13
1 Mi tinin an chunga rorêltuhai thu awi raw hai se. Pathien ruot loin rorêltu an um thei nawh. Tuta rorêltuhai khom hi Pathien ruot an nih. 2 Chuleiin, rorêltu dodaltu taphot chun Pathien ruot a dodal a na, a dodâltu chun a chungah hremna intlungtir a tih. 3 Rorêltuhai chu thil thra thawtuhai ta dingin an trium naw a, thil thra naw thawtuhai ta ding ruok chun an trium a nih. Rorêltu trǐ loa um i nuom am? Thil thra thaw la, inpâk hlawng i tih. 4 Rorêltu chu i thratna dinga Pathien rongbawltu a ni si a. Thil suol i thaw ruok chun trǐ hlê rawh, nuoma kawlhnâm chawi mei mei a ni nawh! Pathien rongbawltu a ni a, thil suol thawtuhai hremtu a nih. 5 Chuleiin, hrem tri lei ni loin, i sie le thra hrietna lei khomin thuneituhai thu chu i zăwm ding a nih. 6 Chuong chu a ni leiin sie khom in chawi hlak. Thuneituhai chu Pathien rongbawltu an ni a, an hun po po rorêlna sina inhmang an nih. 7 Tu chunga khom bat in nei chun tlâk unla, leiman in bat chun pe unla, sie chawi ding a ni leh chawi unla, inzà ding chu inzà unla, chawimawi ding chu chawimawi ro.
Unau inhmangaina
8 Inhmangai tuona ngot naw chu tu thil khom bat naw ro. Mani mihriempui hmangaitu chun Dan a hraw kim tah a nih. 9 Hieng ‘uire naw, tuol that naw, inru naw, inhnar naw’ ti le thupêk dang hrim hrim hi ‘Nangma i’n hmangai angin i vênghai hmangai rawh” ti hin a fûn khâwm vong a nih. 10 Hmangainain khuo le vĕnghai poi a tawk ngai nawh. Chuleiin, inhmangai hi Dan hraw kimna a nih.
Krista hung nawkna hnaizie
11 Chu bâkah, tu lai thil umzie hi in hriet a, inhai chu thrang har a hun tah takzet a nih, ei ring tir lai nêk khan tuhin ei sandamna chu a hnâi lem ta si a. 12 Zàn hi a bo váng vàng tah a, khuo a var ding a ni tah. Chuleiin, thim thilthawhai chu bànsanin var râlthuom inbel ei tiu. 13 Nuom chĕna inrui chiri loin, zâuthău le indit hmanga um loin, innghirngho le inthîk tuo bok loin, sŭn vara umhai angin inzaum takin um ei tiu. 14 Lalpa Isu Krista chun inthuom lem unla, in tisa chăknahai sukpuitling dingin ieng khom thaw naw ro.