29
1 Davida khawpui chungpiknaE khai, nang Ariel, Ariel,
Davida chĕngna khawpui,
I chung a va hang pik ngei de!
Kum tinin, kum tin elin,
In kŭt hunhai tlung pei raw se.
2 Sienkhom, Ariel inhuol ka ta,
Lusûnin trap inrûm a ta,
Ama chu ka ta dingin,
Maichàm thuk ang ni’ng a tih.a
3 Bei dingin inhuol ka ti che a,
I vêlin hnuoi sung pawng ka ta,
Thramte daw huol khum ka ti che.
4 Hnuoi rila inthoka trong angin,
I rawl chu pilvut laia inthokin,
Damtein hung inri suok a ta,
Hnuoi sunga inthoka thlarauin,
A hung biekruk ang ela damin,
Pilvut lai i rawl hung suok a tih.
5 Sienkhom, nangma dotuhai chu,
Pilvut dip ang inchang an ta,
Mi tawrot ruolhai po po chu,
Busi lèn dar ang la ning an tih.
6 Mit khap kar loin, inrang takin,
LALPA Iengkimthawthei chun,
Vaninrum dam, lirnghing dam,
Ri nasa tak le thrawngaleivir dam,
Thlipui le kang hmang thei meiin,
A hung kan ding che a nih.
7 Ariel dotu hnamhai po po,
Ama le a kulbing beitu po po,
A suklungzingtu po po chu,
Zàn mang ang inchang an tih.
8 Phingtrâmin mangah bu a fâk a,
A har pha a khop chuong naw a,
Dangchârin mangah tui a dawn a,
A har pha a lo la chàu zing a,
A dangchâr a rè naw angin,
Zion tlang beitu hnam po po khom,
Chuong ang chu la ning a tih.
9 Maktiin ka-hâk ro!
In mit âr-intrà sien la,
In mit sukdel lâw lăw ro!
Uoiin dawn phâk si loin,
Inrui hriel hrep tawl unla,
Rakzu intem si loin
Pêm tliei tlieiin lawn ro.
10 LALPAN imu thukna hrivoi,
In chungah a buok ta si a;
Zawlneihai mit a tuompek a,
Hmutheituhai lu a khupkhum.
11 Hieng inlàrna po po hi in ta dingin lekhabu chăr tlat sunga thu ang a nih. A tiem theituhai kuomah chawi a, “Mi tiempek hram raw khai” in ti chun aman, “Ka tiem thei nawh, chàr tlat a ni hih” ting a tih. 12 Chun, a tiem thei nawtu kuomah in chawi a, “Mi tiempek hrâm raw khai” in ti chun aman, “Lekha ka tiem thei nawh” ting a tih.
13 LALPA chun hieng hin a tih:
Hi mihai hin băuin an mi hnai a,
An hmŭrin an mi chawimawi a,
Lungrilin an mi hlat hle si.
An mi chawibiekhai khom hi,b
Mihriemin an inzirtir dan anga
An thaw vèl mei mei a nih.
14 Chuleiin, hi mihai lai hin,
An lung sukthrawngna dingin,
Thilmak dang dang thawng ka tih:
An mi varhai varna la bo a ta,
An mi thiemhai thiemna khom.
15 LALPA laka an thil phan rŭk,
Thup tumtuhai chung chu a pik!
A rûka an thawa ngaiin,
“Tuin am mi hmu thei a ta?
Tuin am a mi hriet?” an tih.
16 A letlingin thu an lak a nih!
Bepilin a hemtu a tluk hlak maw?
Thilsiemin a siemtu kuomah,
“I mi siem ka ni teu nawh”
A ti hlak hrim hrim a ni?
Thilsiem chun a’n dintu kuomah,
“Ieng khom hriet i nei dĕr nawh”
A ti hlak hrim hrima maw?
17 Sawtnawteah Lebanon chu,
Lo hnienghnarah inchang a ta,
Ramngaw angin zîng dur a tih.
18 Chu ni chun nasêthaiin,
Lekha tiem ri hrieng an ta,
Thima thrung mitdel mit khom,
Hung varin hmu tang an tih.
19 Retheihai chun LALPA-ah
Lawmna thar hmu nawk an ta,
Israel Mi Thienghlim hmaah,
Pasehai khom hlim an tih.
20 Mi tawrot rè tang an ta,
Hmusittu bo tang an ta,
Suol thaw ding meltuhai chu,
Săt thlâkin um tang an tih.
21 Mi dang suola intum chîng,
Rorêltuhai khal âwk a,
Mi dik khom thu hmang loa,
Intuortir hlaktuhai chu,
An rêngin bo tang an tih.
22 Chuleiin, Abraham sansuoktu LALPA chun Jakob sungkuo chungthu chu hieng ang hin a hril a nih:
Jakob muolpho ta naw ni a,
A hmai mâwk ta ngai naw nih.
23 Ka pêk ngei a nauhai chu,
Anni lai a hmu pha chun,
Ka hming vong thienghlim an ta,
Israel Mi Thienghlim chu pomin,
Jakob Pathien chu tri tang an tih.
24 Thlaraua fe suolhai khomin,
Hrietthiemna nei tang an ta,
Mi chier hmang hlakhai khomin,
Zirtirna zawm tang an tih.