3 “In tieng le ram tieng malsawm a ti chêu.

4 “In rìla rà malsawm a tih, in lo rà suok le in ran ruolhai, in bawngte le beramte hai leh.

5 “In bawm le bei in hmetna thlĕnghai malsawm a tih.

6 “In fe le hung, in suok le lŭt malsawm a tih.

7 “A dotu chĕu, in hmĕlmahai chu LALPAN hnĕpêk a ti chêu a, bei ding chĕua sîr khata inthoka hung inthokhai chu sir sari-ah tlân dar an tih.

8 “In bu in le in kut sinthawna iengkimah LALPAN malsawmna hung tir a ta; ram a pĕk chêua chun LALPA in Pathienin malsawm a ti chêu.

9 “In kuoma inkhâm meua a lo intiem tah angin, LALPA in Pathien thupêkhai in zawm a, a lampuihai in hraw phot chun, LALPA chun ama ta dinga hnam thienghlimah suknghet a ti chêu. 10 Khawvel hnam tinin LALPA hminga kohai in nih ti hrieng an ta, tri’ng an ti chêu. 11 Inkhâm meua pĕk chêu a tiem rama chun hnienghnârna tinrêngin vŭr a ti chêu a, in rǐla răhai, in ran ruolhai le in lo rà suokhai malsawm a tih.

12 “LALPA chun a hun takah in ram chawmtu ding ruotui pe ding chĕu le in kut sinthawhai po po malsawm dingin vana a hausakna zêngpui chu hung hongpêk a ti chêu a; chuongchun, hnam tam tak inpûktir in ta, nangni ruok chun pûk ve naw ti niu. 13 LALPA in Pathien thupêkhai ngaisak a, voisuna thu ka pĕk chĕu hai hi fimkhur taka in zawm chun, a mei ni loin a lu-ah LALPAN siem a ti chêu a, a mong dàp ni loin a chunghnung takah thrang rop in tih. 14 Pathien danghai be ding le an rong bawl dingin voisuna thu ka pêk chêu hai hi chang tieng amanih voi tieng amanih in pĕtsan ding a ni nawh.

15 “Amiruokchu, LALPA in Pathien thu in awi naw a, voisuna ka pĕk chêu a thupêkhai le dànhai hi fimkhur taka in zawm naw chun hieng trongsiehai hi in chungah hung tlungin nangchîng a ti chêu:

16 “In tieng le ram tieng trongsie phur in tih.

17 “In bawm le bei in hmetna thlĕnghaiin trongsie phur a tih.

18 “In rǐla rà chun trongsie phur a tih, in lo rà suok le in ran ruolhai, in bawngtè le beramte hai leh.

19 “In fe le hung, in suok le lŭtin trongsie phur a tih.

20 “LALPA chun in chungah trongsie le in kut sinthaw taphotah buoina le inhalna hung tir a ta, thil suol thawa in mi hnung son leiin suksietin um thut in tih. 21 Hluo dinga in lŭtna rama inthoka sukbohmang in ni hmâ khat chu LALPAN hrî inlĕngtir a tih. 22 LALPAN ngorna dam, khawsik le invŭngna dam, lum khawkhêng le trăwlna dam, tlolna le hmonna hri damin hrem a ti chêu a, in bohmang hmâ khat chu zui pei a ti chêu. 23 In chunga văn chu dâr angin inchang a ta, hnuoi chu kapathîr angin inchang a tih. 24 In rama ruotui chu LALPAN pilvut dipah inchangtir a ta, in bohmang hmâ khat văna inthokin in chungah pilvut insûrtir a tih.

25 “LALPAN in hmĕlmahai lakah suktlăwm a ti chêu a, anni chu sîr khatah inthokin bei in ta, sîr sariah tlansie’ng in ta, khawvel ram tinah mi pangzat ni’ng in tih. 26 In ruong chu chungleng vatehai le ramsahaiin tlăn hut hut an ta, a hawl zàmtu ding tu khom um naw ni hai. 27 Sukdam thei lo Aiguptaa khuoihli le pang inbâwkna dam, pânna huoisuol le inthak damin LALPAN hrem a ti chêu. 28 Invêtna dam, mitdelna dam le lungril buoina damin LALPAN hrem a ti chêu a; 29 sŭn changa khom thimthama mitdel inmai angin inmai in ta, in thaw taphotah hlawsam in ta, ni tin ni tina nĕksawr le rokin um in ta, santu ding hrim nei naw ti niu.

30 “Nuhmei dinga in huol chu mi dangin chang an ta, zălpui an tih. In bawl in ta, sienkhom hluo naw ti niu. Grep huon siem in ta, a rà sor hman naw ti niu. 31 In mithmua ngei in bawngchal that an ta, a sa hlek khom chang ve phăk naw ti niu. In sabengtung lakpêk an ti chêu a, hmu kîr nawk ta naw ti niu. In beramhai chu in hmĕlmahai kuomah pe’ng an ta, tu khomin san suok naw ni hai. 32 In naupahai le naunuhai chu hnam danghai pe’ng an ta, ni tin tina in thlirnain in mit chău zo a ta, thaw thei ieng khom nei si naw ti niu. 33 In ram rà suok le in sin inrimna ràhai chu in hriet ngai lohaiin tlăn an ta, ni tin tinin nĕksawr chauh hlaw’ng in tih. 34 Chuong in thil hmuhai chun sukvêt zo a ti chêu. 35 Sukdam thei lo khuoihlî na chiin in khùp le kè bawm a ta, in kekhonga inthoka in lu sîp chenin tuom a tih.

36 “Nangni le in lal chopin in pi le puhaiin an hriet ngai lo hnamhai kuomah LALPA chun salah thruoi a ti chêu a, chu taka chun pathien dang, thing le lunga siem chu bieng in tih. 37 LALPAN a khal darna ding chĕu hnamhai pangzat, hal kăwng le nuizatbûr ni’ng in tih. 38 In loah thlai chî thlâk treuh in ta, sǐka muol ruok chu nei naw ti niu, khàuin fa zo an tih. 39 Grêp chîng in ta, enkol in ta, sienkhom a uoiin dawn naw ti niu a, grêp rà khom lo bok naw ti niu, a nge-in an fak zo ding a ni si a. 40 In ram hmun tinah oliv huon nei inla khom a hriek sawr naw ti niu, oliv rahai chu an hlamtril zo ding a ni si a. 41 Naunu naupa nei in ta, sienkhom nangnin chang zo naw ti niu, salah an thruoi hmang tawl ding a ni si a. 42 In thei kŭng po po le in thlăi danghai chu khău honin fa kol vong an tih.

43 “Ram dang mi, nangni laia umhai chu insâng tuol tuol an ta, nangni ruok chu inhnuoi tiel tiel in tih. 44 Inpûktir an ti chêu a, nangni ruok chun inpûktir ve naw ti niu. Anni chu a lû ni’ng an ta, nangni chu a mei ni’ng in tih. 45 Hieng trongsie po po hi in chungah hung tlung a tih. LALPA in Pathien thu in awi naw a, a thupêkhai in zawm naw leiin a sukbohmang hmâ khat chêu anni chun hnot thlûrin nangchîng an ti chêu. 46 Chuong thilhai chu nangni le in thlahai ta dinga kumkhaw inchikna le thil mak ni zing a tih. 47 In hnienghnăr hunah LALPA in Pathien rong chu hlim tak le lawm taka in bawl naw leiin, 48 phingtrâm le dangchâr, saruok le rethei mong tolin LALPA hung tirh in hmĕlmahai rong chu bawl in tih. A sukbohmang chêu hmâ khat chu in rǐngah thir kol inbâttir a ti chêu.

49 LALPA chun ram hla tak, hnuoi tawpa inthokin nangni bei dingin hnam dang, an trong khom in hriet ngai nawhai chu hung tir a ta, mupui inbir thla angin hung thrâm an ti chêu; 50 anni chu upa inzăna le naupang lunginsietna nei lo, hnam kolsen tak an nih. 51 In ram vong hmâ khat chenin in ranhai le in ram tharsuokhai fa’ng an ta, bu le bâl le uoiin le hriek le in bawng le beram inte tharhai chu hlà hrim nei naw ni hai. 52 In ring zo êm êm in khuo inhuonna kul bang insanghai chu a chim vong chenin LALPA in Pathienin a pĕk chêu ram sunga khuo po po chu inhuol an tih.

53 “In hmĕlmahaiin dangchêpa an inhuol lai chêua in rimsik tuor leiin, LALPA in Pathienin a pĕk cheu in rǐla ra, in naupahai le naunuhai sa chu fa’ng in tih. 54 Nangni laia pa zaidam tak le inzaum tak khomin a unau amanih, a nuhmei dit tak le a la umpui a nauhai takngiel khom lunginsiet naw nih. 55 In hmĕlmahaiin nasa taka in khuohai dangchêpa an inhuol leiin, a nauhai sa chu a thil nei sun a na, tu khom sem phal naw nih. 56 Hmêlmahaiin kul kotkhar an inhuol a, an dangchêp tlat leia iengkim in tlăksam tak lei chun, nangni laia nu hausa, zaidam le vengvâ, a um inno leia kea hnuoi sir ngai lo khom chuong ang tho chun um ve’ng a ta, a nauhai sa chu a rûka fàk a nuom leiin, a pasal dit tak dam, a naunuhai le naupahai dam chu thlim a ta, 57 a naute pieng hlim sa le a hlamzui naute bawm chenin arûkin fa’ng a tih.

58 “LALPA in Pathien hming ropui tak le râpum tak chu inzà lo a, a dàn thu, zieka umhai hi fimkhur taka in zawm naw chun, 59 LALPAN nangni le in thlahai chungah hrî mak tak tak le na tak tak dam, sietna inkieng el thei lo dam, natna khir tak, dam mei mei thei lo dam chu inlĕngtir a tih. 60 In trî hlè hlak Aiguptaa hrîhai kha in chungah inlĕngtir a ta, inthlà naw ni chêu. 61 Sukbohmang in ni chenin, hi Dan Bu-a chuong lo natna le sietna mak tak tak hai khom inlĕngtir bok a tih. 62 LALPA in Pathien thû chu in zawm naw leiin, văna arasi zât ni hlak kha tlawmte chauh hung ni ta’ng in tih. 63 LALPA chun sukhnienghnar le sukpung chêu a nuom ang bokin sukse le sukbohmang chĕu khom hung nuom ta’ng a ta, lûta in va hluo ding rama inthok chun son hmang a ti chêu.

64 “LALPA chun kawlkila inthoka kawlkil khing tieng tawp chenin chi tin lai sukdar a ti chêu a, chu taka chun thing le lung, in pi le puhai khoma an hriet ngai lo pathien danghai chu bein an rong bawl in tih. 65 Chuong hnamhai lai chun hadamna hrim hrim hmu naw ti niu a, in ke ta dingin chawlna hmun hrim um naw ni a, chu taka chun lungrila lungkhamna dam, khawsawt leia mit chăuna dam le lung dong kor korna dam pe lem a ti chêu. 66 Ieng lai khom tri dor dorin, sŭn le zăn thlaphângnaa sipin, iem in chang ding ti hrim hre loin, khawsa’ng in tih. 67 In lungrila tritna lei le in mita in thil hmuhai lei chun, zing tieng po leh, “Zan tieng ni ta sien aw!” ti’ng in ta, zan tieng po leh “Zing tieng ni ta sien!” ti’ng in tih. 68 Kîr nawk ta ngai lo dinga ka hril chêu Aigupta rama chun longin LALPAN tir kîr a ti chêu. Chu taka chun in hmĕlmahai bawipa le bawinu ni dingin inzor in ta, sienkhom tu khomin inchaw nuom naw ni hai chĕu.”