

Pawl Kût/Chawlkar Kût

(Exo 34:22; Lev 23:15-21)

9 Bu in lăk tran nia inthoka chawlkar sarina chu inchik ro. 10 Chu ni chun LALPA in Pathienin mal a sawm dan chêu ang peia in tharsuok laia mi chu mani pĕk nuom tâwk seng inhlănin LALPA in Pathien ta dingin chawlkar kût in nei ding a nih. 11 LALPA in Pathienin a hming innghatna hmun a la ruot dinga chun nangni le in naupahai le in naunuhai, in bawipa le in bawinu hai, in umnaa um Levi hai, nangni laia um ram dang mihai, pa nei lohai le hmeithaihai leh LALPA in Pathien hmaah hlim takin um ro. 12 Aigupta rama khan bawi in nih ti hre zing unla, hieng thupêkhai hi fimkhur takin zui ro.

Bâwkte Kŭt

(Lev 23:33-43)

13 In hrizawl le grêp sawrna khura in tharsuok po po in hlŭ lût vong pha leh ni sari sung Bâwkte Kŭt hmang ro. 14 Nangni le in naupahai le in naunuhai, in bawipa le in bawinuhai, in umnaa um Levi hai, nangni laia um ram dang mihai, pa nei lohai le hmeithaihai leh Kût ni chun hlim takin um ro. 15 LALPAN hmun a la ruot ding hmuna chun LALPA in Pathien ta dingin ni sari in kŭt ding a nih. LALPA in Pathien chun in tharsuok po po le in kut sinthawna po poah malsawm a ti chêu a, in lawmna khom kim a tih.

16 Nangni laia pasal po po chu LALPA in Pathienin hmun a ruota chun ama hmaah kum tin voi thum in inlang ding a nih; chu chu chol thrang lo bei kŭta hai, chawlkar kûta hai le bâwkte kûta hai ni’ng a tih. Chun, LALPA hmaah tu khom kut ruokin in inlang ding a ni nawh. 17 LALPA in Pathienin malsawmna a’n dongtir chêu ang peiin mi tinin mani thei tawk an pêk seng ding a nih.

Rorêltu dinghai

18 “LALPA in Pathienin a pĕk chêu khaw tina chun hnam tinin rorêltu le hotu insiem unla, chuonghai chun mipui ro fel takin an rĕlpĕk ding a nih. 19 Indik lo takin ro an rĕlpĕk ding a ni naw a, ditsak bîk an nei ding a ni bok nawh. Thamna hrim hrim la naw ro; thamna chun mi varhai mit a sukdel a, mi indikhai thu khom a kei her hlak. 20 LALPA in Pathien ram pêk chĕu hi dama in hluo theina dingin indikna le felna chauh in zăwm ding a nih.

Pathien dang biek

21 “LALPA in Pathien maichăm in la siem ding bula chun Asera lim thing in phun ding a ni nawh. 22 LALPA in Pathien theidà zawng lung milim in phun ding a ni bok nawh.