Lalpa mihai
7
1 LALPA in Pathienin in hluo ding rama a thruoi lut phâ chĕu, in hmaa nangni nêka lien lem le hrât lem hnam pasari, Hit hai, Girgas hai, Amor hai, Kanan hai, Periz hai, Hiv hai le Jebu hai a hnot suok pha le 2 anni chu LALPA in Pathienin in kutah pe a, in hnĕ hun pha chun, in inram vong tawl ding a nih. Inremna thuthlung siempui naw unla, zàngaina inhmutir bok naw ro. 3 Nuhmei pasalah in inneipui ding a ni naw a, an naunuhai chu in naupahai, in naupahai chu an naunuhai in inneitir ding a ni nawh. 4 Chuong naw chun, in naupahaiin an mi zui lai hi pathien dang be dingin thruoi kawi an ta, LALPA lungsenna chu in chungah inling a ta, a sukbohmang nghal el ding chĕu a nih. 5 An chungah hieng hin in thaw ding a nih: an maichămhai sukchim unla, an lung biekhai vaw koi unla, an pathiennu Aseraa lim thinghai chu phûr unla, an milim siem chop hai chu raw hmang vong ro. 6 LALPA in Pathien ta dinga hnam thienghlim in ni si a. Hnuoi chunga hnam po po laia a ro puol bik hnam dinga LALPA in Pathienin a thlang chêu in nih.7 “Hnam dang nêka in tam lem leia LALPAN ngainaa a thlang chêu a ni nawh; hnam po po laia a tlâwm tak in nih. 8 LALPAN a hmangai chêu lei le in pi le puhai kuoma inkhâm meua thu a lo tiem tah chu hlen a nuom lei lemin LALPA kut hrătin bawia in intăngna ram Aigupta lal Faraw kuta inthokin a’n tlan suok chêu a nih. 9 Chuleiin, LALPA in Pathien hi Pathien a nih ti hre ro; Pathien ringum, ama hmangaia a thupêkhai zawmtu chunga chu suon sang chen khoma a hmangaina thuthlung vong zing hlak le, 10 a theidătuhai ruok chu chop le chila thungrula sukbohmang hlaktu a nih; ama theidătuhai chu sawt riel loin, chop le chilin thungrul a tih. 11 Chuleiin, voisuna ka pĕk chêu thupêk hai, thusuok hai le dàn hai hi fimkhur takin zawm ro.
12 Hieng danhai hi ngaisak a, fimkhur taka in zawm chun, in pi le puhai kuoma inkhâm meua a tiem ang khan, LALPA in Pathien chun nangni laka a hmangaina thuthlung chu vong zing a tih. 13 Hmangaiin malsawm a ti chêu a, sukpung a ti chêu. In pi le puhai kuoma inkhâm meua pèk a tiem rama chun in rìla ra hai, in lo tharsuok bu le bâl le in uoiin thar le oliv hriek thar hai, in bawng tèhai le beram têhai chu malsawm a tih. 14 Hnam dang po po nêkin malsawmna dong nasa’ng in ta, a nuhmei a pasalin a ching um naw ti niu a, in ranhai khom te thruoi lo um naw ni hai. 15 LALPA chun hri po po la hmangpĕk a ti chêu a, Aigupta rama hrî pangzatum ang kha nangni chungah inlĕngtir naw ni a, nangni theidătuhai chungah inlĕngtir lem a tih. 16 LALPA in Pathienin in kuta hnam a pĕk ding chĕu po po hi in sukchimit vong ding a nih. Lunginsiet naw unla, an pathienhai rong bawl naw ro; in ta dingin châng an ni ding a ni si a.
17 “In lungrilin, ‘Hieng hnamhai hi eini nêkin an hràt lem si a, ieng tin am ei hnot suok dinga na?’ in ti khom a ni thei. 18 Anni chu trì naw ro: Faraw le Aigupta po po chunga LALPA in Pathienin a thaw kha hre zing ro. 19 Fiena nasa tak dam, inchikna mak dam, thil mak dam hmang a, kut hrăt chu phara LALPA in Pathienin a lak suok dan chêu mit ngeia hmutu in ni kha. LALPA in Pathien chun hnam dang in trihai chungah khang ang bok khan a thaw ve ding a nih. 20 Chu bâkah, a thi mahlà, inbi hmanghai khom bel hlum vong dingin LALPA in Pathien chun anni lai khuoivanriel tir a tih. 21 Anni chu trì naw ro, nangni laia thrang, LALPA in Pathien chu Pathien ropui le râpum a ni si a. 22 Chuong hnamhai chu LALPA in Pathien chun a zaiin hnot suokpĕk a ti chêu. Voi khat thilthuin inram vong naw ro, chuonga in thaw chun in vĕlah ramsa hung pung taluong an tih. 23 LALPA in Pathien chun anni chu pe’ng a ti chêu a, an chimit chenin sukchi-ai tawl a tih. 24 An lalhai in kutah pe’ng a ti chêu a, an hming chu vankhup hnuoia inthokin thai bo in ta, insukbohmang vong chenin dang theitu chêu tu khom um naw ni hai. 25 Pathien lim an tuk fawmhai chu in raw vong ding a nih. Chu taka tangkaruo amanih rangkachak amanih chu inhnar naw unla, in ta dingin in lăk ding a ni bok nawh. Chuong naw chun inâwk pal rawi in tih, LALPA in Pathien ngaia thil tirdakum a ni si a. 26 In inah thil tirdakum la lûtin chu thil ang boka sietna tuok ve dingin in insiem ding a ni nawh; namên loa tenin in theidă ding a nih, sietna tuok dinga ruot sâ an ni si a.