Thlarau Thienghlim hung tlung
2
1 Pentikosa ni a hung tlung chun an rêngin hmun pakhatah an um khawm a. 2 Thawk le khatin van tienga inthokin thlipui na tak ri ang an hriet a, an inthrungkhawmna in chu a hung tuom ta mup el a. 3 Meichok, lei ang tak, insem dar an hmu a, mi tin chungah a fu a. 4 An rêngin Thlarau Thienghlimin an sip ta vong a, Thlarauin a’n trongtir ang peiin trong dang dangin an trong tawl a.5 Khawvel hnam tin laia chêng, Pathien tritu Judahai chu Jerusalema châmbang an la um a. 6 Chu ri chu an hrietin mi tam tak an hung pung khawm a, an thu hrilhai chu mi tinin mani trong ang senga an hriet thei leiin mak an ti hle a. 7 Makti takin, “Hieng thuhriltuhai hi Galili mi an ni naw am a ni? 8 Ieng tin am ei rêngin mani trong ang ela an thu hril ei hriet thei am a na? 9 Threnkhat Parthi mi dam, Medai mi dam, Elimatai mi dam ei na, a thren Mesapotamia ram dam, Judai ram dam, Kapadokia ram dam, Ponto ram le Asia ram dam, 10 Frugia ram le Pamfulia ram dam, Aigupta ram le Libia rama Kurini khaw se vêla um dam, 11 threnkhat Rom khuoa inthoka hung inzin Juda mi le Juda saphunhai dam, threnkhat Kret thlierkara mi le Arab rama inthoka hung dam ei nia chu Pathien ropuizie an puongna thuhai chu mani trong ang sengin ei hriet si hi!” an ta. 12 An rêngin makti le a ngaina hre loin, “Hi hi ieng thil am an ta a?” tiin an indon tuo a. 13 Threnkhat ruok chun an nuisan a, “Uoiin thar an inrui a ni hi” an ta.
Pentikos nia Peter thuhril
14 Peter chu sawm le pakhathai leh ngirin, rawl inring takin, “Nangni Juda unauhai le Jerusalema umhai po po, hi thil hi hril fieng ka ti chêu, ka hril hi ngun takin lo ngaithla ro. 15 Hienghai hi in ring angin an inrui nawh. Zing dar kuob chauh a la ni hi.
16 Hi thil hi zawlnei Joel hril kha a ni lem:
‘Pathienin hieng hin a hril:
17 Ni nuhnunga chun mi po po chungah,
Ka Thlarau la buok ka ta,
In naunu le naupahaiin,
Ka thuhai la hril an ta,
In tlangvalhan inlârna hmung an ta,
In upahan mangah mang an ta;
18 Suoknu le suokpa chungah,
Chu ni chun ka thlarau buok ka ta,
Ka thuhai la hril an tih.
19 Chung tieng vànah thilmakhai,
Hnuoiah inchikna thisen le mei,
Meikhu intûr ngul el hai chu,
Ka hung inlangtir ding a nih;
20 Lalpa ni ropui tak inlang hmain,
Nisa chu thimah inchang a ta,
Thla khom thisenah inchang a tih;
21 Lalpa hming lam taphothai chu,
Sandamin um an tih’
tiin.
22 “Nangni Israel mihai, hi hi ngaithla ro. In hriet tah angin, Pathienin Nazaret Isu chu nangni lai a hung tir ngeizie suklangna dingin, ama hmangin thil ropui tak tak dam le inchikna thilmakhai nangni lai a thaw a. 23 Ama chu Pathien tum lawk le rêl lawk angin in kuta pĕk a na, nangnin mi rilohai kut hmangin kraws-ah hemdein in sukhlum a. 24 Amiruokchu, thina chel tang ruol a ni naw leiin, Pathien chun thina hrênga inthokin a’n suo a, a keitho tah a. 25 Davida khomin a chungchang thu hieng hin a lo hril kha:
Ieng lai khomin ka hmaah,
Lalpa ka sie zing hlak a,
Ka chang tieng a um leiin,
Inhnîng ngai hrim hrim naw ning.
26 Chuleiin ka lung a lawm,
Ka thla a hlim êm êm bok,
Ka taksa khom muong takin,
A chawl hadam tah a nih.
27 Ka thlarau chu Seol-ah,
Maksan phal ngai nawng i ta,
I Mi Thienghlim chun hmon hmêl,
A hmù ding phal naw ti nih.
28 Hringna lam i mi kawkhmu,
I bulah lawmna a kim,
I chang tieng chun inhoina,
Chatuonin a um si a. Sam 16:8-11
29 “Unauhai, thlatu Davida thu chu huoi takin ka hril chêu hi, ama chu a thi tah a, an phŭm a, a thlăn khom ei kawl hnai elah a la um zing annawm. 30 Nisienlakhom ama chu zawlnei a na, a thlahai laia pakhatin a lalthrungpha a la hluo ding thu inkhâm meua Pathienin a kuoma a tiem chu a hriet a. 31 Thil hung tlung ding chu a hmu lawk leiin, thlănah maksan a ni naw ding thu le a ruong khom hmon a phal naw ding thu a hril hin Krista thonawkna thu a lo hril a nih. 32 Hi Isu ngei hi Pathienin a keitho nawk tah a, ei rêngin chu thudik hrepuitu chu ei nih. 33 Ama chu Pathien kut chang tieng chawimawiin a um tah a, Pain a tiem Thlarau Thienghlim chu a dong a, tuta in hmu le hriet hi a thilpêk a hung buok chu a ni hih. 34 Davida chu vànah a hang lawn naw a, sienkhom ama ngeiin,
LALPAN ka Lalpa kuomah,
“Ka chang tieng hin hung thrung rawh,
35 I hmêlmahai po po chu
I ke sirsana ka siem
Hmakhat chun” tiin a hril lem a ni kha. Sam 110:1
36 Chuongchun, in hemde tah Isu ngei kha Pathienin Lalpa le Kristaah a siem tah ti Israel mi po poin chieng takin hre raw hai se” a ta.
37 Chu thu chu mipuiin an hrietin an lungril a tawk hle a, Peter le zirtir danghai kuomah, “Unauhai, iem thaw tang kan ta?” an ta. 38 Peter chun, “In suolhai ngaidam a ni theina dingin inrêngin sim unla, Isu Krista hmingin baptisma chang ro. Chuongchun, hi thilpêk Thlarau Thienghlim hi dong in tih. 39 Thutiem hi nangni ta ding a na, in nauhai ta ding khom a na, ram tina mi, ei Lalpa Pathienin a ko taphothai ta ding khom a nih” a ta.
40 Fimkhur dinga infuina thu dang tam tak hrilin, “Tu lai ruolthar suol takhai laka hin inthier fihlim ro” a ta. 41 A hril chu mi tam takin an awi a, baptisma an chang a; chu ni chun mi sangthum laiin an hung pung sa tah a nih.
Ringtuhai khawsak dan
42 Tirkohai inchuktirnaa chun inpumpêkin, bei khoiac fa tlâng le trongtraiin an inpawl khawm hlak a. 43 Tirkohai chun inchikna thilmak tam tak an thaw a, mi tinin maktiin an inzâ hle a. 44 Ringtuhai po po chu an chĕng khawm a, iengkim an intrawm a. 45 An in le lo le an thil neihai an zor a, an mamaw ang peiin an insem tlăng a. 46 Ni tin lungruol takin Tempulah an inkhawm a, an inah hai bei khoiin, lungril hlim tak le inphal takin bu an fak tlăng a, 47 Pathien an inpăk a, mi po po ditsak an hlaw a, Lalpan a sandamhai chun anni chu ni tin an belsa pei a.