4 “I hmêlma bawngchal amanih a sabengtung amanih invâk hmang i hmu chun a kuomah i hung khal kǐrpĕk nawk ngèi ngéi ding a nih. 5 I mi theida zawng sabengtung chu a phurin a del dè lai i hmu chun, ieng angin thrangpui rin la khom, thrangpui loin i fesan ding a ni nawh.

6 “Mi retheihai thubuoi indik naw takin in rĕlpĕk ding a ni nawh. 7 Khêla inhêknaah thrang ve naw unla, poi tawk lo le mi indikhai sukhlumtuah thrang naw ro, mi rilo chu ka’n suo naw ding a ni si a.

8 “Thamna la naw ro, thamna chun a hmutuhai mit a sukdel a, mi indikhai thu khom a hĕm kăwi hlak.

9 “Ram dang mihai nêksawr naw ro, nangni khom Aigupta rama mikhuola in um lai khan mikhuol ni umzie in hriet chieng ta si a.

10 “I lo chu kum ruk sûng nei la, a thar suok taphot sîk la, 11 a kum sarinaa ruok chu inlet lo le hmang loin inchawltir rawh; chu sunga sìk ding um chu mi retheihaiin fa ve thei an ta, an lăk mahla po chu ramsahaiin tlăn raw se. Chuong ang chun in grep huonhai le in oliv huonhai khom thaw ro. 12 Ni ruk sung in sin thaw unla, ni sarinaah chawl ro. Chuongchun in bawngchalhai le in sabengtunghai khom chawl ve thei an ta, in insŭnga pieng in bawihai le hnam dang mihai khom chawl hadam ve thei an tih. 13 In kuoma ka hril po po hi ngaiven unla, pathien dang hming hrim hrim lam naw unla, in băua inthok khomin mihaiin hre naw hrim hrim raw hai se.

14 “Kum khatah voi thum ka ta dingin kût hmang ro. 15 Chol thrang lo bei kùt hmang unla, thu ka pĕk tah ang chêu khan, ni sari sung chu chol thrang lo bei ring ro. Hi hi Abib thla sunga ni ruotah hmang unla, chu thla chu Aigupta rama inthoka in suokna thla a ni kha. Chun, ka hmaah tu khom kut ruokin in hung inlang ding a ni nawh.

16 “Loa in bu tharsuok hmasa takin Busîk Kŭt hmang ro. Chun, kum tawp pawl tlâka in lo tharsuok in hlu lût vong pha leh Pawl Kût hmang ro. 17 Kum khatah pasal po po Chunghnung tak LALPA hmaah voi thum an hung inlang ding a nih.

18 “Chol thranga siem thil hrim hrim leh ka kuomah hlànbiekna thisen inhlàn naw ro. Chun, kûta thil hlâna hmang thău rêng rêng chu a tûk zîng chenin sie ngai naw ro.

19 “In lo tharsuok hmasa tak laia a thra tak vong chu LALPA in Pathien kuomah hung chawi ro. Kĕl tuoi sâ chu a pui nenetuiin suong ngai naw ro.

20 “En ta, in lampuia vêng zing ding chêu le hmun ka buotsaia thruoi tlungtu ding chĕuin ka vantirko in hmaah ka hung tir ding a nih. 21 A thu poisa unla, ngaithla ro. A lakah hel naw ro, ama chun ka hming a put leiin in helna chu a ngaidam awm si naw chêu. 22 Amiruokchu, a thu in pom a, a hril taphot in thaw pei chun, in hmĕlmahai hmĕlma ni’ng ka ta, in dohai dotu ni bok ka tih. 23 Ka vantirko chun in hma thruoi pei a ta, Amor hai, Hit hai, Periz hai, Kanan hai, Hiv hai le Jebu hai umnaa chun thruoi tlung a ti chêu a, anni chu ka la sukbohmang daih ding a nih. 24 An pathienhai hmaah kûnin chawibiek naw unla, an thil chǐnghai chu chîng bok naw ro. Anni chu inram vong unla, an lung biekhai khom suknawi vong ro. 25 LALPA in Pathien rong chauh bawl unla, fak le dawnah sukhnienghnâr ka ti chêu a, nangni laia inthokin natna hri la hmang ka ta, 26 nau insiet amani le ching amani nangni lai um naw ti niu a, in dam kum khom a tluontlingin suksei ka tih.

27 “In hmaah ka triumna infetir ka ta, tu hnam khom in hmasuon taphot chu sukchî-ăi ka ta, in hmĕlmahai po po chu in hmaah intlansiettir ka tih. 28 In fèna ding lampuia um Hiv hai, Kanan hai le Hit hai hnot suoktu dingin in hmaah khuoivânriel tir ka tih. 29 Amiruokchu, kum khat sung chun hnot suok vong el naw ning, chuong naw chun a ram rausan vong an ta, in ta dinga ram sa trium hung tam taluong an tih. 30 A ram pum la thei khopa in hung pung hun chenin ahmatiemin in hmaa mihai pei hnot suokpĕk ka ti chêu.

31 “In ramri ding chu Tuipui Sena inthoka Filistinhai Tuipui1 chen le thlalera inthoka Tuipui^a chen khangpêk ka ti chêu a, chu rama umhai chu nangni kutah pe’ng ka ta, anni chu hnot suok in tih. 32 Anni amani le an pathienhai amani leh thu in thlung ding a ni nawh. 33 In ram sŭngah an um ding a ni bok nawh, chuong naw chun ka chungah hin suol inthawtir pal an ti chêu; in ta dinga châng trium chu an pathienhai biek a nih’ tiin” a ta.