Hemdè Isu thu ril
2
1 Unauhai, Pathien thu ril inhriettir dinga in kuoma ka hung khan bâu themthiem bǐk le var bîk angin ka hung naw kha. 2 In kuoma ka chăm sung khan Isu Krista le ama ngei kraws-a hemde a ni thu chauh naw chu ieng dang hriet ni ka tum bok nawh. 3 In kuomah hrât naw tak le tri le inthin dor dorin ka hung a, 4 ka thucha le thuhril iengkimah varna le trongkam tlor ka hmang naw a, Thlarau thilthawtheina suklang zawngin ka hril hlak kha; 5 in ringna chu mihriem varnaa innghat ni loa Pathien thilthawtheinaa innghat a ni lemna dingin.Pathien varna
6 Puitling lai ruok chu varna thu kan hril hlak kha, chu chu tu lai mihai varna thu le tlawm el ding an hotuhai varna thu khom a ni bok nawh. 7 Pathien varna inthup le inril chu kan hril a, chu chu ei ropuina dinga khawvel siem hmaa inthoka Pathienin a lo ruot lawk tah chu a nih. 8 Chu chu hi khawvela rorêltu tu khomin an hriet nawh, hrie ni hai sien ropuina Lalpa chu hemdè naw ni hai.
9 Pathien Lekha thuin,
‘Mita hmu ngai lo, naa hriet ngai lo,
Lungrila an la phan phăk lo,
Ama hmangaituhai ta dinga Pathienin a buotsaipek chu’ Isa 64:4
a ti thu chu kan hril lem a nih.
10 Chuong thu chu ei kuomah Pathienin Thlarauin a hung puong tah a. Thlarau chun iengkim, Pathien inrilna khom a dap suok hlak. 11 Mihriem ngaituona chu amaa um thlarau chauh naw chun tuin am a hriet a? Chuong ang bokin, Pathien ngaituona khom Pathien Thlarau chauh naw chun tu khomin an hriet nawh. 12 Khawvel thlarau ei dong naw a, Pathiena inthoka suok Thlarau chu ei dong lem a nih, Pathien thilthlawnpekhai ei hriet thiem theina dingin. 13 Mihriem varnaa thu an inchuktir hlak chu hmang loin, Thlarau inchuktir thu chu hmangin kan hril lem a, thlarau mihai kuomah thlarau tieng thil kan hril fie hlak. 14 Tisa mi chun Pathien Thlarau thil ieng khom a lawm naw a, a ta ding chun thil invêtthlak el a na, thlarau chaua hriet thei a ni leiin a hriet thei bok nawh. 15 Thlarau mi ruok chun iengkim a bûk thiem a, ama chu mihriem tu khom soisel ruol a ni si nawh.
16 Tuin am Lalpa lungril hre a,
Ama chu zirtir ding? Isa 40:13
Eini ruok chun Krista lungril ei put a nih.