Inpâkna Hla
33
1 Mi indikhai, LALPA kuomahInpâkna hla hlimin sak ro;
Mi ngîlhai ta din ama chu,
Inpâk awm hrim a ni si a.
2 Tringtrang leh LALPA inpâkin,
Perkhuong hrui sawm nei leh rem ro.
3 A kuomah hla thar sak unla,
Thiem tak le hlim takin rem ro.
4 LALPA thu chu a’n dik tak a,
A thaw taphot ring a um vong.
5 Indik le fel a ngaina a,
A hmangaina chuoi ngai lo chun,
LALPAN hnuoi hi a sung sip a.
6 Vanhai khi LALPA thua siem,
Iengkim a de taphot el khi,
A trong bau suoka um an nih.
7 Tuipui tuihai a sung khawm a,
Li inthŭkah a sêk khawm a.
8 Hnuoi pumpuiin LALPA tri sien,
Khawvela hnam po po haiin,
Ama chu inzà raw hai se.
9 Thu a hril a, a hung um a,
Thu a pêk a, a ngir nghet hlak.
10 Hnamhai remruotna chu LALPAN
Ieng khom loah a’n changtir a;
Mihai thiltum khom a dâl hlak.
11 LALPA remruot chu chatuon daih,
A tum khom suon tin daih a nih.
12 LALPA chu Pathiena nei hnam,
Rohluotua a thlanghai chu,
Hnam hamthra an va ni ngei de!
13 Vàn a’nthok LALPAN a thlǐr a,
Mihriem po po a hmu vong a,
14 A chĕngna hmuna inthokin,
Hnuoi mi po po a enkai a,
15 An rênga lungril siemtu chun,
An thilthawhai a hriet fai vong.
16 Sipai nei rawn lei ringotin,
Lal tu khom an him ngai naw a,
Mi ralhrâng khom a hrât leiin,
A him thei chuong ngai bik bok nawh.
17 Sakor chu insanhimna di’n,
Ringsan tlak a ni tak tak nawh;
Ieng anga hrat khom ni sien la,
A san him thei tak tak ngai nawh.
18 Ama inzaa trǐtu le
A hmangaina chuoi thei ngai lo,
Beiseituhai po po chungah,
LALPA mit chu a fu zing hlak;
19 Thǐna a’nthok san suok ding le,
Trămpui laka indam dinga,
Beiseina neihai chunga khom.
20 Beisei takin LALPA ei nghak,
Mi thrangpuitu, ei phaw a nih.
21 Amaah ei lungril a lawm,
A hming thienghlim ei ring leiin.
22 I hmangaina chuoi ngai lo chu,
LALPA, kan chungah um sien la,
Kan beisei tak nang i ni si.