LALPA mi ruot Kura
45
1 A hmaa hnamhai tukdol a,Lalhai ralthuom hlippek a,
An kul kotkharhai nor hong a,
Khâr ta loa inumtirtu dinga
A mi thlang le a kut a sukhrat,
Kura chungthua LALPA hril chu:
2 ‘Kei i hmaah feng ka ta,
Tlanghai rawt cham vong ka ta,
Dâr kotkharhai suksieng ka ta,
Kul kotpui kalna thir tluonhai
Ka sukbong vong ding a nih.
3 LALPA, Israelhai Pathien
I hming ngeia kotu che chu,
Ka nizie i hriet theina dingin,
Pindan rila an rohlu sie khawl,
An thup rukhai chu peng ka ti che.
4 Ka siehlaw Jakob thlahai le
Ka thlang Israelhai leiin,
Hming suot meuin ka ko che a,
I mi hriet ngai nawa chu,
Hming inzaum ka pek che.
5 Keima hi LALPA chu ka nih,
Kei naw tu dang an um nawh,
Kei naw Pathien an um nawh.
I mi hriet ngai nawa chu,
Ka sukhrat ding che a nih,
6 Nisa hung suoknaa inthok,
A tlakna hmun chen khomin,
Keima naw an um nawzie,
Kei hi LALPA chu ka nizie,
Keima naw an um nawzie,
Mihan an hriet theina dingin.
7 Var ka siem, thim ka siem bok,
Malsawmna petu ka na,
Sietna intluntu ka ni bok a,
Keima, LALPA ngei el chun,
Chuong thil chu ka thaw a nih.
8 Aw nangni chung van sanghai,
Felna hung insŭrtir unla,
Sûm kha hung trè thla raw se.
Hnuoi khom lo inhong lien sien,
Sandamna hung tro suok sien,
Felna inthrang hlut hlut raw se.
Chuong thil inumtirtu chu,
Kei, LALPA ngei el hi ka nih.
Thilsiem le a Siemtu
9 Siemtu inkhingpuitu chu,
A chung a va hang pik ngei de!
Chu mi chu belhemtu dehawn,
Bel koi hàr ang chauh a nih.
Bêl chun a hemtu kuomah,
‘Iem a na i siem kha?’ tiin,
A’n don hlak hrim am a ni?
I thilsiem khan i kuomah,
‘I mi siem ka ni teu nawh’
A ti hlak hrim am a ni?
10 Mani nu le pa kuomah,
‘Iengti leia hieng anga,
In mi nei hrim am a na?’
Titu chung chu a pik ie!
11 Israelhai Mi Thienghlim,
Anni Siemtu LALPA chun,
Thil la um ding chungchang thu,
Hieng ang hin a hril a nih:
Ka thilthaw in soisel maw?
Ka thaw dan dinghai chenin,
Thu in mi pĕk hlaka maw?
12 Kei hi hnuoi siemtu ka na,
Mihriem khom ka siem a nih.
Ka kutin văn ka kei phar a,
Văn lêngruolhai po po khi,
Ka thu hnuoia um an nih.
13 Ka felnan Kura chawm ka ta,
A lampui sukngîlpêk ka tih.
Sum le lawmman beisei loin,
Ka khawpui indin nawk a ta,
Ka saltanghai insuong a tih,
Iengkim LALPA chun a tih.
Jentelhai ngirhmun thar
14 LALPA chun hi hi a hril:
‘Aigupta mihai, Ethiopia mihai,
Mi dung sei Seba mihai chu,
I thu hnuoiah sie vong ka ta,
An ram thil nei po po leh
I hmaah hung tlu lŭt an ta,
I ta hung ni vong a tih.
Thir khaidieta thlung khawmin,
Zui dul dul an ti che a,
I hmaah dingthrathruonin,
‘Pathien i kuomah a um,
Ama chauh Pathien a nih’
Tiin chibai buk an ti che.
15 Israel Sandamtu Pathien chu,
Pathien inthup hlak i lo ni ngei!
16 Milim siemtuhai po po chun,
Inzakna la tuok an ta,
Muolpho takin liem hmang an tih.
17 Israelhai ruok chu LALPAN,
A chatuon sandamnain,
Kumkhuoin sandam a tih.
Inzak le muolpho takin,
Kumkhuoin siem ngai naw nih.
18 LALPA chu Pathien a na,
Vanhai siemtu Pathien a na,
Leihnuoi hi chengna dinga,
A ruoka sie ding ni loa,
Indintu chu ama a na,
Ama chun hieng hin a hril:
“Keima hi LALPA chu ka na,
Kei naw tu khom an um nawh.
19 Hmun inthima inthokin,
A rûkin thu ka hril ngai nawh.
Jakob thlahai kuoma khom,
‘A thlawnin mi hung zong ro’
Tiin ka hril ngai dèr nawh.
Kei, LALPA hin thutak ka hril a,
Thu indik tak ka puong hlak.
20 Inko khawm unla, hung ro.
Hnam tina mi saltănghai,
Inko khawmin hung hnai ro.
Thing milim chawituhai le,
Mi sandam thei lo milim,
Pathiena betuhai chun,
Hrietna an tlasam a nih.
21 Inrawn khawm tawl unla,
Milim biek hlawk inti dan,
Mi hang hril rêng rêng ta u.
Hieng ka thu inhriettirhai hi,
Tiena tlanga inthok khan,
Tuin am an hril ta hlak a?
Kei, LALPA hi ka ni naw maw?
Kei naw Pathien an um nawh,
Pathien fel le sandamtu,
Kei naw tu khom an um nawh.
22 Khawvel kil tina chênghai,
Ka kuom tieng hung kir unla,
Keiman lo sandam ka ti cheu.
Kei hi Pathien chu ka na,
Kei naw tu khom an um nawh.
23 Keima sâlin ka’n khàm a,
Ka bau suok thu a’n dik a,
Ka thu ka lâk kǐr ngai nawh.
Ka hmaah hnam tinrênghai,
Bokkhupin la kûn an ta,
Ka hmaah lei tinrêngin,
Keima sâlin inkhâm an tih.
24 ‘Indikna le hratna chu,
LALPAA chauh a um’ tiin,
Mihaiin la hril an ta,
A chunga lungsenhai chu,
Muolpho takin la um an tih.
25 Israel thlahai po po chu,
LALPA-ah thiem chang an ta,
Ama chu chawisang an tih” tiin.