Thlamuongna thu
40
1 “Ka mihai hi thlamuong rawh,A nih, hnĕmin thlamuong rawh”
In Pathienin a ti a nih.
2 “Jerusalem kuoma chun,
Thlamuongna thu hril unla,
A tuor inrim hun a kin ta a,
A suolhai ngaidam a ni ta a,
A suol man bat a lêt hniin,
LALPAN an tuortir zo tah.
3 Rawl chun hieng hin a tih:
“Thlalĕrah LALPA lampui ding buotsai ro;
Ei Pathien lamlien ding chu,
Thlalĕrah ngîl takin rel ro.
4 Ruom tinhai sung sip unla,
Tlâng le muolhai rawt hnuoi unla,
Lam kawihai siem ngîl unla,
Hmun khokrokhai siem ruol ro.
5 LALPA ropuina chu,
Suklangin hung um a ta,
Mi tinin hmu seng an tih”
Tiin LALPA băuin a hril.
6 Rawl chun, “Khêk rawh” a mi ta,
“Iem ka khĕkpui ding?” ka ta.
“Mi po po hlobet ang an na,
An ropuina po po khom,
Phŭla hlo pâr ang a nih.
7 LALPA thuokin a mût a,
Hlo hring chu a hung vuoi a,
A pàr chu a hung tril hlak.
Mi tin hi hlo hring ang an nih.
8 Hlo hring chu a hung vuoi a,
A pàr chu a hung tril a,
Ei Pathien thu ruok hi chu,
Chatuonin um zing a tih” tiin.
9 Aw nangni Zion tlangpuia,
Chanchin thra hung intluntuhai,
Tlang sanga khin hang lawn ro.
Aw nangni Jerusalema,
Chanchin thra hung intluntuhai,
Inring takin khêk unla,
Khêk inring zuol sauh unla,
Ieng khom tri hrim hrim naw ro.
Judai ram khuoa hai chun,
“En ro, in Pathien a hung!”
Tiin khaw tinah hril ro.
10 En ta u, Pathien Ropuitak chu,
Thilthawtheina leh a hung,
A kut hrăt chun ro a rĕl.
A lawmman a kuomah a um,
A thungrulna khom a um bok.
11 Ama chun berampu angin,
A mihai chu chawm a ta,
Beramtehai chu kuta chawiin,
A ângsûngah pom a ta,
A tehruoi nei lai hai chu,
Damten thruoi diel diel a tih.
12 Tuin am tui tamzie hi,
Kutphain a’n khì thei a?
Tuin am van insangzie,
Tongin a’n khi thei hlak a?
Tuin am hnuoi pilvut hi,
Bawma khaia inkhiin,
Tlang le muol rikzie hre din,
Phahlaah a bûk hlak a?
13 Tuin am Pathien lungril,
A hriet suok thei hrim hrim a?
Tuin am thurawn pein,
A thaw ding a hril hlak a?
14 Ama chun bengvarna di’n,
Tu’m a rawn hlak hrim hrim a?
Tuin am lampui indik,
A kawkhmu hlak hrim hrim a?
Tu’nam hrietna zirtirin,
Hrietthiemna lampuihai chu,
A kawkhmu hlak hrim hrim a?
15 Hnamhai chu baltrîna tui,
Far khat ang chauh hi an na,
Phahlaa pil hlek kai ang chauh,
Hriet khop loa ngai an nih.
Thlierkarhai chu pilvut angin,
Ama chun a thrâm hmang a.
16 Lebanon chu maichăm meia,
Tì thama khom a ruot naw a,
A ran ruolhai po po khom,
Pumraw thilhlâna dingin,
Hmang thamah a ngai bok nawh.
17 Hnam tinrêng khom a hmaah,
Iengma tham an ni naw a,
Iengma lo nêka tlawm lem,
Boruok le thil huom ang an nih.
18 Pathien chu tu le hrim am,
I hrilkhi ta ding a na?
An naw leh ieng le hrim am,
I tekhi ta ding a na?
19 Mi lim chu kuta an ser,
Rangkachaka inluon khum,
Tangka khaidiet an siempek,
Themthiem kutsuok vong a nih.
20 Chuong ang thaw zo nawhan,
Hmon lo ding thing an zong a,
A ker thiemhai an ruoi a,
Tlu lo dingin an siempek a.
21 Chu chu in hriet ngai naw maw?
Ieng leia in hriet thiem naw?
A tira inthok khomin,
An lo hril ngai naw cheu maw?
Leihnuoi insieng a’nthok khan,
In hriet thiem naw hrim a ni?
22 Ama chu hnuoi khup khumtu,
Van khup chungah a thrung a,
Mihai a zuk hmu dan chun,
Khauthrikthrî ang chauh an nih.
Ama chun puon hlap angin,
Vanhai khi a kei phar a,
Chengna hmun dinga siemin,
Puon in angin a zar a.
23 Ama chun mi lienhai chu,
Iengma loah a siem a,
Khawvel rorêltuhai khom,
Ieng khom loah a siem hlak.
24 A phun a, a phawi nawk a,
A tu a, a lâk hmang a,
Zung an kei hma’n a phawi a,
Ama chun a mût vuoi a,
Thrawngaleivirin bupawl,
A lèn angin a lèn hmang hlak.
25 “Tu le’m mi hrilkhing in ta?
Tu am ka tlukpui a um a?”
Tiin Mi Thienghlim chun a’n don.
26 Van tieng mit hang inlĕn t’u,
In hmuhai khi tu siem zozai?
Ama chu văn lêngruolhai,
A dot dota thruoi suok theitu,
An hming sengah kotu a nih.
A thilthawtheina ropui le,
A hratna nasa tak leiin,
Pakhat khom an bo ngai nawh.
27 Iengti leia aw Jakob,
Iengti leia aw Israel,
“LALPAN a mi hriet fuk nawh,
Ka thu a ngaithlak ta nawh”
In ti el hlak am a na?
28 LALPA chu chatuon Pathien,
Hnuoi kil tawp chen khom Siemtu,
Chău thei lo, sâwl thei bok lo,
A hriet thiemna inthukzie,
Inkhi ruol a ni nawzie,
In la hriet naw am a ni?
29 Chăuhai hrătna a pêk a,
Hrâtnawhai a sukhrăt a.
30 Tleirawl sawlin an châu a,
Tlangval khom an tlu dĕr hlak;
31 LALPA nghaktuhai ruok chun,
Hrătna thar dong pei an ta,
Mupui angin văn sângah,
Vuongin inher sâng an ta,
Sâwl loin tlân pei an ta,
Chău loin kal châwi an tih.