GENESIS
Thuhma
Khawvela lekhabu po po laia do hlaw tak Genesis hi Baibula bu khatna, bung 50 le châng 1533-a sei, Pathienin hnuoi le van a hung inumtir dan, mihriem a siem tran dan, bawsietna leia suola mihriem a tlŭk dan, thina a hung lŭt dan le Abraham le an thuthlung hmanga chu thina laka sandamna lampui a hung buotsai dan le mihriem a hung enkol zui pei dan chanchin Mosien 1450-1410 B.C inkâra a ziek a nih. Grik tronga an inletin a hmingah ‘Genesis’ an inbŭk a, chu chu ‘thil bul’ tina a nih.
Hi lekhabu hi buk hnia thrè thei a nih. Bung 1-11 chena hin hnuoi le văn hung um tran dan le mihriem trobul chanchin, Eden huona Pathien thupek an bawsiet leia khawvela suol a lŭt dan chanchin a um a. Mihriem chanchina a pholênghai chu Adam le Evi, Kaina le Abel, Nova le tuilĕt le Babulon-a Babel Insang an bawl thu le an trong sukdanglam vonga a um leia mihriem an hung indar thu a nih.
Bung 12-50 sŭnga hin Israelhai trobul chanchin, Ur khuoa inthoka Abraham ko suoka a uma inthoka Kanan rama a thlahai an hung pung dan, a naupa Isak chanchin, Isak naupa Jakob nauhai sawmpahnia inthoka Israel hnam an hung suok dan, tràm tlâk leia Aiguptaa Jakob le a thlahai mi sawmsari vel an fe thlàk thu le chu taka umhmun khuora an um thu, Josefa chanchin le a thi chen thu a chuong.
Hi lekhabu hin Pathien chu iengkim siemtu, iengkim chunga thuneitu le rorêltu a nizie băkah a mihriem siemhai enkola thruoitu, an um dan ding rêlpêktu, malsawmtu le an suol phaa hremtu a nizie chieng takin a tăr lang.
A thu tlângpuihai
Hnuoi le van le mihriem intranna (1:1-2:25)
Suol hung lŭt tran dan le a kakhawk (3:1-24)
Adam-a inthoka Nova chen chanchin (4:1-5:32)
Nova le tuilĕt chanchin (6:1-10:32)
Babel Insang bawl thu (11:1-9)
Semaa inthoka Abram chen (11:10-32)
Thlatu Abraham, Isak le Jakob hai (12:1-35:29)
Esau thlahai (36:1-43)
Josefa le a unauhai (37:1-45:28)
Aiguptaa Israelhai an lut dan (46:1-50:26)