2 Korinth khuoa Pathien Kohran, Krista Isua sukthienghlim, mi thienghlim ni dinga ko le Lalpa Isu Krista, anni le keini Lalpa hming lamtuhai po po chibai kan bŭk chêu. 3 Pathien ei Pa le Lalpa Isu Kristaa inthoka lunginsietna le inremna chu in kuomah um raw se.

4 Krista Isua lunginsietna a pĕk chêu leiin in ta dingin ka Pathien kuomah lawmthu ka hril rop hlak. 5 Amaa chun kong tinrêngah, thuhrilna tieng le hrietna tinrêngah, sukhausakin in um a, 6 in kuoma Krista thu kan hung hril khan nangniah zung a kei nghet tah a. 7 Chuleiin, ei Lalpa Krista hung inlang ding phûr taka in nghăk sung hin thlarau thilpek ieng khom in tlasam naw hi. 8 Ei Lalpa Isu Krista nia soisĕl boa in um theina dingin a tawp chenin sukhrât a ti chêu. 9 A Naupa, ei Lalpa Isu Krista le inpawlnaa ko luttu chêu Pathien chu a ringum a nih.

10 Unauhai, nangni lai inthrĕna um loa, lungril le ngaituona hmun khat put dingin ei Lalpa Isu Krista hmingin ka ngĕn chêu a nih. 11 Ka unauhai, nangni lai insêl inhalna a um ti Kloi sunghaiin an mi hril a. 12 Ka hril chu, ‘Kei Paula pawl, kei Apollo pawl, kei Kifa pawl, kei Krista pawl’ in inti thrǐm thrêm tawl hi a nih. 13 Krista chu thrĕin a um am a ni?^a In ta dingin Paula chu hemdĕ a ni maw? Paula hmingin baptisma in chang am a ni? 14 Krispa le Gaia naw chu nangni lai tu khom ka baptis naw leiin ka lawm. 15 Chuong naw chun tuhaiin amanih ka hminga baptisma chang angin lo inhril pal rawi an tih. 16 Stefan sunghai khom ka baptis takluo kha. Chuonghai ti naw chu tu khom ka baptis ka hriet nawh. 17 Krista chun baptis dingin a mi tir naw a, Chanchin Thra hril dingin a mi tir lem a nih. Mihriem varna hmanga hril dingin a mi tir nawh, Krista kraws thilthawtheina chu ieng khom loa an ngai pal nawna dingin.

18 Kraws thu chu bohmang mĕkhai ta ding chun thu invêtthlak a na, eini sandama um mekhai ta ding ruok chun Pathien thilthawtheina a nih.

20 Khaw la’m in tu lai mi varhai, mi thiemhai le thu vai theia in neihai chu an um a? Hi khawvel varna hi Pathienin invêtthlakah a siem tah annawm a ni? 21 Pathien var dan le a lawmzawng chu- khawvelin varna hmanga Pathien an hriet thei ta naw hnunga keini thu hril invêtthlak hmanga a ringtuhai sandam hi- a nih. 22 Judahai chun inchikna thilmak an phût kher hlak a, Grikhai hlak chun varna ngot an zong a, 23 keini ruok chun hemde Krista thu chu kan hril lem hlak a nih; chu chu Judahai ta dingin dâltu a na, Jentelhai ta dingin thil invêtthlak a ni bok a. 24 Amiruokchu, Juda mi khom ni sien, Grik mi khom ni sien, Pathienin a kohai ta ding chun Krista chu Pathien thilthawtheina le Pathien varna a nih. 25 Pathien invĕtna chu mihriem varna nêkin a var lem a, Pathien hrât nawna khom mihriem hrâtna nêkin a hrât lem si a.

26 Unauhai, ko in ni laia in ngirhmun kha ngaituo ro, nangni laia mi tam tak hi mihriem inkhǐnaa chu mi var in ni naw a, mi thilthawthei tak khom in ni naw a, sungkuo thraa inthoka hung khom in ni bok nawh. 27 Nisienlakhom, Pathienin khawvel ngaia thil invêtthlakhai chu mi varhai sukmuolphona dingin a thlang a; khawvel ngaia thil ongrophai chu thil hrâthai sukmuolphotu dingin a thlang bok a. 28 Thil um ta sahai chu ieng khom loa a siemna dingin hi khawvela thil hnuoihnung le hmusitum le thil um lohai chenin a thlang bok a nih, 29 Pathien hmaah tu khom an uong thei nawna dingin. 30 Nangni ruok chu Ama zarin Krista Isua chun in um tah a, ama chu Pathiena inthoka ei varna, ei felna, ei thienghlimna le ei intlanna a hung ni ta si a. 31 Chuleiin, ‘A uong nuom taphot chun Lalpa uongpui raw se’ ti ziek khom a ni kha.