Hmangaina
13
1 Mihriem trong le vantirko tronghaiin thu hril thei lang khom, hmangaina ka nei si naw chun dâr rî amani, dârbenthek rì amani ang chauh ning a tih. 2 Thuhril theina thilpêk neiin, thu inthup po po le hriet ding po po hre vong lang, tlâng son theina khop hiel ringna nei lang khom, hmangaina ka nei si naw chun ieng khom ni naw ning. 3 Ka nei po po pasiehai ta dingin pe vong lang, uongpui dingin ka taksa meiah inhlàn lang khom, hmangaina ka nei si naw chun ka ta dingin ieng khom a tlâktlăi nawh.4 Hmangaina chun a dawthei a, hmangaina chu a ngilnei. Hmangaina chun a thîk naw a, mani inpăk a thaw ngai nawh. Hmangaina chu a chapo naw a, 5 mawi naw takin a chăng ngai nawh. Hmangaina chun mani hma a siel naw a, hmangaina chu a lung a sen mei mei nawh. Hmangaina chun mi thaw suol a’n chik zing naw a, 6 suol a lawm naw a, thutak ruok chu a hlimpui hlak. 7 Hmangaina chun a hliekhu tlat a, a ringzo tlat a, a beisei tlat a, iengkim a tuor muolsuo hlak.
8 Hmangaina chu chatuon dai a nih. Thuhrilnahai ruok chu suktawp la ni’ng a ta, trong hriet lohai khomin rè hun la nei a ta, hrietnahai khom la tawp a tih. 9 Tu hin a thren chauh ei hriet a, a thren chauh ei hril hri a. 10 Famkimna a hung tlung pha chun famkim lona hi bo tang a tih. 11 Ka naupang lai khan naupang trongin ka trong a, naupang lungril ka put a, naupang ngaituo dan angin thil ka ngaituo hlak; ka hung puitling hnung ruok hin chu naupang thaw dan chu ka bănsan tah. 12 Tu hin chu darthlalanga phe ruoia ei inhmu ang hin ei hmu hri a; chu phâ ruok chun inhmatonin hmu ta’ng ei tih. Tu hin chu a thren chauh ei hriet hri a, chu phâ ruok chun Pathienin a mi hriet chieng angin la hre chieng ei tih.
13 Chuongchun, hieng thil pathum ringna, beiseina le hmangaina hai hi um zing a ta, chuhai po laia ropui tak chu hmangaina a nih.