64
1 Vàn kei thlêrin hung trum la,Ka va hang ti ngei de aw!
I hma bulah tlanghai chu,
An inthin dur dur awm si!
2 Thukah thing trawl ei ti a,
Tui ei suong so bor bor anga,
I hmêlmahai hin i hming,
An hung hriet theina ding le,
Hnamhai chu i hma bulah,
An inthin hlop hlopna dingin,
Hung trum la ka nuom a nih.
3 Tien lai khan i hung trum a,
Kan beisei nêka nasain,
Thil râpthlăkhai i thaw a,
Tlânghai khom i hma bulah,
An inthin dur dur hlak kha.
4 Tiena tlanga inthok khan,
Nang Pathien chauh naw hi chu,
Anni nghaktuhai ta dinga,
Hieng ang thil thawpek hlak hi,
Tu khom an hriet ngai naw a,
Nain an la hriet ngai naw a,
Mitin an hmu ngai bok nawh.
5 Lawm taka thil fel thaw a,
I lampui hrawtuhai chu,
Nangman i thrangpui hlak a.
Sienkhom i lampui hraw loa,
Kan hung suol zui pei hnungin,
Kan chungah i lungsen a.
Iengtin am keini rawi hi,
Sandam ni thei tang kan ta?
6 Kan rêng el hin mi porchè,
Kan lo ni tawl ta vong a,
Felna thil kan thawhai khom,
Suontriek bal ang chauh a na,
Hnatrawng angin kan rop a,
Kan suolna chun thli angin,
A mi lèn hmang hlak a nih.
7 I hming kan lam ta naw a,
Nangma chel tuma bei hrim,
Tu khom kan um ta bok nawh;
Kan lakah i hmêl i thup a,
Kan suolnaa zûr hmang dingin,
I mi lo pèk suok tah a nih.
8 Chu khom chu ni sien LALPA,
Nang chu kan Pa i ni tlat si.
Keini hi bepil kan na,
Nang chu bêlhemtu i na,
I kutsuok vong kan ni hi.
9 Aw LALPA kan chunga hin,
I lung sen talaw naw sien,
Kumkhuoin kan suolnahai,
Mi hrepek zing naw hram la,
Mi zuk en nâwk hràm rawh khai,
I mihai kan ni si a.
10 I khawpui thienghlimhai chu,
Thlalĕr an lo inchang zo ta a,
Zion khom thlalĕr inchangin,
Jerusalem chu rausan khawpui,
A lo inchang hman dĕr tah hi!
11 Kan thlatuhan an inpàkna che,
Tempul ropui le thienghlim chu,
A lo kàng ram vong ta a,
Kan hlut rosum po po khom,
A kàng ram tah vong a nih.
12 Hieng sa khom hin aw LALPA,
Kut i kei tîm zing ding maw?
To zingin, tawpintái nei loin,
I mi hrem zing tawl ding maw?