Kohran inthrèna chungthuah
3
1 Unauhai, thlarau mihai kuoma ka hril angin in kuomah ka hril thei naw a; tisa mi, Krista ringnaa naute la nihai kuoma hril angin ka hril hlak chêu a ni kha. 2 Bu changrum in la făk phăk naw leiin nenetuiin ka chawm hlak chêu a; tu chen khom hin in la făk thei nawh. 3 In la tisa mi ĕm lei a nih. Nangni lai inthîkna le inhalna a um zing sung chun tisa mi, khawvel mi taka la khawsa in nih tǐna a ni naw’m a ni? 4 Nangni lai “Kei Paula pawl ka nih, kei Appolo pawl ka nih” ti dam in la um sŭng chun in la tisa mi hlĕ tǐna a ni naw maw?5 An leh Appolo chu iem a na? Paula khom chu iem a ni bik leh? In ring theina dinga rongbawltu chauh an nih; chu khom chu Lalpan thaw ding chan a pĕk ang peia thok an nih. 6 Keiin ka phun a, Appoloin tuiin a chawm a, sienkhom Pathienin a’n thranglientir a nih. 7 A’n thrangtirtu Pathien chauh naw chu a phuntu le a chawmtu chu ieng khom an ni nawh. 8 A phuntu le a chawmtu thil tum chu thuhmun a na, an sin inrim ang hû peiin lawmman hmu ve ve’ng an tih. 9 Pathien ta dinga thaw tlâng kan ni a, nangni hi Pathien lohma le Pathien in bawl chu in nih.
10 Pathienin lunginsietna a mi pĕk ang peiin, in bawltu themthiem tak angin keiin a lungphŭm ka phŭm a, chu lungphŭm chunga chun mi dangin an hung bawl a; sienkhom an bawl dan thuah fimkhur seng raw hai se. 11 Lung rem ta sa naw chu tu khomin lungphŭm dang an phŭm thei nawh, chu lungphŭm chu Isu Krista a nih. 12 Chu chunga chun miin rangkachakin amanih, tangkaruoin amanih, lungmantamin amanih, thingin amanih, sâwlhnain amanih, bupawlin amanih a bawl a ni chun, 13 mi tin sinthaw thrat le thrat naw dan chu la’n lang fie’ng a tih; Krista Ni-ah sukchieng a la ni ding a ni si a, meiin a’n lăr ding a ni leiin. Mei chun mi tin sinthaw chu fie seng a tih. 14 Tu in bawl khom a kăng naw chun, chu mi chun lawmman hmung a ta; 15 tu in bawl khom a kăng chun chu mi chun chân a ta, ama tak ruok chu sanhim ni hrâm a tih, mei pal tlang ang elin.
16 Pathien chêngna tempul in ni le Pathien Thlarau nangniah a chêng ti in hriet naw’m a ni? 17 Mi tu khomin Pathien tempul chu a sukkhawlo chun Pathienin ama khom sukkhawlo ve’ng a tih, Pathien chêngna tempul chu a thienghlim si a; chu tempul chu nangni in nih.
18 Tu khomin mani inhlêm naw ro. Nangni lai tu khom hi khawvel ngaia var nia inhrie chu a hung var tak tak theina dingin invêt hmasa phot raw se; 19 hi khawvel varna hi Pathien mita chu thil invĕtthlăk a nih. “Ama chun mi varhai chu an var verveknain a âwk hlak” ti ziek a ni si a. 20 “Lalpa chun mi varhai ngaituona chu iengma lo el a nih ti a hriet” ti a ni bok a. 21 Chuleiin, tu khomin mihriem chu uongpui ta naw raw hai se. Iengkim hi in ta vong a nih. 22 Paula amanih, Appolo amanih, Kifa amanih, khawvel amanih hringna amanih, thina amanih, tu hi amanih, la hung tlung ding amanih, a rêngin in ta vong a nih. 23 Nangni chu Krista ta in na, Krista chu Pathien ta a nih.