4 Mosie chun Israel thla pungkhawmhai kuoma chun, “Hi hi LALPA thupĕk chu a nih: 5 ‘In thil neia inthokin LALPA ta dingin thilpêk hung pe ro. Mani phal ang ang hung chawi ro: rangkachak, tangkaruo le dâr dam; 6 pat zai dumpawl, senduk le senlâr dam, puon zai inhmi dam, kèl hmul dam; 7 beram vun, rong sena nam dam le tui bawng vun dam; sitim thing dam; 8 khawnvara sit ding oliv hriek dam; hriek nàl phaa pol chi mawsawla le rimtui raw ding dam; 9 thiempu zakuo darbak le awmbela bel ding onik lung le lunghlu dang dang dam.

10 “Nangni laia kut themthiem po po hung unla, LALPA hril dan angin hienghai hi hung siem raw hai se: 11 biekbuk, a chung inkhumna le chu chunga inthuona ding dam, a man nghetna ding dam, a kâwm dam, banga hmang ding thingphĕk dam, a bangru dam, a ban dam, a ban thrut dam; 12 thuthlung bawm le a zawnfung le a chunga zangaina thrungpha le a zar hlietu ding puonzar dam; 13 dawkan le a zawnfung le a hmangruo po po le hlanbei dam; 14 khawnvar siena le a hmangruohai, khawnvar le a tuia hmang ding hriek dam; 15 rimtui răwna maichăm le a zăwnfung dam, hriek nàla hmang ding hriek rimtui le rimtui raw ding dam; biekbŭk lŭtna kota zar ding puonzar dam; 16 pumraw inhlanna maicham le dâr lên inphanhai, a zawnfung le bûr le bĕlhai dam; dâr maihŭn le a thrut dam; 17 tuolpûka zar ding puonzâr le a banhai le a thruthai dam; tuolpûk kota zar ding puonzâr dam; 18 biekbŭk puon in le a tuolpûk puon in kil dĕna hmangruohai le hruihai dam; 19 Hmun Thienghlima rongbawlnaa hmang ding silfen mawi tak taka khawnghai, thiempuhaiin rong an bawl huna hàk ding thiempu Aron silfen thienghlim le a naupahai silfen dinghai dam” a ta.

20 Israel thla pungkhawmhai chu an trìn dar a. 21 Lungrila pĕk nuomna neihai chun Intuokna Puon in le chu taka rongbawlna hmangruo ding le silfen thienghlim siemna dinghai chu LALPA hmaah an hung chawi khawm a. 22 An phal ang ang chu a nuhmei a pasalin rangkachak bânbun dam, nabê dam, suoi namna kutsebi dam, thri dam le incheina belmawi tinrêng dam le rangkachak tlang dam an hung chawi khawm a, LALPA hmaah thĕn thilhlânah^a an hung inhlàn a. 23 Chun, pat zâi dum pawl, sen duk le sen lâr hai, puon zai inhmi hai, kèl hmul hai, beram vun, rong sena nam dam, tui bawng vun hai dam, an nei taphot chu, an hung chawi khawm a. 24 Tangkaruo le dâr pe nuomhai chun LALPA kuomah an thilpekhai chu an hung chawi a, sitim thing neihai chun an nei ang ang chu an hung chawi bok a. 25 Pat them thiem nuhmeihai chun pat an kher a, chuong an pat kher a dum pawl, a sen duk le a sen lâr dam le pat zâi inhmi dam chu an hung chawi a. 26 Nu themthiemhaiin phûr takin kèl hmul kherin an thlùr a. 27 An hotuhai chun thiempu zakuo le a awmbela hmang dingin onik lung le lunghlu danghai chu an hung thaw khawm a. 28 Mawsawla dam, khawnvara sit ding oliv hriek dam, hriek nàla hmang ding hriek rimtui le raw ding rimtui an hung chawi bok a. 29 Chuong ang chun, LALPAN siem ding le thaw dinga Mosie kuoma a ti taphothai siemna dingin Israel mi, a nuhmei a pasalin, mani lungril puok suok ang peiin, LALPA kuomah thilpêk an hung chawi khawm a nih.

30 Mosie chun Israelhai kuomah, “Ngai ta u, Juda hnama mi Hura naupa Uria, chu naupa Bezalel chu LALPAN a thlang a, 31 ama chu chemkalna, theina le hrietna nei ding le kong tinrênga kut themthiemna nei dingin Pathien Thlarauin a sung sip a, 32 rangkachak le tangkaruo le dâr hmanga mawi taka thil siem dan ding riruong thiemna dam, 33 thiem taka lunghlu kera mawi taka zep thiemna dam, mawi taka thing chei thiemna hai le ze mawi hrang hrang siem thiemna hai damin a’n thuom a nih. 34 Ama le Dan hnama mi Oholiab, Ahisamak naupa chu mi danghai zirtir thiem theina a pêk bok a. 35 Anni chu thil tinrêng thiem taka siem thiemna dam, thaw ding thiem taka riruong lawk theina dam, pat zai dum pawl, sen duk le sen lâr le puon zai inhmi hmanga ze mawi taka khawng thiemna le thrui thiemna dam nei dingin lungril varnain a sung sip a.